ឥណ្ឌា ចិន និងសមាជិក៦ទៀតរបស់ WTO រិះគន់សហភាពអឺរ៉ុប និងអង់គ្លេស ចំពោះវិធានការគាំពារនិយមលើដែកថែប

នៅក្នុងកិច្ចប្រជុំរបស់អង្គការពាណិជ្ជកម្មពិភពលោក (WTO) ដែលមានការិយាល័យកណ្ដាលនៅទីក្រុងហ្សឺណែវ ប្រទេសស្វីស មហាយក្សចិន ឥណ្ឌា និងរុស្ស៊ី រួមជាមួយប្រទេសជាសមាជិកចំនួន៥ផ្សេងទៀតរបស់អង្គការនេះ បានលើកទឡ្ហីករណ៍ថា វិធានការគាំពារនិយមរបស់សហភាពអឺរ៉ុប ដែលបានចូលជាធរមាន បន្ទាប់ពីសហរដ្ឋអាម៉េរិក បានដំឡើងពន្ធបន្ថែមលើប្រភេទដែកថែបមួយចំនួននាំចូលពីប្លុកនេះថា មិនស្របតាមវិធានរបស់ស្ថាប័នពាណិជ្ជកម្មពិភពលោកមួយនេះ។

បណ្ដាសមាជិករបស់អង្គការពាណិជ្ជកម្មពិភពលោក (WTO) រួមទាំងឥណ្ឌា ផងក៏បានរិះគន់ផងដែរចំពោះវិធានការគាំពារនិយមស្រដៀងគ្នា ដែលដាក់ដោយប្រទេសអង់គ្លេស។

មន្ត្រីអនាមិកមួយរូបដែលមានមូលដ្ឋាននៅក្រុងហ្សឺណែវ ប្រទេសស្វីស បានលើកឡើងថា សហភាពអឺរ៉ុប បាននិយាយថា ខ្លួនមានព័ស្តុតាង​បង្ហាញថា វិធានការរឹតបន្តឹងការនាំចូលដែកថែបនៅតែបន្តមានភាពចាំបាច់។

អំឡុងកិច្ចប្រជុំខាងលើប្រទេសចិន និងប្រទេសកូរ៉េ បានលើកឡើងថា ហេតុផលសម្រាប់ការពន្យារវិធានការគាំពារនិយមនេះ គឺមិនសមហេតុផលឡើយ ខណៈប្រទេសប្រេស៊ីល បានលើកទឡ្ហីករណ៍ថា ដំណោះស្រាយប្រកបដោយនិរន្តរភាពតែមួយគត់សម្រាប់បញ្ហាផ្គត់ផ្គង់ដែកច្រើនលើសលប់ទូទាំងពិភពលោក គឺផ្អែកលើកិច្ចសហប្រតិបតិការពហុភាគីជាជាងវិធានការគាំពារនិយមជាឯកតោភាគី។

ប្រទេសឥណ្ឌា ក្នុងឆ្នាំ២០២១ បានស្នើដំឡើងពន្ធនាំចូលបន្ថែមលើផលិតផលមួយចំនួនដែលនាំចូលពីសហភាពអឺរ៉ុប ជាការសងសឹកចំពោះវិធានការគាំពារនិយមខាងលើនេះ។

បន្ទាប់មក ប្រទេសឥណ្ឌា បានស្នើសុំដំឡើងពន្ធគយបន្ថែម១៥% លើទំនិញនាំចូល២២ប្រភេទពីប្រទេសអង់គ្លេស ជាការសងសឹកចំពោះសេចក្ដីសម្រេចរបស់អង់គ្លេស ក្នុងការដាក់ការរឹតបន្តឹងលើផលិតផលដែកថែប បន្ទាប់ពីអង់គ្លេសបានដកខ្លួនចេញពីសមាជិករបស់សហភាពអឺរ៉ុប៕

ដោយ: តែម សុខុម