លោក Perry Warjiyo ទេសាភិបាលធនាគារកណ្តាលឥណ្ឌូណេស៊ី បាននិយាយនៅថ្ងៃទី៥ ខែធ្នូ ឆ្នាំ២០២២នេះថា រូបិយបណ្ណរូព្យាឌីជីថលនឹងត្រូវប្រើប្រាស់ក្នុងការទិញផលិតផលនៅពិភពបច្ចេកវិទ្យា Metaverse ដែលជាពិភពនិមិត្តមួយនៃគម្រោងរបស់ក្រុមហ៊ុនយក្ស Meta ដែលអាចឱ្យមនុស្សមើលឃើញ និយាយឆ្លើយឆ្លងគ្នាបានតាមរយៈឧបករណ៍វែនតា VR ដោយមិនចាំបាច់ត្រូវជួបគ្នាផ្ទាល់។
ធនាគារកណ្តាលនេះ បានចាប់ផ្តើមរចនារូបិយបណ្ណរូព្យាឌីជីថលកាលពីសប្តាហ៍មុន បន្ទាប់ពីមានធនាគារកណ្តាលជាច្រើននៅជុំវិញពិភពលោក កំពុងអភិវឌ្ឍរូបិយបណ្ណឌីជីថលប្រភេទនេះដែរ។
អត្ថបទគួរអាន
បើតាមលោក Perry Warjiyo ឱ្យដឹងថា រូបិយបណ្ណរូព្យាឌីជីថល នឹងប្រើប្រាស់កម្មវិធី (platform) បច្ចេកវិទ្យាមួយដែលនឹងត្រូវគ្នាជាមួយរូបិយបណ្ណឌីជីថលរបស់ធនាគារកណ្តាលផ្សេងៗទៀតដែរ។ ដូច្នេះ នៅក្នុងចង្កោមនៃហេដ្ឋារចនាសម្ព័ន្ធនេះ វាអាចនឹងត្រូវដាក់បញ្ចូលគ្នា ភ្ជាប់ទំនាក់ទំនងគ្នា និងឆ្លងប្រតិបត្តិការរវាងគ្នា។
លោកទេសាភិបាលរូបនេះបន្តថា វានឹងមានកិច្ចព្រមព្រៀងមួយក្នុងចំណោមធនាគារកណ្តាល ចំពោះអត្រាប្តូរប្រាក់ ដែលប្រើប្រាស់សម្រាប់រូបិយបណ្ណឌីជីថល និងការត្រួតពិនិត្យប្រតិបត្តិការរបស់ខ្លួន ក្នុងនោះរួមមានហានិភ័យនៃសន្តិសុខអ៊ីនធើណែត និងលំហូរមូលធនផងដែរ។
បច្ចុប្បន្ន ប្រទេសសេដ្ឋកិច្ចធំបំផុតនៅអាស៊ានមួយនេះ បានហាមឃាត់ការប្រើប្រាស់រូបិយបណ្ណគ្រីបតូ ក្នុងការធ្វើជាមធ្យោបាយទូទាត់ ប៉ុន្តែបានអនុញ្ញាតឱ្យមានប្រតិបត្តិការនៃទ្រព្យសកម្មឌីជីថលក្នុងទីផ្សារអនាគតសម្រាប់គោលបំណងវិនិយោគ៕
អត្ថបទ៖ នៅ សំភី
