រដ្ឋមន្ត្រីការបរទេសជប៉ុនលោក Yoshimasa Hayashi និងសមភាគីមកពីប្រទេសកាហ្សាក់ស្ថាន កៀហ្ស៊ីស៊ីស្ថាន តាជីគីស្ថាន តួកមេនីស្ថាន និងអ៊ូសបេគីស្ថាន ក៏បានបញ្ជាក់ដែរថា ពួកគេនៅតែប្រកាន់ខ្ជាប់នូវគោលការណ៍នៃច្បាប់អន្តរជាតិ ដូចជាការហាមឃាត់លើការគំរាមកំហែង ឬការប្រើប្រាស់កម្លាំង។ នេះបើយោងតាមសេចក្តីថ្លែងការណ៍រួមដែលបានចេញផ្សាយបន្ទាប់ពីកិច្ចប្រជុំនៅទីក្រុងតូក្យូ។
ជាការពិត ទីក្រុងតូក្យូបាន និងកំពុងព្យាយាមពង្រឹងទំនាក់ទំនងសេដ្ឋកិច្ច ជាមួយបណ្តាប្រទេសនៅអាស៊ីកណ្តាលក្នុងកិច្ចខិតខំប្រឹងប្រែងជាក់ស្តែងមួយដើម្បីទប់ទល់នឹងការកើនឡើងឥទ្ធិពលរបស់ប្រទេសចិន ដែលបន្តវិនិយោគលើគម្រោងហេដ្ឋារចនាសម្ព័ន្ធទ្រង់ទ្រាយធំនៅក្នុងតំបន់ តាមរយៈគំនិតផ្តួចផ្តើម «ខ្សែក្រវ៉ាត់ និងផ្លូវ» របស់ខ្លួន។
ម្ប៉ាងវិញទៀត ប្រទេសជប៉ុនបានថ្កោលទោសការឈ្លានពានរបស់ទីក្រុងមូស្គូលើទីក្រុងកៀវថា ជាការប៉ុនប៉ងឯកតោភាគីដើម្បីផ្លាស់ប្តូរស្ថានភាពបច្ចុប្បន្នដោយប្រើកម្លាំង ខណៈដែលអតីតសាធារណរដ្ឋសូវៀតទាំងប្រាំកំពុងបង្កើនការមិនទុកចិត្តលើរុស្ស៊ីបន្ទាប់ពីការលុកលុយអ៊ុយក្រែនដែលជាអតីតសាធារណរដ្ឋសូវៀតផងដែរនោះ។
អត្ថបទគួរអាន
លោក Hayashi រដ្ឋមន្ត្រីការបរទេសជប៉ុនបានប្រាប់សន្និសីទសារព័ត៌មានមួយបន្ទាប់ពីកិច្ចពិភាក្សាថា ក្រុមរដ្ឋមន្ត្រីបានពិភាក្សាអំពីការដឹកជញ្ជូនការផ្គត់ផ្គង់ថាមពលឆ្លងកាត់សមុទ្រកាសព្យែនពីអាស៊ីកណ្តាលជាជម្រើសមួយសម្រាប់ផ្លូវដែលមានស្រាប់ ដោយសារការរំខានដែលបណ្តាលមកពីសង្គ្រាមរបស់រុស្ស៊ីជាមួយអ៊ុយក្រែន។
ឧបនាយករដ្ឋមន្ត្រី និងជារដ្ឋមន្ត្រីការបរទេសកាហ្សាក់ស្ថានលោក Mukhtar Tileuberdi រដ្ឋមន្ត្រីការបរទេសកៀហ្ស៊ីស៊ីស្ថានលោក Zheenbek Kulubaev រដ្ឋមន្ត្រីការបរទេសតាជីគីស្ថាន Sirojiddin Muhriddin អនុប្រធានខុទ្ទកាល័យរដ្ឋមន្ត្រី និងរដ្ឋមន្ត្រីការបរទេសរបស់ប្រទេសតួកមេនីស្ថានលោក Rashid Meredov និងរដ្ឋមន្ត្រីការបរទេសអ៊ូសបេគីស្ថានលោក Vladimirs Norov បានចូលរួមកិច្ចប្រជុំ។
ក្នុងនោះ រដ្ឋមន្ត្រីការបរទេសទាំងប្រាំមួយរូបក៏បានសន្យាថានឹងដោះស្រាយបញ្ហាប្រឈមក្នុងសន្តិសុខសេដ្ឋកិច្ចដូចជា «ការបង្ខិតបង្ខំផ្នែកសេដ្ឋកិច្ច» ដោយការអនុវត្តទណ្ឌកម្មពាណិជ្ជកម្មរបស់ប្រទេសចិនលើប្រទេសដែលទំនាក់ទំនងរបស់ខ្លួនកាន់តែយ៉ាប់យ៉ឺន។
មែនទែនទៅ ចាប់តាំងពីការចាប់ផ្តើមនៃកិច្ចសន្ទនាថ្នាក់រដ្ឋមន្ត្រីការបរទេស «អាស៊ីកណ្តាលបូកជប៉ុន» សម្រាប់ការអភិវឌ្ឍន៍ក្នុងតំបន់ក្នុងឆ្នាំ២០០៤ ប្រទេសជប៉ុនបានពង្រឹងទំនាក់ទំនងសេដ្ឋកិច្ចជាមួយរដ្ឋទាំងប្រាំ។ ហើយឆ្នាំនេះគឺជាខួបលើកទី៣០ នៃការបង្កើតទំនាក់ទំនងការទូតរវាងប្រទេសជប៉ុន និងបណ្តាប្រទេសអាស៊ីកណ្តាលនីមួយៗ បន្ទាប់ពីទទួលបានឯករាជ្យពីអតីតសហភាពសូវៀត។ ដោយឡែក ប្រទេសមហាអំណាចផ្សេងទៀតដូចជា សហរដ្ឋអាមេរិក ចិន ឥណ្ឌា និងរុស្ស៊ីបានដើរតាមប្រទេសជប៉ុន និងមានក្របខ័ណ្ឌកិច្ចសន្ទនាស្រដៀងគ្នានេះដែរ។
