វិនិយោគិនជប៉ុន នៅឆ្នាំ២០២២ បានបោះទុនវិនិយោគ ក៏ដូចជាពង្រីកការវិនិយោគធ្វើអាជីវកម្មនៅក្នុងប្រទេសថៃច្រើនជាងគេបំផុត ដែលមានតម្លៃទុនវិនិយោគជាង ១ពាន់១រយលានដុល្លារ ខណៈដែលប្រទេសចិនឈរលំដាប់ទី២ ដែលមានទុនវិនិយោគជាង៧១២លានដុល្លារ និងទីក្រុងហុងកុង ឈរលំដាប់ទី៣មានទុនវិនិយោគជាង ៥៥៧លានដុល្លារ។
ត្រូវបានស្រង់សម្ដីដោយកាសែតបាងកកប៉ុស្ដិ៍ អនុរដ្ឋមន្ត្រីក្រសួងពាណិជ្ជកម្មថៃ លោក Sinit Lerkrai បាននិយាយថា គណកម្មាធិការពាណិជ្ជកម្មអន្តរជាតិ បានផ្ដល់ការអនុញ្ញាតក្រោមច្បាប់ពាណិជ្ជកម្មបរទេស សម្រាប់គម្រោងវិនិយោគ ៥៨៣គម្រោងកាលពីឆ្នាំ២០២២ ដែលមានការកើនឡើង២%។
ការវិនិយោគពីបរទេសនៅក្នុងប្រទេសថៃ កាលពីឆ្នាំមុន ក៏បានផ្ដល់ការងារដល់កម្មករក្នុងស្រុកប្រមាណ ជាង៥ពាន់នាក់ផងដែរ ប៉ុន្ដែ ចំនួននេះ មានការថយចុះ៤% បើធៀបនឹងឆ្នាំ២០២២។ ក្នុងនោះ ក្រុមហ៊ុនជប៉ុនក៏បានផ្ដល់ការងារដល់កម្មករក្នុងស្រុកច្រើនជាងគេបើធៀបនឹងក្រុមហ៊ុនបរទេសផ្សេងទៀត។
អត្ថបទគួរអាន
នៅឆ្នាំ២០២២ ប្រទេសថៃ បានទាក់ទាញបានវិនិយោគិនជនជាតិជប៉ុនជាង១៥០នាក់ ដែលមានប្រហែល ២៦% នៃវិនិយោគបរទេសសរុបនៅក្នុងប្រទេសនេះ និងត្រូវបានតាមពីក្រោយដោយវិនិយោគមកពីសិង្ហបុរីចំនួន៩៨នាក់ ដែលមានចំណែក ១៧% និងវិនិយោគមកពីសហរដ្ឋអាមេរិកមានចំនួន៧១នាក់ មានចំណែក១២% នៃចំនួនវិនិយោគិនបរទេសរុប។
ដោយឡែក សម្រាប់វិនិយោគិនជនជាតិចិននៅក្នុងប្រទេសថៃវិញ មានត្រឹមតែ៣១នាក់ប៉ុណ្ណោះ ឬស្មើនឹងចំណែក៥% នៃវិនិយោគបរទេសសរុប ប៉ុន្ដែ បើមើលទៅលើតម្លៃទុនវិនិយោគវិញ គឺចិនមានច្រើនជាងគេលំដាប់ទី២បន្ទាប់ពីវិនិយោគិនជប៉ុន។ ជាមួយគ្នានេះ វិនិយោគិនហុងកុង មានចំនួន៤០នាក់ ដែលមានចំណែកប្រហែល៧% នៃវិនិយោគិនបរទេសសរុបក្នុងប្រទេសថៃ។
សំណើវិនិយោគភាគច្រើន ដែលត្រូវបានអនុម័តនៅឆ្នាំ២០២២ គឺសុទ្ធតែធ្វើឡើងស្របទៅនឹងគោលដៅនៃការអភិវឌ្ឍហេដ្ឋរចនាសម្ព័ន្ធ និងគោលដៅឧស្សាហកម្មរបស់រដ្ឋាភិបាលថៃ។
សូមបញ្ជាក់ថា នៅក្នុងឆ្នាំ២០២២ វិនិយោគិនបរទេសដែលថៃស្រូបទាញបានប្រមាណ ១២០នាក់នោះ គឺមានប្រមាណ២០% នៃវិនិយោគសរុប ដែលបានវិនិយោគនៅក្នុងប្រទេសថៃ ហើយការវិនិយោគដែលហូរចូលមកតាមគម្រោងច្រករបៀងសេដ្ឋកិច្ចភាគខាងកើត ដែលមានបំណងប្រែក្លាយទៅជាមជ្ឈមណ្ឌលឧស្សាហកម្មកម្រិតខ្ពស់នោះ គឺមានចំណែកដល់ទៅ ៤១% នៃការវិនិយោគសរុបរបស់ថៃ៕
