សហមេធាវីការពារក្តី លោក កឹម សុខា អ្នកស្រី ម៉េង សុភារី បាននិយាយប្រាប់អ្នកសារព័ត៌មាន នៅថ្ងៃព្រហស្បតិ៍ ទី១៦ ខែមករា ឆ្នាំ២០២០ ដូច្នេះថា “រឿងញ៉ាំបាយ ញ៉ាំទឹកជាមួយគ្នា វាមិនជាបទល្មើសទេ ប៉ុន្តែ យើងឃើញមានដាក់រូបអ៊ីចឹងៗ យកមកដាក់ដែរ ជាភ័ស្តុតាង ហើយភ័ស្តុតាង អ៊ីចឹងៗ រូបថតអ៊ីចឹងៗ ខ្ញុំថា បើសិនជាជួបជាមួយបរទេស គាត់ជួបច្រើន សម្បីតែថ្មីៗនេះ ឯកឧត្ដម កឹម សុខា ជួបជាមួយទូតច្រើន រូបថតក៏មិនចេះតិចទេ។”
អ្នកស្រី ម៉េង សុភារី បាននិយាយផងដែរថា រូបភាពដែលដាក់ចូលក្នុងសំណុំរឿងនោះ គឺជារូបថតកូនស្រីលោក កឹម សុខា ថតជាមួយបរទេស។
អ្នកស្រី ម៉េង សុភារី បាននិយាយបន្តថា ”រូបថតហ្នឹង ហូបបាយ ឥឡូវ ខ្ញុំចង់សួរថា គ្រាន់តែហូបបាយជាមួយគ្នាអត់បានទេ ឬម៉េចមនុស្ស? មនុស្សជាតិ យើងជាមនុស្សទាំងអស់គ្នា ដែលមាន ដូចខ្ញុំទៅញ៉ាំបាយ ជាមួយអ្នកកាសែត ឬមួយ ក៏ខ្ញុំទៅញ៉ាំបាយជាមួយបរទេសរូបណា ថតរូបមក ថា តើអាចចោទប្រកាន់ខ្ញុំពីបទល្មើសសន្ទិដ្ឋិភាពហ្នឹង កើត ឬក៏អត់?”
អត្ថបទទាក់ទង
អ្នកស្រី ម៉េង សុភារី បានអះអាងថា ការចោទប្រកាន់ពីបទល្មើសសន្ទិដ្ឋិភាពទាល់តែមានភ័ស្តុតាងឯកសារសម្ងាត់ កិច្ចសន្យា ឬកិច្ចព្រមព្រៀង ដែលបង្ហាញពីផែនការពិតប្រាកដ។
មេធាវីរដ្ឋាភិបាល លោក គី តិច ក៏បានថ្លែងប្រាប់អ្នកសារព័ត៌មាន នៅថ្ងៃព្រហស្បតិ៍ ទី១៦ ខែមករា ឆ្នាំ២០២០នេះ ផងដែរថា រឿងក្តីនេះជារឿងព្រហ្មទណ្ឌសុទ្ធសាធ គឺមិនមែនជារឿងនយោបាយទេ ហើយបាននិយាយថា ភ័ស្តុតាងមានច្រើន ប្រឆាំងនឹងលោក កឹម សុខា។
លោក គី តិច បាននិយាយដូច្នេះថា “លទ្ធផលយ៉ាងណា យើងនឹងឃើញទាំងអស់គ្នាពេលខាងមុខ។ យើងមានភ័ស្តុតាងច្រើនណាស់ គ្រាន់តែជំនួយការបី បួននាក់ អូសភ័ស្តុតាង ស្ពាយ។ ភស្តុតាងពីរបីវ៉ាលីអាវ៉ាលីធំ។”
សវនាការនេះ នឹងបន្តទៀតនៅសប្តាហ៍ក្រោយ៕
