KFC នៅម៉ាឡេស៊ី ប្រកាសបិទហាងជាបណ្ដោះអាសន្ន ដោយសារបញ្ហាសេដ្ឋកិច្ច តែអ្នកខ្លះសង្ស័យថា ពាក់ព័ន្ធនឹងយុទ្ធនាការពហិការប្រឆាំងអ៊ីស្រាអែល

ម៉ាឡេស៊ី ដែលជាប្រទេសកាន់សាសនាឥស្លាមភាគច្រើន ដែលត្រូវបានគេដឹងថា ជាប្រទេសដែលមាននិន្នាការគាំទ្រប៉ាឡេស្ទីនដ៏រឹងមាំ បានប្រកាសបិទហាង KFC ដែលជាយីហោផលិតកម្មអាហារលឿនរបស់បស្ចិមប្រទេស ដែលជាគោលដៅធ្វើយុទ្ធនាការពហិការ ដើម្បីប្រឆាំងនឹងការលុកលុយរបស់អ៊ីស្រាអែលនៅតំបន់ហ្គាហ្សា។ ពាក់ព័ន្ធការបិទហាងនេះ ក្រុមហ៊ុន QSR Brands ដែលប្រតិបត្តិការសិទ្ធិអាជីវកម្មផ្តាច់មុខ KFC និង Pizza Hut ក្នុងប្រទេសម៉ាឡេស៊ី បាននិយាយថា ខ្លួនបានបិទហាង KFC ជាបណ្តោះអាសន្ន ដោយសារតែស្ថានភាពសេដ្ឋកិច្ចប៉ុណ្ណោះ។

ក្រុមហ៊ុនបានលើកឡើងថា ការបិទនេះ គឺដោយសារតែថ្លៃដើមអាជីវកម្មនៅពេលបច្ចុប្បន្នកើនឡើង ប៉ុន្តែមិននិយាយអ្វីពាក់ព័ន្ធនឹងយុទ្ធនាការដែលគេសង្ស័យនោះឡើយ។ ក្រោយការប្រកាសបិទ ប្រព័ន្ធផ្សព្វផ្សាយក្នុងប្រទេសម៉ាឡេស៊ី បានរាយការណ៍ថា ហាង KFC ជាង១០០ កន្លែង បានបិទជាបណ្ដោះ​អាសន្ន ហើយបុគ្គលិកដែលបម្រើការនៅហាងដែលបានបិទទ្វារ ត្រូវបានក្រុមហ៊ុនផ្លាស់ប្តូរឲ្យទៅបម្រើការងារផ្សេងៗនៅក្នុងហាងនានានៅក្នុងក្រុមហ៊ុន។

KFC ត្រូវបានគេដឹងថា ជាខ្សែច្រវាក់ផលិតកម្មអាហារលឿនផ្តោតសំខាន់នៅលើផលិតកម្មសាច់មាន់របស់អាម៉េរិក។ ហាងនេះត្រូវបានគេដឹងថា មានមូលដ្ឋាននៅសហរដ្ឋអាម៉េរិក ហើយឈរនៅលំដាប់ទី២ បន្ទាប់ពី McDonald។ KFC មានទីតាំងសរុបជាង៣ម៉ឺនកន្លែង នៅក្នុងប្រទេស១៥០នៅជុំវិញពិភពលោក៕

ដោយៈ សរ សុជាតិ