ស្របពេលដំឡូងមីកំពុងជួបបញ្ហាទីផ្សារ តើអ្នកដាំដំឡូងមីគួរងាកទៅដាំដំណាំផ្សេងជំនួសវិញ ឬយ៉ាងណា?
មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ កាលពីពេលថ្មីៗបានលើកទឹកចិត្តឱ្យកសិករដាំដំឡូងមីគួរងាកទៅដាំដំណាំផ្សេង ដែលមានសក្តានុពលទ…
លោក ស៊ុយ កុកធាន អនុប្រធានសមាគមស្វាយចន្ទីកម្ពុជា បានឱ្យដឹងថា រោងចក្រកែច្នៃគ្រាប់ស្វាយចន្ទីដ៏ធំបំផុតនៅកម្ពុជា របស់ក្រុមហ៊ុនសិង្ហបុរី CSNC ដែលកន្លងមកគ្រោងដាក់ឱ្យដំណើរការនៅអំឡុងខែឧសភា ឬខែមិថុនា ឆ្នាំ២០២៥នេះ បានសាងសង់រួចរាល់ស្ទើរទាំងស្រុងហើយ គិតមកទល់ពេលនេះ ប៉ុន្តែរោងចក្រនេះនៅពុំទាន់អាចដាក់ដំណើរការបាននៅឡើយទេ។ ការយឺតយ៉ាវនៃការដាក់ឱ្យដំណើរការនេះ ត្រូវបានអ្នកជំនាញរូបនេះអះអាងថា គឺដោយសារមានការប្រែប្រួលមួយចំនួនទៅលើការនាំចូលម៉ាស៊ីនកែច្នៃគ្រាប់ស្វាយចន្ទី ដោយបច្ចុប្បន្នស្ថិតក្នុងដំណាក់កាលរង់ចាំការសម្របសម្រួលពីក្រុមប្រឹក្សាអភិវឌ្ឍន៍កម្ពុជា ទៅលើការផ្តល់វិញ្ញាបនបត្រចុះបញ្ជីជាគម្រោងវិនិយោគមានលក្ខណៈសម្បតិ្តគ្រប់គ្រាន់ (QIP) ដ្បិតថា កាលណាក្រុមហ៊ុនទទួលបានវិញ្ញាបនបត្រនេះ គឺពន្ធនៃការនាំចូលម៉ាស៊ីនកែច្នៃ គឺជាបន្ទុករបស់រដ្ឋ ហើយនៅពេលនាំចេញគ្រាប់ស្វាយចន្ទីទៅទីផ្សារអរន្តរជាតិ ទៀតសោត ក៏ទទួលបានការអនុគ្រោះពន្ធមួយចំនួនផងដែរ។
តែយ៉ាងណាមកទល់ពេលនេះ លោក ស៊ុយ កុកធាន នៅមិនទាន់អាចកំណត់ពីពេលវេលាជាក់លាក់ក្នុងការបើកដំណើរការជាផ្លូវការរបស់រោងចក្រ CSNC នេះនៅឡើយទេ។ ប៉ុន្តែលោកជឿជាក់ថា នៅពេលរោងចក្រនេះដាក់ឱ្យដំណើរការ វានឹងផ្តល់អត្ថប្រយោជន៍ជាច្រើនសម្រាប់សេដ្ឋកិច្ចកម្ពុជា តាមរយៈការស្រូបទាញវត្ថុធាតុដើមនៅក្នុងស្រុក និងផ្តល់ឱកាសការងារដល់ពលរដ្ឋជាច្រើនរយនាក់ ព្រោះក្រៅពីកែច្នៃគ្រាប់ស្វាយចន្ទី រោងចក្រនេះនឹងកែច្នៃសំបុកត្រចៀកកាំ និងទុរេនសម្រាប់នាំចេញផងដែរ។
គួរជម្រាបថា រោងចក្រកែច្នៃគ្រាប់ស្វាយចន្ទីរបស់ក្រុមហ៊ុនសិង្ហបុរី CSNC ទំហំជាង១ម៉ឺន២ពាន់ម៉ែត្រការ៉េ ដែលមានទីតាំងស្ថិតក្នុងឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ ត្រូវបានអភិវឌ្ឍន៍លើផ្ទៃដីជាង៦០ហិកតា ជាមួយទុនវិនិយោគក្នុងជំហានដំបូងចំនួន១២លានដុល្លារ។ រោងចក្រនេះ ត្រូវបានវិនិយោគរួមគ្នារវាងក្រុមហ៊ុនសិង្ហបុរី CSNC ជាមួយភាគហ៊ុនិកកម្ពុជា និងមានសមត្ថភាពកែច្នៃគ្រាប់ស្វាយចន្ទីឆៅជាមធ្យមបានរហូតដល់១ម៉ឺន២ពាន់តោនក្នុង១ឆ្នាំនេះ៕
