បច្ចុប្បន្ន ក្រុមហ៊ុន LG Energy Solution រួមជាមួយនឹងដៃគូរបស់ខ្លួន បានទទួលការបញ្ជាទិញផលិតផលអាគុយយានយន្ដអគ្គិសនីនេះសរុបក្នុងតម្លៃដល់ទៅជិត២៣០ពាន់លានដុល្លារអាមេរិកឯណោះ។ នេះបើតាមការចុះផ្សាយដោយសារព័ត៌មានេជប៉ុន Nikkei Asia។
ក្រុមហ៊ុនថាមពល LG Energy បានប្រកាសកាលពីខែមុនថា ខ្លួននឹងចាប់ដៃគូជាមួយក្រុមហ៊ុន Honda Motor របស់ប្រទេសជប៉ុន ដើម្បីសាងសង់រោងចក្រថាមពលថ្មរថយន្តអគ្គិសនី (EV) នៅសហរដ្ឋអាមេរិក។ បន្ថែមពីនេះ ក្រុមហ៊ុនយក្សរបស់កូរ៉េខាងត្បូងមួយនេះ ក៏បានបង្កើតការបណ្តាក់ទុនស្រដៀងគ្នានេះ ជាមួយក្រុមហ៊ុន General Motors នៅសហរដ្ឋអាមេរិក និងក្រុមហ៊ុនស្តេលេនធី (Stellanti) នៅអឺរ៉ុបផងដែរ ដើម្បីសាងសង់រោងចក្រចំនួន ៦ កន្លែងជុំវិញពិភពលោក ដែលនេះ គឺដើម្បីឆ្លើយតបនឹងតម្រូវការដ៏ខ្លាំងក្លាពីការផ្លាស់ប្តូរយ៉ាងឆាប់រហ័សពីប្រើប្រាស់រថយន្តប្រេងសាំងទៅរថយន្ដអគ្គិសនី។
បើគិតមកត្រឹមខែមិថុនាកន្លងទៅ ក្រុមហ៊ុនយក្ស LG Energy បានទទួលការបញ្ជាទិញអាគុយយានយន្ដអគ្គិសនីក្នុងតម្លៃសរុបដល់ទៅ ២២៨ពាន់លានដុល្លារអាមេរិកឯណោះ ដែលចំនួននេះ គឺមានប្រហែល ១៧ដងនៃការលក់សុទ្ធរបស់ក្រុមហ៊ុននេះ កាលពីឆ្នាំ២០២១។
អត្ថបទគួរអាន
លោកខ្វុន យុន ស៊ូ (Kwon Young-soo) នាយកប្រតិបត្តិក្រុមហ៊ុនថាមពលអិលជី (LG Energy) បាននិយាយថា៖ «ការបណ្តាក់ទុនរួមគ្នារបស់យើងជាមួយក្រុមហ៊ុន Honda ដែលមានកេរ្តិ៍ឈ្មោះល្បីល្បាញមួយនោះ គឺជាការឈានជើងមួយដ៏សំខាន់នៅក្នុងយុទ្ធសាស្រ្តរយៈពេលវែងរបស់ LG ក្នុងការលើកកម្ពស់ការផលិតអាគុយយានយន្ដអគ្គិសនីនៅក្នុងទីផ្សារអាមេរិកខាងជើង ដែលកំពុងរីកចម្រើនយ៉ាងឆាប់រហ័សនាពេលនេះ»។
មែនទែនទៅ ក្រុមហ៊ុមថាមពល LG ដែលជាក្រុមហ៊ុនផលិតអាគុយយានយន្ដអគ្គិសនីធំជាងគេទីពីររបស់ពិភពលោក ហើយក្រុមហ៊ុន Honda នឹងធ្វើការវិនិយោគ ៤,៤ ពាន់លានដុល្លារបន្ថែម ក្នុងការបណ្តាក់ទុនរួមគ្នា ជាមួយនឹងរោងចក្រដែលមានសមត្ថភាពផលិតថាមពលអាគុយសរុបដល់ទៅ ៤០ ជីហ្គាវ៉ាត់ម៉ោង ដែលគ្រោងនឹងដាក់ឱ្យដំណើរការនៅឆ្នាំ២០២៥ ខាងមុខ ។
សូមបញ្ជាក់ថា កន្លងមកក្រុមហ៊ុន LG Energy ក៏មានរោងចក្រផលិតថាមពលថ្មអាគុយផ្ទាល់ខ្លួននៅបរទេសផ្សេងទៀតផងដែរ រួមទាំងនៅក្នុងប្រទេសចិន ប៉ូឡូញ និងសហរដ្ឋអាមេរិក ហើយគម្រោងថ្មីៗទាំងអស់របស់ LG ដែលបានប្រកាសឡើងទាំងអស់នេះ គឺសុទ្ធសឹងជាការបណ្តាក់ទុនរួមគ្នាជាមួយក្រុមហ៊ុនផលិតរថយន្តធំៗរបស់ពិភពលោក៕
