លោកឧកញ៉ាដែលបានកសាងនូវកេរ្ដិ៍ឈ្មោះរបស់កម្ពុជា និងពាំនាំផលិតផលយីហោរបស់កម្ពុជាជាច្រើនទៅកាន់ពិភពលោក លោកឧកញ៉ា ហៃ លីអ៊ាង បានលើកឡើងថា មិនថាជោគជ័យនៅឆ្ងាយប៉ុណ្ណា ឬលំបាកយ៉ាងណា “បើយើងមិនហ៊ានចេញធ្វើ នោះយើងក៏មិនអាចដឹងថា ខ្លួនឯងអាចនឹងទៅដល់ទីណានោះដែរ”។
ពាក្យមួយឃ្លានេះហើយបានធ្វើឲ្យលោកឧកញ៉ា ប្រធានអគ្គនាយក្រុមហ៊ុន Confirel និងជាម្ចាស់សហគ្រាសផលិតឱសថ PPM រូបនេះ បានបង្កើតក្រុមហ៊ុនទាំងពីរនេះបានមកទល់សព្វថ្ងៃ ទាំងមិនធ្លាប់ដែលគិតថា នឹងអាចធ្វើបានដូចសព្វថ្ងៃនេះនោះឡើយ។
លោកឧកញ៉ាបន្ថែមថា រហូតមកទល់ពេលនេះ ក្រុមហ៊ុនទាំងពីររបស់លោកឧកញ៉ា គឺមានដើមទុន ១០០% ជាការវិនិយោគដោយជនជាតិខ្មែរ និងធនធានមនុស្សទាំងអស់សុទ្ធតែជនជាតិខ្មែរ ដែលនេះ គឺជាមោទកភាពមួយសម្រាប់ជាតិយើង ទាំងការងារដែលលោកនិងក្រុមការងារធ្វើកន្លងមក ត្រូវបានគេចាត់ទុកថា ដូចជាអូសឫស្សីបញ្ច្រាសចុងក៏ដោយក្ដី។
នៅពេលដែលត្រូវបានសួរថា តើអ្វីជារូបមន្ដដែលធ្វើឲ្យលោកជោគជ័យមកដល់ពេលនេះ? ប្រធានអគ្គនាយកក្រុមហ៊ុន Confirel ដែលទើបតែទទួលបានពានរង្វាន់មាសលេខ១ នៅអាស៊ាន ពីផលិតផលស្ករតោ្នតសរីរាង្គរបស់ខ្លួន បានលើកឡើងថា សំណួរនេះហាក់ដូចជាពិបាកឆ្លើយបន្តិចសម្រាប់រូបលោកផ្ទាល់ ព្រោះការចាប់ផ្ដើមឡើងដំបូងនៃអាជីវកម្មរបស់លោក គឺមិនបានគិតពីយុទ្ធសាស្ត្រជ្រៅជ្រះ ឬការពង្រីកខ្លួនឲ្យធំដូចសព្វថ្ងៃនេះទេ។ ប៉ុន្ដែ អ្វីដែលលោកមានជាមូលដ្ឋានសំខាន់បំផុតនោះ គឺស្មារតីស្រឡាញ់ជាតិ ស្រឡាញ់ផលិតផលដែលជារបស់ជាតិខ្លួន និងចង់ជួយដល់ផលិតផលទាំងនោះឲ្យមានទីផ្សារ និងមានការទទួលស្គាល់ជាអន្តរជាតិ។ អ្វីដែលពិសេសជាងនេះទៀតនោះ គឺស្មារតីតស៊ូ អត់ធ្មត់ មិនបោះបង់នូវគោលដៅរបស់ខ្លួនចោល។
លោកឧកញ៉ា ហៃ លីអ៊ាង ប្រធានអគ្គនាយក្រុមហ៊ុន Confirel និងជាម្ចាស់សហគ្រាសផលិតឱសថ PPM។
តើអ្នកបានអានអត្ថបទនេះ ឬនៅ?
លោកឧកញ៉ា ហៃ លីអ៊ាង បានបន្ថែមទៀតថា តាមបទពិសោធន៍ដែលលោកបានហែលឆ្លង តាមរយៈការអភិវឌ្ឍក្រុមហ៊ុនតាំងពីបាតដៃទទេរ ឲ្យបានធំធាត់មកទល់ពេលនេះ គឺបានកើតឡើងដោយសារមានការចូលរួមយ៉ាងសស្រាក់សស្រាំពីបុគ្គលិកគ្រប់ជាន់ថ្នាក់។
លោកឧកញ៉ាបានគូសបញ្ជាក់ទៀតថា ដរាបណាបុគ្គលិកទាំងអស់ រួមទាំងថ្នាក់ដឹកនាំ មានទស្សនវិស័យនិងចក្ខុវិស័យរួមគ្នា មានគោលការណ៍សីលធម៌ល្អ មានវប្បធម៌ក្នុងការចែករំលែកទៅកាន់គ្នា ជឿជាក់លើសមត្ថភាពរវាងគ្នានិងគ្នា មានភាពស្មោះត្រង់ជាមូលដ្ឋាន រួមទាំងចិត្តអំណត់អត់ធន់ នោះអ្វីៗក៏យើងអាចឈានទៅសម្រេចបានដែរ។ ពិសេសជាងនេះ គឺការមានគំនិតច្នៃប្រឌិតខ្ពស់ក្នុងការគិតនិងអនុវត្តការងារ។ ជាមួយគ្នានេះដែរ ការវិនិយោគលើធនធានមនុស្ស និងបច្ចេកទេស ក៏ជាតម្រូវការចាំបាច់ផងដែរ ដើម្បីជំរុញឲ្យការបោះជំហានឆ្ពោះទៅរកជោគជ័យរបស់អាជីវកម្ម កាន់តែលឿនរហ័ស និងមានប្រសិទ្ធភាពខ្ពស់។
ទោះបីជាការចាប់ផ្ដើមអាជីវកម្មដំបូង ក្រោយពីប្រទេសទើបតែងើបចេញពីសង្គ្រាម អ្វីៗក៏ត្រូវចាប់ផ្ដើមឡើងពីសូន្យក៏ដោយ ប៉ុន្ដែ លោកឧកញ៉ា ហៃ លីអ៊ាង តែងតែមានសុទិដ្ឋិយមខ្ពស់ចំពោះទីផ្សារ និងអ្វីដែលខ្លួនកំពុងធ្វើជានិច្ច ព្រោះលោកយល់ថា រាល់អ្វីដែលយើងធ្វើនៅថ្ងៃនេះ ច្បាស់ណាស់វានឹងហុចផ្លែផ្កានៅថ្ងៃណាមួយ ទោះបីជាតិច ឬច្រើនក្ដី។ ប៉ុន្ដែ បើយើងមិនធ្វើ អង្គុយចាំតែមើលគេធ្វើ ឬមានភាពទុទិ្ទដ្ឋិនិយមជ្រុល នោះយើងនឹងមិនមានអ្វីចម្រើនទេនៅថ្ងៃខាងមុខ។
តើអ្នកបានអានអត្ថបទនេះឬនៅ?
លោកបានលើកឡើងយ៉ាងដូច្នេះថា “ខ្ញុំយល់ថា កំណប់មានច្រើនណាស់នៅកម្ពុជា ពិសេស នៅតាមទីជនបទតែម្ដង។ គ្រាន់តែយើងមិនបាននាំគ្នាចាប់អារម្មណ៍មើល និងខិតខំកែច្នៃវាឲ្យក្លាយជារបស់មានតម្លៃតែប៉ុណ្ណោះ”។
កំណប់ដែលលោកឧកញ៉ា ហៃ លីអ៊ាង បានលើកឡើងនេះ គឺសម្ដៅលើផលិតផលធម្មជាតិដែលមានជារបស់ខ្មែរ ដូចជា ស្ករត្នោតដែលក្រុមហ៊ុនលោកកំពុងធ្វើ និងម្រេចកំពត ដែលពិភពលោកមានការទទួលស្គាល់ជាដើម និងមានផលិតផលជាច្រើនផ្សេងទៀត ដែលមិនទាន់មានអ្នកកែច្នៃឲ្យក្លាយជាកំណប់មានតម្លៃនៅឡើយ។ តួយ៉ាង លោកឧកញ៉ាបានគូសបញ្ជាក់ថាស្ករត្នោត ដែលក្រុមហ៊ុនលោកឧកញ៉ាបានកែច្នៃនាំចេញទៅក្រៅប្រទេសមានចំនួនប្រមាណ ១៥០តោនក្នុងមួយឆ្នាំៗ ទៅកាន់ទីផ្សារចិន វៀតណាម ជប៉ុន តៃវ៉ាន កូរ៉េ បារាំង និងអាឡឺម៉ង់ ជាដើម។ ហើយទោះបីជាវា ជាចំនួនមួយតិចតួចក្ដី បើធៀបនឹងផលិតផលនាំចេញផ្សេងទៀតរបស់កម្ពុជា ប៉ុន្ដែ វាជាមោទកភាពរបស់យើងដែលជាជនជាតិខ្មែរ។
សូមបញ្ជាក់ថា គិតមកទល់ពេលនេះ ក្រៅពីសហគ្រាសផលិតឱសថ PPM ក្រុមហ៊ុន Confirel របស់លោកឧកញ៉ា ហៃ លីអ៊ាង ក៏មានផលិតផលិតផលជាច្រើនទៀត ដូចជា ស្ករត្នោតសរីរាង្គ តែម្រេចកំពត ជាច្រើនប្រភេទ និងស្រាដែលផលិតពីគ្រឿងផ្សំបែបធម្មជាតិជាដើម៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
