ក្រសួងកសិកម្ម ដាក់ផែនការបង្កើតសហគមន៍កសិកម្មទំនើបឱ្យបាន៥០ ដើម្បីជំរុញការអភិវឌ្ឍវិស័យកសិកម្ម

ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានបង្ហាញពីភាពជោគជ័យនៃការបង្កើតសហគមន៍កសិកម្មទំនើប ដោយបច្ចុប្បន្នមានសហគមន៍កសិកម្មទំនើបចំនួន២២ ត្រូវបានបង្កើតឡើងជាមួយសមាជិកសរុបប្រមាណ៣ពាន់គ្រួសារ ដោយអនុវត្តលើដំណាំ៤ប្រភេទ រួមមាន ស្វាយចន្ទី ស្រូវ ម្រេច និងបន្លែ។

ឯកឧត្តមរំពឹងថា ក្រសួងកសិកម្មនឹងអាចបង្កើតសហគន៍កសិកម្មទំនើបបានចំនួន៣០ នៅត្រឹមដំណាច់ឆ្នាំនេះ ខណៈក្រសួងដាក់គោលដៅបង្កើតសហគមន៍នេះឱ្យបាន៥០ នៅក្នុងរយៈពេលពី២ទៅ៣ឆ្នាំខាងមុខ។ បើតាមការអះអាងរបស់មន្ត្រីជាន់ខ្ពស់រូបនេះ សហគមន៍កសិកម្មទំនើបអាចជួយឱ្យកសិករទទួលបានផលចំណេញខ្ពស់តាមរយៈការជួយកាត់បន្ថយថ្លៃដើមផលិត ការទទួលបានទីផ្សារ និងការគាំទ្រផ្នែកបច្ចេកទេស និងការទទួលបានកម្ចីក្នុងអត្រាការប្រាក់ទាបជាដើម។

​គួរជម្រាបថា គោលបំណងនៃការបង្កើតសហគមន៍កសិកម្មទំនើប គឺដើម្បីប្រែក្លាយវិស័យកសិកម្មកម្ពុជា ពីលក្ខណៈគ្រួសារឱ្យទៅជាសហគ្រាសសេដ្ឋកិច្ចកសិកម្មដ៏រឹងមាំ និងមានសមត្ថភាពប្រកួតប្រជែងទាំងបរិមាណ តម្លៃ និងគុណភាព៕