លោកវេជ្ជបណ្ឌិត អូផាស ខានខាវីនផុង (Opas Karnkawinpong) អគ្គនាយកនៃអគ្គនាយកដ្ឋានគ្រប់គ្រងជំងឺថៃ បាននិយាយថា អ្នកជំងឺសរុបចំនួនជាង ១លាន៣សែននាក់បានទទួលរងជំងឺ ទាក់ទងនឹងការបំពុលបរិយាកាសក្នុងអំឡុងខែមករា កន្លងមក។
លោកបានអះអាងថា កម្រិតបំពុលបរិយាកាស PM2.5 ដែលជាកម្រិតភាគល្អិតតូចជាងអង្កត់ផ្ចិត ២,៥ មីក្រូក្រាម មានបរិមាណលើសពី ៥១ មីក្រូក្រាមក្នុងមួយម៉ែត្រគូបនៅខ្យល់កាលពីប៉ុន្មានថ្ងៃនៅក្នុងខែមករា ដែលកើតមាននៅក្នុងខេត្តក្រុងចំនួន ១៥ទូទាំងប្រទេស រួមទាំង៥០ ខណ្ឌនៅក្នុងទីក្រុងបាងកកផងនោះ គឺបានបង្កជាប្រភពជំងឺផ្សេងៗពិសេសជំងឺផ្លូវដង្ហើម។
លោកបានអះអាងថា កម្រិតធូលីនៅក្នុងខ្យល់ដែលមានបរិមាណលើសពី ៥០ មីក្រូក្រាមនៅក្នុងមួយម៉ែត្រគូប វាអាចបង្កជាជំងឺសួត និង បេះដូងរ៉ាំរ៉ៃបាន ។
ក្រៅពីខេត្តទាំង១៥នេះ កម្រិត PM2.5 នៅក្នុងបរិយាកាសលើសពីកម្រិតស្តង់ដារបស់អង្គការសុខភាពពិភពលោកក៏ត្រូវបានគេរកឃើញនៅខេត្តផ្សេងៗទៀតផងដែរកាលពីខែមករា កន្លងទៅ ។
ពាក់ព័ន្ធនឹងបញ្ហាបំពុលបរិយាកាសនេះ អគ្គនាយករដ្ឋគ្រប់គ្រងការបំពុលថៃ បានព្យាករណ៍ថា ស្ថានភាពនិងគុណភាពខ្យល់ នៅទីក្រុងបាងកកចាប់ពីថ្ងៃទី ០៩ ដល់ ថ្ងៃទី ១៤ ខែ មីនា នេះ ស្ថានភាពនិងគុណភាពខ្យល់គឺប្រសើរ ដោយសារតែទីក្រុងនេះបានទទួលឥទ្ធិពលខ្យល់ដែលបក់មកពី ភាគអាគ្នេយ៍ ប៉ុន្តែក្រោមឥទ្ធិពលខ្យល់នេះស្ថានភាពបំពុលនៅភាគខាងជើងប្រទេសអាចនឹងជួបស្ថានភាពកាន់តែអាក្រក់ ។
ប្រភពដដែលបានព្រមានថា ស្ថានភាពបំពុលបរិយាកាសទាំងនេះអាចនឹងបន្តអូសបន្លាចនៅក្នុងប្រទេសថៃប្រហែលជា ពី ពីរទៅបីសប្តាហ៍ទៀតឯណោះ ខណៈដែលអ្នកជំងឺដែលគេបាន កត់ត្រាថា បានធ្លាក់ខ្លួនឈឺដោយសារតែបញ្ហាបរិយាកាសនេះ គឺមានប្រមាណជា ១៧ម៉ឺននាក់នៅក្នុងមួយសប្តាហ៍ជាមធ្យម ហើយជំងឺដែលកើតមាន ដូចជាជំងឺភ្នែក រលាកស្បែក បេះដូង សួត និង ខួរក្បាលជាដើម៕
