អ្នកឧកញ៉ា ម៉ុង ឬទ្ធី អគ្គនាយកក្រុមហ៊ុន ម៉ុង ឬទ្ធី គ្រុប ដែលជាក្រុមហ៊ុនដាំដុះ និងនាំចេញដូងប្រេងតែមួយគត់នៅកម្ពុជាបានគូសបញ្ជាក់ថា គិតមកទល់ពេលនេះមានរយៈពេលជាង៣០ឆ្នាំហើយ ដែលក្រុមហ៊ុនខ្លួនបានសម្រេចចិត្តវិនិយោគលើដំណាំដូងប្រេងនៅកម្ពុជា ដោយបានចំណាយទុនវិនិយោគអស់ប្រមាណ១២០លានដុល្លារ។ ទោះបីជាចំណូលពីការនាំចេញដូងប្រេងមានទំហំធំគួរឱ្យកត់សម្គាល់ជារៀងរាល់ឆ្នាំក៏ពិតមែន ប៉ុន្តែបើធៀបនឹងការចំណាយលើការថែទាំ ដើមទុន និងពេលវេលា គឺនៅមិនទាន់អាចទូទាត់ឱ្យឃើញនូវប្រាក់ចំណេញនៅឡើយទេ។ នេះបើតាមការអះអាងរបស់អ្នកឧកញ៉ា ដែលបានសង្កត់ធ្ងន់ថា ទោះបីជាការវិនិយោគលើដំណាំដូងប្រេងត្រូវការចំណាយពេលវេលាយូរ និងដើមទុនច្រើនក៏ពិតមែន ប៉ុន្តែខ្លួននឹងមិនបោះបង់ចោលការវិនិយោគក្នុងវិស័យនេះឡើយ។
មហាសេដ្ឋីកសិកម្មរូបនេះបានគូសបញ្ជាក់ថា បច្ចុប្បន្នទិន្នផលដូងប្រេងរបស់ក្រុមហ៊ុនខ្លួនប្រមាណ៩៧%ត្រូវបាននាំចេញទៅប្រទេសឥណ្ឌា ខណៈ៣%ទៀត គឺប្រើប្រាស់សម្រាប់កែច្នៃធ្វើជាចំណីសត្វនៅក្នុងស្រុក។ បើតាមអ្នកឧកញ៉ា ម៉ុង ឬទ្ធី ដើម្បីអាចបង្កើតរោងចក្រផលិតប្រេងឆាចេញពីដូងប្រេងបាន កម្ពុជាត្រូវការផ្ទៃដីដាំដុះដូងប្រេងរហូតដល់ទំហំជាង៣ម៉ឺនហិកតា ខណៈបច្ចុប្បន្នចម្ការដូងប្រេងរបស់ក្រុមហ៊ុន ម៉ុង ឬទ្ធី គ្រុប មានទំហំផ្ទៃដីដាំដុះដូងប្រេងតែជាង១ម៉ឺន៦ពាន់ហិកតាប៉ុណ្ណោះ។
បើតាមការអះអាងរបស់អ្នកគ្រប់គ្រងចម្ការដូងប្រេងរបស់ក្រុមហ៊ុន ម៉ុង ឫទ្ធី គ្រុប នៅក្នុងឆ្នាំ២០២៥កន្លងទៅ ក្រុមហ៊ុននាំចេញដូងប្រេងបានសរុបជាង៤ម៉ឺន៨ពាន់តោន ដែលគិតជាតម្លៃទឹកប្រាក់ស្មើនឹងជាង៥៦លានដុល្លារសហរដ្ឋអាម៉េរិក៕
អត្ថបទ សោម ស្រីពេជ្រ និងរូបភាព ប៉ុក វន្ថា
