តើថៃអាចប្រឈមនឹងទណ្ឌកម្មអ្វីខ្លះ ប្រសិនបើលុប MoU ឆ្នាំ២០០០ ជាមួយកម្ពុជា?
រដ្ឋាភិបាលថៃក្រោមការដឹកនាំរបស់លោក អនុទីន ឆានវីរៈគុល គ្រោងធ្វើប្រជាមតិ ដើម្បីលុបអនុស្សរណៈនៃការយោគយល់គ្នាឆ្នាំ២០០០ ឬ MoU 2000 ដែលប្រទេសន…
ការបើកសម្ពោធកម្មវិធីហិរញ្ញវត្ថុរដូវកាលទី៣នេះ បានធ្វើឡើងកាលពីព្រឹកថ្ងៃទី៣០ កញ្ញា ២០២៥ ដោយមានការចូលរួមពីតំណាងធនាគារជាតិនៃកម្ពុជា ប្រធានសមាគមមីក្រូហិរញ្ញវត្ថុកម្ពុជា តំណាងសមាគមធនាគារនៅកម្ពុជា និងតំណាងធនាគារជាច្រើនទៀត។
លោកលឹម ឃុនស្រ៊ុន អគ្គនាយកប្រតិបត្តិនៃក្រុមហ៊ុន អប្សរា មេឌាសឺវីស បានមានប្រសាសន៍ថា កម្មវិធីវិថីហិរញ្ញវត្ថុ ត្រូវបានផ្ដួចផ្ដើម និងរៀបចំផលិតដោយក្រុមហ៊ុនអប្សរា មេឌា សឺវីស ( AMS ) ដោយចាប់ផ្ដើមដំបូងនៅឆ្នាំ ២០២៣ ក្រោមកិច្ចសហការយ៉ាងជិតស្និតជាមួយស្ថាប័នហិរញ្ញវត្ថុនៅកម្ពុជា ដូចជាសមាគមធនាគារនៅកម្ពុជា ( ABC) សមាគមមីក្រូហិរញ្ញវត្ថុកម្ពុជា ( CMA ) និងក្រុមហ៊ុនស៊ីប៊ីស៊ី ព្រមទាំងមានការទទួលស្គាល់ជាផ្លូវការដោយធនាគារជាតិនៃកម្ពុជាផងដែរ ។
លោកបន្ថែមថា តាមរយៈភាពជោគជ័យនៃកម្មវិធី វិថីហិរញ្ញវត្ថុ រដូវកាលទី១និងទី២ ទទួលបានការគាំទ្រយ៉ាងច្រើនពីសំណាក់ទស្សនិកជន បានជំរុញឱ្យក្រុមហ៊ុន អប្សរា មេឌាសឺវីស និងស្ថាប័នជាដៃគូ សម្រេចបន្ដផលិតកម្មវិធី វិថីហិរញ្ញវត្ថុរដូវកាលទី៣បន្ដទៀត។
លោក ឃុនស្រ៊ុន គូសបញ្ជាក់ទៀតថា កម្មវិធីនេះ គឺប្រមូលផ្ដុំតួអង្គសំខាន់ៗក្នុងវិស័យហិរញ្ញវត្ថុ ទាំងស្ថាប័នឯកជន និងស្ថាប័នរដ្ឋ ដើម្បីរួមគ្នាជំរុញ និងបញ្ជ្រាបការយល់ដឹងផ្នែកហិរញ្ញវត្ថុដល់ប្រជាជនទូទាំងប្រទេសកម្ពុជា តាមរយៈយុទ្ធនាការផ្សព្វផ្សាយយ៉ាងទូលំទូលាយ នៅលើបណ្ដាញព័ត៌មាន AMS ដោយប្រើប្រាស់បណ្ដាញសង្គម FB , Tik Tok , Youtube , Website រួមទាំងប្រព័ន្ធវិទ្យុ FM97, FM99 និងទូរទស្សន៍អប្សរាផងដែរ ។
ក្នុងរដូវកាលទី៣ កម្មវិធីវិថីហិរញ្ញវត្ថុ នឹងពង្រីកកិច្ចពិភាក្សាទៅលើប្រធានបទមួយចំនួនបន្ថែមទៀតដូចជា ការរៀបចំផែនការហិរញ្ញវត្ថុរបស់បុគ្គល និងគ្រួសារ ការគិតគូរអំពីសេវាធានារ៉ាប់រង ដើម្បីរក្សាសុវត្ថិភាពហិរញ្ញវត្ថុគ្រួសារ ការកសាងប្រវត្តិឥណទានផ្ទាល់ខ្លួនជាដើម ។
លោកស្រី ម៉ក់ រស្ម៊ី អគ្គនាយករងបទប្បញ្ញត្តិ និង បរិយាបន្នហិរញ្ញវត្ថុ និងជាប្រធាននាយកដ្ឋានបទប្បញ្ញត្តិ បានមានប្រសាសន៍ថា បរិយាបន្នហិរញ្ញវត្ថុ បានដើរតួនាទីយ៉ាងសំខាន់ក្នុងការអភិវឌ្ឍសេដ្ឋកិច្ចនិងសង្គម។ ការទទួលបាន និងប្រើប្រាស់សេវាហិរញ្ញវត្ថុផ្លូវការទាន់ពេលវេលា មានតម្លៃសមរម្យ និងមានកិច្ចការពារតាមផ្លូវច្បាប់ត្រឹមត្រូវ បានចូលរួមជំរុញកំណើនសេដ្ឋកិច្ចគ្រួសារ និងកាត់បន្ថយភាពក្រីក្រ តាមរយៈការផ្សារភ្ជាប់ ប្រជាពលរដ្ឋជាមួយសកម្មភាពសេដ្ឋកិច្ច ការត្រៀមខ្លួនចំពោះការចំណាយមិនបានត្រៀមទុក ការទទួលបានការអប់រំប្រសើរជាងមុន ការការពារខ្លួនពីការឆបោកឬការក្លែងបន្លំ និងការកាត់បន្ថយវិសមភាពយេនឌ័រ។ ឧបសគ្គចម្បងមួយក្នុងចំណោមឧបសគ្គជាច្រើន ដែលបាននិងកំពុងរារាំងបរិយាបន្នហិរញ្ញវត្ថុនៅកម្ពុជា គឺកម្រិតទាបនៃចំណេះដឹងផ្នែកហិរញ្ញវត្ថុរបស់ប្រជាពលរដ្ឋទូទៅ។
យ៉ាងណាក៏ដោយចុះ លោកស្រី ម៉ក់ រស្ម៊ី មើលឃើញថា បញ្ហាកម្ចីក្រៅផ្លូវការ ការក្លែងបន្លំ និងការឆបោកផ្នែកហិរញ្ញវត្ថុ បាននិងកំពុងកើនមានឡើងតាមរូបភាពផ្សេងៗជាច្រើន ដែលនេះសរបញ្ជាក់ឱ្យឃើញថាការផ្សព្វផ្សាយ និងលើកកម្ពស់ចំណេះដឹងផ្នែកហិរញ្ញវត្ថុរបស់យើងនៅមានកម្រិតនៅឡើយ ហើយយើងនៅការងារជាច្រើនទៀត ដែលត្រូវបន្តអនុវត្តរួមគ្នា។
ក្នុងន័យនេះ វត្តមាននៃកម្មវិធី “វិថីហិរញ្ញវត្ថុ” ដែលផ្តួចផ្តើមការផលិតដោយ ក្រុមហ៊ុន អប្សរា មេឌា សឺវីស ក្រោមការគាំទ្រពីសមាគមធនាគារនៅកម្ពុជា សមាគមមីក្រូហិរញ្ញវត្ថុកម្ពុជា និងក្រុមហ៊ុន ក្រេឌីត ប្យួរ៉ូ (ខេមបូឌា) ខូអិលធីឌី នៅគ្រប់រដូវកាល ពិតជាមានសារៈសំខាន់ក្នុងការចូលរួមលើកកម្ពស់ចំណេះដឹងផ្នែកហិរញ្ញវត្ថុជូនប្រជាពលរដ្ឋបានកាន់តែទូលំទូលាយ។
លោកស្រីជឿជាក់យ៉ាងមុតមាំថា កម្មវិធី “វិថីហិរញ្ញវត្ថុ រដូវកាលទី៣” នឹងក្លាយជាមធ្យោបាយផ្សព្វផ្សាយតាមបែបឌីជីថលដែលមានប្រសិទ្ធភាព ព្រមទាំងនឹងចូលរួមពង្រីកវិសាលភាពនៃការចែករំលែកចំណេះដឹង បទពិសោធន៍ និងសុវត្ថិភាពពាក់ព័ន្ធនឹងការប្រើប្រាស់សេវាហិរញ្ញវត្ថុទៅកាន់ប្រជាពលរដ្ឋគ្រប់ស្រទាប់វណ្ណៈ ៕
