ដោយឡែក ប្រធានាធិបតីអាមេរិកលោក ចូ បៃឌិន ឯណោះវិញ បាននិយាយនៅថ្ងៃទី៩ ឧសភាដែរថា លោកមានក្ដីបារម្ភថា លោកពូទីន មិនមានវិធីសាស្ត្រដើម្បីចាកចេញពីសង្គ្រាមនៅអ៊ុយក្រែននោះទេ។ នេះបើតាមការចុះផ្សាយដោយសារព័ត៌មានរ៉យទ័រ។
ក្រុមប្រទេសលោកខាងលិចមួយចំនួនបានប៉ាន់ស្មានដោយបើកចំហជាច្រើនសប្តាហ៍នៅមុនពេលការរៀបចំព្រឹត្តិការព្យុហយាត្រានៅទីក្រុងមូស្គូនេះ ដោយពួកគេរំពឹងទុកមុនថា លោក ពូទីន នឹងជំរុញឱ្យកងកម្លាំងរបស់លោកសម្រេចបាននូវវឌ្ឍនភាព ដោយដណ្ដើមជ័យជំនះនៅក្នុងសង្គ្រាមនៅអ៊ុយក្រែនឲ្យបានត្រឹមថ្ងៃទី៩ឧសភា ដែលជាថ្ងៃខួបទិវាជ័យជំនះដ៏សំខាន់របស់ប្រជាជាតិរុស្ស៊ី។ ប៉ុន្តែដោយហេតុថា មានការរីកចម្រើននៃជ័យជំនះនៅក្នុងសង្គ្រាមនេះតិចតួចពេក ទើបលោក ពូទីន គ្រាន់តែអំពាវនាវឱ្យទាហានខំតស៊ូប្រយុទ្ធប៉ុណ្ណោះ ប៉ុន្ដែ រុស្ស៊ីមិនបានប្រកាសសង្គ្រាមផ្លូវការជាមួយអ៊ុយក្រែន ឬប្រកាសពីការពង្រីកការធ្វើសង្គ្រាមបន្ថែមកាន់តែធំនោះដែរ។
ប្រធានាធិបតីរុស្ស៊ី បានអះអាងជារឿយៗថា កងកម្លាំងរបស់លោកកំពុងប្រយុទ្ធប្រឆាំងនឹងពួកណាស៊ីម្តងទៀតដោយបញ្ជាក់ថា កងទ័ពរុស្ស៊ីកំពុងប្រយុទ្ធដើម្បីមាតុភូមិ និងដើម្បីអនាគតរុស្ស៊ី ដើម្បីកុំឱ្យនរណាម្នាក់ភ្លេចមេរៀនពីសង្គ្រាមលោកលើកទី២ និងដើម្បីកម្ទេចជម្រករបស់ពួកឃាតករ និងពួកណាស៊ីចេញពីពិភពលោក។
អត្ថបទគួរអាន
នៅទីក្រុងវ៉ាស៊ីនតោនឯណោះវិញ ប្រភពជាច្រើននិយាយថា សមាជិកសភាអាមេរិកបានយល់ព្រមលើសំណើសុំជំនួយចំនួន ៤០ ពាន់លានដុល្លារសម្រាប់អ៊ុយក្រែនរួមទាំងកញ្ចប់សព្វាវុធថ្មីដ៏ច្រើន។ ដោយឡែក ប្រធានាធិបតីអាមេរិកលោក Joe Biden បាននិយាយដែរថា លោកព្រួយបារម្ភថាលោក ពូទីន មិនមានផ្លូវចេញពីសង្គ្រាមនោះទេ ខណៈរូបលោកកំពុងព្យាយាមកំណត់ឱ្យច្បាស់ នូវអ្វីដែលត្រូវធ្វើចំពោះរឿងនេះ។
លោក Biden បាននិយាយថា លោក ពូទីន បានយល់ច្រឡំខុសទាំងស្រុងថា ការឈ្លានពានអ៊ុយក្រែននឹងបំបែកបំបាក់អង្គការយោធាណាតូ និងបំបែកសហភាពអឺរ៉ុបផងដែរ ប៉ុន្តែផ្ទុយទៅវិញ សហរដ្ឋអាមេរិក និងប្រទេសអឺរ៉ុបជាច្រើនបានរួបរួមគ្នាគាំទ្រអ៊ុយក្រែនកាន់តែខ្លាំងឡើង។
យ៉ាងណាមិញ ចំពោះស្ថានភាពនៅប្រទេសអ៊ុយក្រែនវិញ ការប្រយុទ្ធគ្នានៅតែបន្តមានឥតឈប់ឈរដោយការវាយប្រហារមីស៊ីលបានបំផ្លាញអគារនានានៅកំពង់ផែភាគខាងត្បូងនៃទីក្រុង Odesa និងបានសម្រុកចូលជាថ្មីរបស់កងកម្លាំងរុស្ស៊ី ដើម្បីកម្ចាត់កងទ័ពអ៊ុយក្រែនចុងក្រោយ ដែលបានកាន់កាប់នៅតំបន់ផលិតដែកថែបនៅក្នុងទីក្រុង Mariupol ដែលត្រូវបានបំផ្លាញស្ទើរខ្ទេចខ្ទី។
ទោះយ៉ាងណា ប្រធានាធិបតីអ៊ុយក្រែនលោក Volodymyr Zelenskiy បាននិយាយនៅក្នុងសុន្ទរកថាផ្ទាល់ខ្លួនដោយសន្យាថា អ៊ុយក្រែននឹងឈ្នះសង្គ្រាមនេះ។ លោកហ្សេលេស្គី បានបញ្ជាក់ថា នៅថ្ងៃរំលឹកទិវាជ័យជម្នះលើពួកណាស៊ីនេះ អ៊ុយក្រែនកំពុងប្រយុទ្ធដើម្បីជ័យជម្នះថ្មី ហើយផ្លូវទៅរកជ័យជម្នះ គឺពិបាកបន្តិចហើយ ប៉ុន្តែ អ៊ុយក្រែនពិតជានឹងឈ្នះសង្គ្រាមនេះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
