ជំរុញកំណើនលើទីផ្សារដែលមានស្រាប់ និង ទីផ្សារថ្មីៗ
ចាប់តាំងពីការបោះជំហានចូលអាស៊ីដំបូងក្នុងឆ្នាំ២០០៩ ឌឹហឺស្ស បានកសាងកេរ្តិ៍ឈ្មោះដ៏រឹងមាំនៅទូទាំងទ្វីប រួមទាំងការរីកចម្រើនយ៉ាងរហ័សនៅកម្ពុជា។ ការទិញយកក្រុមហ៊ុន ស៊ីជេ ជេលជីដាង ហ្វីដ នឹងពង្រឹងជំហរទីផ្សារនៅក្នុងប្រទេសវៀតណាម ឥណ្ឌូនេស៊ី និងកម្ពុជា ស្របពេលដែលឈានជើងចូលទៅកាន់ទីផ្សារផ្ទាល់នៅកូរ៉េខាងត្បូង និងហ្វីលីពីន ដែលជាប្រទេសមានសារៈសំខាន់ជាយុទ្ធសាស្រ្តជាមួយកំណើនសក្តានុពលគួរឱ្យកត់សម្គាល់ក្នុងខ្សែច្រវាក់ផលិតកម្មចំណីសត្វ។
ពង្រឹងខ្សែច្រវាក់តម្លៃបសុសត្វ និងវារីវប្បកម្មក្នុងស្រុក
ឌឹហឺស្ស មានវត្តមាននៅក្នុងប្រទេសកម្ពុជាតាំងពីឆ្នាំ២០១១ ហើយក្នុងឆ្នាំ២០២០ តាមរយៈការបណ្តាក់ទុនរួម បានក្លាយខ្លួនជា ឌឹហឺស្ស ធីអិមអេច។ ការប្តេជ្ញាចិត្តរបស់ ឌឹហឺស្ស ធីអិមអេច នៅរក្សាដដែលក្នុងការក្លាយជាកម្លាំងជំរុញដល់ភាពជោគជ័យ និងការអភិវឌ្ឍរបស់កសិករឯករាជ្យនៅកម្ពុជា។ ការទិញយកនេះបង្កើនលទ្ធភាពទទួលបាននូវ ចំណីគុណភាពខ្ពស់ ពូជសត្វល្អៗដូចជាកូនជ្រូក និងការគាំទ្របច្ចេកទេសចិញ្ចឹមដល់កសិករ ស្របជាមួយការរួមចំណែកយ៉ាងសកម្មដល់វឌ្ឍនភាពវិស័យចិញ្ចឹមសត្វ និងវារីវប្បកម្មនៅកម្ពុជាប្រកបដោយភាពរឹងមាំ និងប្រកួតប្រជែង។
លោក Gabor Fluit ដែលជានាយកប្រតិបត្តិ (CEO) ក្រុមហ៊ុន រ៉ូយ៉ាល់ ឌឹហឺស្ស មានប្រសាសន៍ថា៖ “យើងខ្ញុំពិតជារីករាយដែលបានចុះហត្ថលេខាលើកិច្ចព្រមព្រៀងទិញភាគហ៊ុននេះ។ ការទិញយកនេះជាជំហានដ៏សំខាន់មួយក្នុងការពង្រឹងកេរ្តិ៍ឈ្មោះរបស់យើងនៅទូទាំងទ្វីបអាស៊ី។ តាមរយៈការរួមបញ្ចូលគ្នានូវជំនាញរបស់យើងលើចំណីសត្វ ការគ្រប់គ្រងកសិដ្ឋាន និងសុខភាពសត្វ ជាមួយនឹងវត្តមានដ៏រឹងមាំរបស់ ស៊ីជេ ជេលជីដាង ហ្វីដ យើងអាចបង្កើតគុណតម្លៃកាន់តែខ្ពស់សម្រាប់អតិថិជន ដៃគូ និងវិស័យទាំងមូល។ រួមគ្នា យើងនឹងបន្តជ្រោមជ្រែងដល់កសិករឯករាជ្យ និងរួមចំណែកដល់ប្រព័ន្ធស្បៀងអាហារប្រកបដោយភាពធន់ និងចីរភាពសម្រាប់មនុស្សជំនាន់ក្រោយ។”
លោក Harry Schimmel នាយកប្រតិបត្តិ ឌឹហឺស្ស ធីអិមអេច មានប្រសាសន៍បន្ថែមថា: “ យើងខ្ញុំពិតជាមានសេចក្តីសោមនស្សរីករាយប្រកាសអំពីកិច្ចព្រមព្រៀងទិញភាគហ៊ុននេះ។ ការទិញយកនេះផ្ដល់ឱ្យយើងខ្ញុំនូវឱកាស ដើម្បីបន្តពង្រឹងកេរ្តិ៍ឈ្មោះរបស់យើងនៅក្នុងប្រទេសកម្ពុជា។ ចាប់តាំងពីការមានវត្តមានរបស់យើងនៅកម្ពុជាមក ក្រុមហ៊ុន ឌឹហឺស្ស ធីអិមអេច បានកសាងទំនាក់ទំនងដ៏រឹងមាំជាមួយកសិករចិញ្ចឹមសត្វ និងវារីវប្បករកម្ពុជាតាមរយៈការផ្គត់ផ្គង់ចំណីសត្វ ពូជសត្វ និងជំនួយបច្ចេកទេសដែលមានគុណភាពល្អបំផុត។ តាមរយៈការទិញយកក្រុមហ៊ុន ស៊ីជេ ជេលជីដាង ហ្វីដ (ខេមបូឌា) រួមជាមួយនឹងជំនាញ និងយុទ្ធសាស្ត្ររបស់យើងក្នុងការអភិវឌ្ឍន៍កសិករចិញ្ចឹមសត្វឯករាជ្យនៅកម្ពុជា យើងនឹងអាចបម្រើដល់តម្រូវការកសិករបានកាន់តែប្រសើរឡើង និងរួមចំណែកជាមួយពួកគាត់ទៅរកខ្សែសង្វាក់ផ្គត់ផ្គង់ក្នុងស្រុកដែលកាន់តែរឹងមាំ”។
ថ្លែងក្នុងឱកាសនេះ លោក ចាន់ គឹមរិទ្ធី ដែលជាភាគទុនិកក្រុមហ៊ុន ឌឹហឺស្ស ធីអិមអេច មានប្រសាសន៍ថា៖ “យុទ្ធសាស្ត្រទិញយកនេះ ជាភស្តុតាងនៃការប្តេជ្ញារយៈពេលវែងរបស់ក្រុមហ៊ុន ឌឹហឺស្ស ធីអិមអេច ក្នុងការគាំទ្រកសិករឯករាជ្យយើងនៅកម្ពុជា។ ចក្ខុវិស័យរបស់យើងស្របនឹងជាមួយរាជរដ្ឋាភិបាល ‘យុទ្ធសាស្តបញ្ចកោណ តំណាក់កាលទី១៖ កសាងមូលដ្ឋានដើម្បីអភិវឌ្ឍឱ្យសម្រេចចក្ខុវិស័យកម្ពុជាឆ្នាំ ២០៥០’។
ក្នុងនាមជាសហគ្រិនម្នាក់ ខ្ញុំមានសុទិដ្ឋិនិយមខ្ពស់លើចក្ខុវិស័យជាតិនេះ និងជឿជាក់លើសក្ដានុពលនៃវិស័យកសិកម្មរបស់ប្រទេសយើង ដែលកំពុងមានការលូតលាស់យ៉ាងកត់សំគាល់។ ខ្ញុំមានមោទនភាពយ៉ាងខ្លាំងដែលអាចចូលរួមចំណែកក្នុងបេសកកម្មដ៏មានអត្ថន័យនេះ ដោយធានានូវការផ្គត់ផ្គង់ផលិតផលអាហារចាំបាច់ជាមូលដ្ឋានជូនប្រជាពលរដ្ឋរួមជាតិ និងរួមសហការជាមួយរាជរដ្ឋាភិបាលក្នុងការស្ថាបនាប្រទេសជាតិឱ្យកាន់តែរឹងមាំ និងមានភាពធន់។
ឈរលើស្មារតី ‘ខ្មែរធ្វើបាន’ ខ្ញុំសូមឲ្យឃ្លានេះបន្តជាចក្ខុវិស័យ និងជាកម្លាំងចិត្តដ៏រឹងមាំនៃយើងក្នុងការកសាងអនាគតដ៏រុងរឿងសម្រាប់ប្រទេសកម្ពុជា។ រួមគ្នាខ្មែរអាចធ្វើបាន! ៉
ដោយរង់ចាំការអនុម័តបទប្បញ្ញត្តិ ប្រតិបត្តិការនេះត្រូវបានរំពឹងថា នឹងបញ្ចប់នៅក្នុងឆមាសដំបូងនៃឆ្នាំ២០២៦៕
សូមបញ្ជាក់ថា ក្រុមហ៊ុន De Heus Animal Nutrition ដែលត្រូវបានបង្កើតឡើងក្នុងឆ្នាំ១៩១១ ហើយនៅតែគ្រប់គ្រង និងដឹកនាំដោយគ្រួសារ De Heus ហើយ បានក្លាយជាដៃគូដែលអាចទុកចិត្តបានក្នុងវិស័យអាហារូបត្ថម្ភសត្វអស់រយៈពេលបួនជំនាន់មកហើយ។ ក្រុមហ៊ុន ឌឹហឺស្ស មានវត្តមាននៅក្នុងប្រទេសកម្ពុជាតាំងពីឆ្នាំ២០១១ ហើយចាប់តាំងពីឆ្នាំ២០២០ មកតាមរយៈក្រុមហ៊ុនបុត្រសម្ព័ន្ធបណ្ដាក់ទុនរួមគ្នា ក៏បានក្លាយខ្លួនទៅ ឌឹហឺស្ស ធីអិមអេច។ ក្រុមហ៊ុន ឌឹហឺស្ស ធីអិមអេច មានផ្គត់ផ្គង់ចំណីសម្រេច និងមេចំណី ដែលមានគុណភាពខ្ពស់ ដោយផ្ដល់ដំណោះស្រាយគ្រប់ជ្រុងជ្រោយលើអាហារូបត្ថម្ភសត្វ ការគាំទ្រផ្នែកបច្ចេកទេស និងកម្មវិធីគ្រប់គ្រងកសិដ្ឋាន។ ក្នុងរយៈពេលជាច្រើនឆ្នាំ កន្លងមក ក្រុមហ៊ុនបានរីកចម្រើនក្លាយជាក្រុមហ៊ុនអាហារូបត្ថម្ភសត្វឈានមុខគេមួយក្នុងពិភពលោក ដែលមានប្រតិបត្តិការនៅក្នុងជាង ២០ ប្រទេស រោងចក្រផលិតជាង ៩០ កន្លែងនៅទូទាំងទ្វីបអឺរ៉ុប អាស៊ី អាហ្វ្រិក និងអាមេរិកខាងត្បូង និងនាំចេញទៅកាន់ជាង ៧០ ប្រទេស។
