ចូលដល់ខែមករាឆ្នាំនេះ តម្លៃជ័រកៅស៊ូក្រែប ចាប់ផ្ដើមរអិលធ្លាក់ចុះតម្លៃ!

តម្លៃជ័រកៅស៊ូក្រែប នៅដើមឆ្នាំ២០១៨ នេះ ហាក់បីដូចជាបង្ហាញនូវសញ្ញាធ្លាក់ចុះគួរឲ្យកត់សម្គាល់ បើធៀបនឹងតម្លៃកៅស៊ូកាលពីឆ្នាំដើមមុន។ ជាក់ស្តែង នៅក្នុងខែមករា ដើមឆ្នាំ ២០១៨នេះ តម្លៃជ័រកៅស៊ូក្រែប មានជាមធ្យមប្រមាណជាង ១,៤០០ ដុល្លារអាមេរិកតែប៉ុណ្ណោះ តម្លៃនេះបានធ្លាក់ចុះប្រមាណជាង៤០០ ដុល្លារអាមេរិក ធៀបនឹងអំឡុងពេលដូចគ្នាកាលពី ឆ្នាំ ២០១៧ កន្លងទៅ ដែលមានជិត២០០០ដុល្លារអាមេរិក ក្នុងមួយតោន។ នេះបើតាមរបាយការណ៍ថ្មីចុងក្រោយមួយ ពីអគ្គនាយកដ្ឋានកៅស៊ូ ដែលបានចេញផ្សាយកាលពីពេលថ្មីៗនេះ។

ឧកញ៉ា ម៉ុង ឫទ្ធី ចុះពិនិត្យមើលសកម្មភាពចៀរជ័រកៅស៊ូ នៅចម្ការរបស់លោក។ រូបភាពពី ហ្វេសប៊ុក

ការនំាចេញជ័រកៅស៊ូ ក្នុងខែមករា មានចំនួនជាង ១,៨ ម៉ឺនតោន កើនឡើងជាង ៤,៥ ពាន់តោន ពោលមានកំណើន ៣២% បើធៀបនឹងរយៈពេលដូចគ្នាកាលពីឆ្នាំមុន។ ដ្បិតថា បរិមាណបញ្ចេញលក់ជ័រកៅស៊ូកើនឡើងក៏ពិតមែន ក៏ប៉ុន្ដែ និយាយពីតម្លៃវិញហាក់រអិលធ្លាក់ចុះ គឺតម្លៃជ័រកៅស៊ូជាមធ្យម ដែលបានលក់នៅក្នុងខែមករាឆ្នាំនេះ មានត្រឹមតែ ១៤៤០ដុល្លារអាមេរិកប៉ុណ្ណោះ ក្នុងមួយតោន ខណៈដែលកាលពីខែមករាឆ្នាំ២០១៧កន្លងទៅ មានតម្លៃជិត ២០០០ដុល្លារអាមេរិក ក្នុងមួយតោន ពោលគឺមានការធ្លាក់ចុះជាង៤៦០ដុល្លារ។

ដោយឡែក តម្លៃជ័រកៅស៊ូនៅប៉ុន្មានខែចុងក្រោយក្នុងឆ្នាំ២០១៧កន្លងទៅ ក៏មានតម្លៃប្រហាក់ប្រហែលគ្នាទៅនឹងតម្លៃកៅស៊ូក្នុងខែមករាឆ្នាំនេះផងដែរ ដែលមានតម្លៃក្នុងរង្វង់ជាង១,៤០០ដុល្លារអាមេរិក។

សូមជម្រាបថា រយៈពេលពេញ១ឆ្នាំ២០១៧ កន្លងទៅ កម្ពុជាបានបញ្ចេញលក់ជ័រកៅស៊ូបានប្រមាណជាង ១៨,៨ ម៉ឺនតោន កើនឡើងជាង៤ម៉ឺនតោន ធៀបនឹងឆ្នាំមុន ខណៈដែលតម្លៃលក់ជ័រកៅស៊ូជាមធ្យមក្នុងឆ្នាំ២០១៧ មានជាង ១,៥៨៦ ដុល្លារអាមេរិក ក្នុង១តោន កើនឡើងប្រមាណ៣០០ដុល្លារអាមេរិក ឬស្មើនឹង២៤% ធៀបនឹងឆ្នាំមុន។

ជាមួយគ្នានេះដែរ បើគិតមកទល់បច្ចុប្បន្ន ផ្ទៃដីដាំដុះកៅស៊ូសរុបមានចំនួនជាង៤៣ម៉ឺនហិកតា ដែលក្នុងនោះ ផ្ទៃដីដែលអាចៀរជ័រកៅស៊ូបាន មានចំនួនជាង ១៧ម៉ឺនហិកតា និងផ្ទៃដីកៅស៊ូកំពុងថែទាំមានជាង ២៦ម៉ឺនហិកតា៕