ការពន្លឿនការបោះផ្សាយមូលបត្ររដ្ឋរបស់ចិននេះ នៅគ្រាដែល អ្នករៀបចំគោលនយោបាយរបស់ចិន កំពុងស្វែងរកការគាំទ្រដល់ការស្ទុះងើបឡើងវិញនៃកំណើនសេដ្ឋកិច្ចចិន បន្ទាប់ពីប្រទេសមហាយក្សសេដ្ឋកិច្ចលំដាប់ទី២ក្នុងពិភពលោកមួយនេះ ត្រូវបានគេរាយការណ៍ថា មានកំណើនសេដ្ឋកិច្ចថមថយចុះខ្លាំងនៅត្រីមាសទី៣ឆ្នាំ២០២១ ដែលជាកំណើនមួយយឺតបំផុតនៅក្នុងឆ្នាំនេះ ដោយសារតែបញ្ហាកង្វះខាតថាមពល និង ភាពច្របូកច្របល់នៅក្នុងវិស័យអចលនទ្រព្យនៅក្នុងប្រទេស។ នេះបើតាមការចុះផ្សាយដោយសារព័ត៌មាន South China Morning Post។
រដ្ឋាភិបាលចិនបានបោះផ្សាយលក់មូលបត្របំណុលរដ្ឋពិសេសរបស់ខ្លួន នៅក្នុងទំហំទឹកប្រាក់ជិត ៣៥០ពាន់លានដុល្លារអាមេរិករួចហើយនៅ៩ខែឆ្នាំ២០២១នេះ ដែលមានប្រហែល ៦១% នៃកូតាបោះផ្សាយសរុបប្រចាំឆ្នាំ។ នេះបើតាមការអះអាងរបស់លោក Li Dawei មន្ត្រីក្រសួងហិរញ្ញវត្ថុរបស់ចិន។
មន្ត្រីក្រសួងហិរញ្ញវត្ថុចិនដដែលនេះ បានគូសបញ្ជាក់ទៀតថា ការបោះផ្សាយលក់មូលបត្រ គឺមានការធ្វើឡើងយ៉ាងលឿនតាំងពីខែសីហាមកម្ល៉េះ ហើយរដ្ឋាភិបាលចិន នឹងខិតខំធ្វើយ៉ាងណាសម្រេចឲ្យបានគ្រប់កូតាបោះផ្សាយមូលបត្របំណុលនៅឆ្នាំ២០២១នេះ នៅត្រឹមចុងខែវិច្ឆិកាខាងមុខ ដើម្បីយកប្រភពហិរញ្ញវត្ថុដែលបានពីការបោះផ្សាយមូលបត្របំណុលរដ្ឋពិសេសនេះ ទៅប្រើប្រាស់ក្នុងការអភិវឌ្ឍសេដ្ឋកិច្ច និងសង្គម។
សូមបញ្ជាក់ថា ប្រទេសចិនបានកំណត់កូតា បោះផ្សាយមូលបត្របំណុលរដ្ឋពិសេសរបស់ខ្លួនក្នុងតម្លៃសរុបជាង ៥៧០ ពាន់លានដុល្លារអាមេរិក ដែលភាគច្រើនផ្ដល់មូលនិធិដល់គម្រោងហេដ្ឋារចនាសម្ព័ន្ធ។ ៩ខែឆ្នាំនេះ ចិនសម្រេចបានការបោះផ្សាយមូលបត្របំណុលរដ្ឋបានជិត ៣៥០ពាន់លានដុល្លារអាមេរិកហើយ ដូច្នេះ នៅសល់ប្រមាណជាង ២២៤ពាន់លានដុល្លារអាមេរិកទៀត ដែលរដ្ឋាភិបាលចិនត្រូវបន្ដពន្លឿនការបោះផ្សាយឲ្យបានសម្រេចរួចរាល់នៅត្រឹមចុងខែវិច្ឆិកាខាងមុខនេះ។
អត្ថបទគួរអាន
មានប្រហែលពាក់កណ្ដាលនៃមូលនិធិដែលប្រមូលបានពីការបោះផ្សាយមូលបត្រពិសេសរបស់រដ្ឋ ក្នុងអំឡុងខែមករាដល់ខែកញ្ញាកន្លងទៅនេះ ត្រូវបានប្រើប្រាស់ទៅលើការអភិវឌ្ឍវិស័យដឹកជញ្ជូន ហេដ្ឋារចនាសម្ព័ន្ធទីក្រុង និងឧស្សាហកម្មអចលនទ្រព្យ និងមូលនិធិនៅសល់ផ្សេងទៀត គឺប្រើទៅលើការអភិវឌ្ឍគម្រោងលំនៅដ្ឋានតម្លៃសមរម្យ វិស័យអប់រំ និងការថែទាំសុខភាពពលរដ្ឋជាដើម។
បើមើលទៅលើចំណូលសារពើពន្ធរបស់ចិនវិញនៅ៩ខែដំបូងឆ្នាំ២០២១ សម្រេចបានប្រមាណ ២,៦ទ្រីលានដុល្លារអាមេរិក បានកើនឡើងជាង១៦% ធៀបនឹងរយៈពេលដូចគ្នាកាលពីឆ្នាំមុន ខណៈដែលចំណាយសារពើរពន្ធវិញ មានជាង២,៨ទ្រីលានដុល្លារអាមេរិក បានកើនឡើង ២,៣%។
គួរបញ្ជាក់ដែរថាបើតាមការព្យាករថ្មីចុងក្រោយមួយពីអង្គការមូលនិធិរូបិយវត្ថុអន្តរជាតិ IMF កំណើនសេដ្ឋកិច្ចចិននឹងកើនឡើងត្រឹម ៨% គឺទាបជាងអ្វីដែលបានព្យាករកាលពីខែកក្កដាកន្លងទៅ ដែលថានឹងកើនដល់ ៨,១%៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
