នាទិវាមច្ឆជាតិ ១ កក្កដា កន្លងទៅសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានគូសបញ្ជាក់ថា នៅក្នុងខែមិថុនា កន្លងទៅ រដ្ឋទទួលបានចំណូលពីអគ្គនាយកដ្ឋានពន្ធដារ និងអគ្គនាយកដ្ឋានគយ និងរដ្ឋាករសរុបជិត៥០០លានដុល្លារអាមេរិក។ សម្តេចអះអាងថា ចំនួននេះមានការកើនឡើងបន្តិចវិញហើយ បើធៀបនឹងចំណូលដែលប្រមូលបានកាលពីអំឡុងវិបត្តិកូវីដ-១៩ ដែលមានត្រឹមតែ៤០០លានដុល្លារ ឬក្រោមនេះ។ ប៉ុន្តែចំនួននេះនៅមានកម្រិតទាបនៅឡើយ បើធៀបនឹងចំណូលពេលកម្ពុជាមិនទាន់ទទួលរងនូវការឆ្លងរាតត្បាតនៃជំងឺកូវិដ-១៩ ដោយកាលណោះក្នុង១ខែរដ្ឋអាចទទួលបានចំណូលចន្លោះពី៥០០ទៅ៧០០លានដុល្លារអាមេរិក។ ទោះបីចំណូលរដ្ឋចាប់ផ្តើមល្អប្រសើរឡើងវិញក៏ដោយ តែរដ្ឋនៅមានតែមានការប្រុងប្រយ័ត្នខ្ពស់សម្រាប់ការប្រើប្រាស់ថវិកា។
ពាក់ព័ន្ធចំណូលរបស់រដ្ឋមានការកើនឡើងនេះ លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជាយល់ឃើញថា ភាពល្អប្រសើរនៃការប្រមូលចំណូលរបស់រដ្ឋនេះ គឺវាបានបង្ហាញពីការវិលត្រឡប់មករកភាពល្អប្រសើរឡើងវិញ នៃសេដ្ឋកិច្ចកម្ពុជា ក្រោយរាជរដ្ឋាភិបាលបានបើកសកម្មភាពសង្គម និងសេដ្ឋកិច្ចលើគ្រប់វិស័យឡើងវិញកាលពីអំឡុងខែវិច្ឆិកា ឆ្នាំ២០២១។ បន្ថែលលើនេះ វាក៏បានបង្ហាញពីភាពល្អប្រសើរនៃការអនុវត្តក្នុងការប្រមូលចំណូលរបស់អគ្គនាយកដ្ឋានពន្ធដារ និងអគ្គនាយកដ្ឋានគយ និងរដ្ឋាករផងដែរ។ អ្នកជំនាញរូបនេះជឿជាក់ថា ចំណូលរបស់រដ្ឋនឹងបន្តកើនឡើងបន្ថែមនាពេលខាងមុខ ប្រសិនស្ថានភាពទេសចរណ៍នៅកម្ពុជាបានវិលមករកភាពល្អប្រសើរឡើងវិញ ហើយរដ្ឋចាប់ផ្តើមអនុវត្តការប្រមូលចំណូលក្នុងវិស័យនេះឡើងវិញ។
អត្ថបទគួរអាន
គួរបញ្ជាក់ថា នៅ៥ខែឆ្នាំ២០២២អគ្គនាយកដ្ឋានពន្ធដារប្រមូលចំណូលបានជាង១ពាន់៧រយលានដុល្លារមានការកើនឡើងជិត២៨% ខណៈអគ្គនាយកដ្ឋានគយ និងរដ្ឋាករប្រមូលបានជាង១ពាន់លានដុល្លារកើនឡើងជាង៨% បើធៀបនឹងរយៈពេលដូចគ្នាកាលពីឆ្នាំមុន។ ដោយឡែកនៅពេញមួយឆ្នាំ២០២១ ចំណូលដែលប្រមូលដោយស្ថាប័នទាំងពីរមានចំនួនសរុបមានជាង៤ពាន់៥រយលានដុល្លារ ក្នុងនោះចំណូល ដែលប្រមូលដោយអគ្គនាយកដ្ឋានពន្ធដារមានចំនួនជាង២ពាន់២រយលានដុល្លារ៕
