លទ្ធផលស្ទង់មតិបង្ហាញថា ពលរដ្ឋថៃ ជាង ៤០% មានជីវិតរស់លំបាក និងចាយវាយក្បិតក្បៀតជាងមុន

យោងតាមលទ្ធផលនៃការស្ទង់មតិរបស់ស្ថាប័ន Ipsos ដែលបានសួរទៅកាន់មនុស្សចំនួន ៥០០នាក់ ដែលមានអាយុចន្លោះពី ២០-៧៤ឆ្នាំ បានឱ្យដឹងថា មាន៤នាក់ ក្នុងចំណោម ១០នាក់ នៃពលរដ្ឋថៃទាំងនោះ បាននិយាយថា ពួកគេចង់វិលទៅកើតក្នុងពេលវេលាអតីតកាលកាលពីរាប់សិបឆ្នាំមុន ជាជាងរស់នៅក្នុងយុគសម័យបច្ចុប្បន្ននេះ ព្រោះសម័យកាលនោះហាក់ដូចជាងាយស្រួលរស់នៅជាង។ ក្នុងចំណោមអ្នកដែលបានស្ទង់មតិ មាន ៥២% និយាយថា សម្រាប់បច្ចុប្បន្ននេះ ពួកគេមិនហ៊ានទិញរបស់របរដែលចំណាយច្រើននោះទេ ដូចជាការទិញ ផ្ទះ ឬរថយន្តជាដើម។ ៤០% មានអារម្មណ៍មិនស្រួលក្នុងចិត្តនោះទេ ពេលទិញរបស់ប្រើប្រាស់ផ្សេងៗនៅក្នុងផ្ទះបាយ។ រីឯ ៧៦% ថា សេដ្ឋកិច្ចរបស់ប្រទេសថៃកំពុងស្ថិតក្នុង “ស្ថានភាពវិបត្តិធ្លាក់ចុះ” គួរឱ្យបារម្ភ។

ការប្រយ័ត្នប្រយែងក្នុងការចាយវាយនេះ កើតចេញពីជំនឿដែលថា លុយបាតធ្លាក់ថ្លៃ មិនអាចវិលទៅរកកម្រិតប្រក្រតីវិញបាន នាំឱ្យអ្នកចាយវាយត្រូវរៀបចំផែនការហិរញ្ញវត្ថុយ៉ាងប្រុងប្រយ័ត្នជាពិសេស។

ស៊ីគ្នាជាមួយនឹងការស្ទង់មតិនេះដែរ ក្នុងត្រីមាសទី៣ ឆ្នាំ២០២៥ របាយការណ៍ផ្លូវការទាក់ទងនឹង កម្ចីទិញយានយន្តក្នុងប្រទេសថៃ បានបន្ដធ្លាក់ចុះជាបន្តបន្ទាប់ ៧ត្រីមាសជាប់ៗគ្នា ខណៈ ប្រាក់កម្ចីកាតក្រេឌីតថយចុះ ២,៦% និងប្រាក់កម្ចីបុគ្គលថយចុះ ០,២%។

ដោយឡែក ឥណទានមិនដំណើរការ (NPLs) ក៏បានកើនឡើងដែរ ពោលគឺ ក្នុងត្រីមាសទី២ ឆ្នាំ២០២៥ មានកម្ចីបុគ្គលដែលមិនបានសងត្រឡប់លើស ៩០ថ្ងៃ មានតម្លៃសរុប ប្រមាណជិត ៤០ពាន់លានដុល្លារ ឬស្មើនឹងអត្រាជាង ៩% នៃឥណទានសរុប៕