ទំហំបំណុលគ្រួសារនៅក្នុងប្រទេសថៃ បានកើនឡើងគួរឱ្យព្រួយបារម្ភឈានជាង៥០០ពាន់លានដុល្លារ ស្មើនឹងជិត៨៧% នៃផលិតផលក្នុងស្រុកសរុបរបស់ប្រទេសនេះ ដែលជាកម្រិតខ្ពស់បំផុតនៅតំបន់អាស៊ី។ ការកើនឡើងខ្ពស់នៃទំហំបំណុលគ្រួសារនេះកំពុងគំរាមកំហែងដល់សេដ្ឋកិច្ចរបស់ប្រទេសដែលមានសេដ្ឋកិច្ចធំបំផុតទីពីរនៅតំបន់អាស៊ានមួយនេះ។ ជាមួយគ្នានេះ បំណុលខូចនៅក្នុងប្រទេសក៏មានការកើនឡើងគួរឱ្យព្រួយបារម្ភផងដែរ ដែលកំពុងដាក់បន្ទុកដល់រដ្ឋាភិបាលរបស់ប្រទេសនេះ។
រដ្ឋមន្ត្រីក្រសួងហិរញ្ញវត្ថុថៃ លោក ឯកនីតិ នីតិថានប្រាផាស (Ekniti Nitithanprapas) បានប្រាប់អ្នកយកព័ត៌មានថា រដ្ឋាភិបាលថៃនឹងចំណាយថវិកាប្រមាណ៣០៧លានដុល្លារ ដើម្បីទិញបំណុលខូចនៅក្នុងខែតុលា នេះ ដើម្បីស្ដារកំណើនសេដ្ឋកិច្ច ដែលដើរអូសជើងឱ្យមានភាពល្អប្រសើរឡើងវិញ។ ថវិកាដែលគ្រោងទិញបំណុលខូចនេះ នឹងដកចេញពីកញ្ចប់មូលនិធីជាង៧៩៣លានដុល្លារ ដែលនៅសល់ពីមូលនិធិស្តារនីតិសម្បទា។
ការដោះស្រាយបំណុលដែលធ្វើឡើងរួមជាមួយគម្រោងឧបត្ថម្ភធន«ទូទាត់រួម»ជាង៣៦លានដុល្លារដើម្បីជំរុញការប្រើប្រាស់ គឺជាផ្នែកមួយនៃផែនការរបស់រដ្ឋាភិបាលក្នុងការស្តារសេដ្ឋកិច្ចដែលរំពឹងធ្លាក់ចុះ០៤% នៅត្រីមាសទី៤ឆ្នាំនេះ ប្រសិនបើបញ្ហានៅតែមិនអាចដោះស្រាយបាន។ ការនាំចេញយឺតយ៉ាវ ការធ្លាក់ចុះចំនួនភ្ញៀវទេសចរ និងតម្លៃប្រាក់បាតកើនឡើងក៏បានចោលទម្ងន់ទៅលើសេដ្ឋកិច្ចរបស់ប្រទេសនេះផងដែរ៕
ដោយ៖ សុខ មង្គល
