ថៃរំពឹងទទួលបានភ្ញៀវទេសចរ៣០ម៉ឺននាក់ក្នុងពេល២ខែក្រោយបើកប្រទេសឡើងវិញ

បើតាមអាជ្ញាធរទេសចរណ៍ថៃបាន​សង្កត់ធ្ងន់ថា បើទោះបីជា ទីក្រុងបាងកក​បើកទទួលភ្ញៀវទេសចរចាក់វ៉ាក់សាំងរួចក៏ពិតមែន តែភ្ញៀវបរទេសត្រូវកក់សណ្ឋាគារដែលសហការ​ជាមួយមន្ទីរពេទ្យ ដើម្បីផ្តល់ការ​ធ្វើតេស្តរកកូវីដ ១៩។  ដូច្នេះ បើក្នុងករណីពួកគេត្រូវបាន​រកឃើញវិជ្ជមានកូវីដ ១៩ នោះពួកគេអាច​ចូលព្យាបាល​បាន​ភ្លាមៗតែម្ដង។

ទន្ទឹមនេះ អាជ្ញាធរទេសចរណ៍​ថៃបាន អនុម័ត​ផែនការ​ដោះស្រាយ និងផ្តល់ការព្យាបាលដល់ភ្ញៀវបរទេស ដែលឆ្លងមេរោគកូវីដក្នុងអំឡុងពេលធ្វើដំណើររបស់ពួកគេ ព្រមទាំងផែនការមួយទៀត​ក្នុងការបង្កើតមជ្ឈមណ្ឌល​ដើម្បីត្រួតពិនិត្យ​ការបើកដំណើរការឡើងវិញរបស់ទីក្រុងបាងកកផងដែរ។

សូមជម្រាបថា ជុំវិញផែនការបើកប្រទេសឡើងវិញនេះ មានវិស័យឯកជនមួយចំនួនបានសម្តែងការព្រួយបារម្ភអំពីហានិភ័យនៃការកើនឡើងករណីឆ្លងថ្មី ប្រសិនបើការទទួលទានគ្រឿងស្រវឹងនៅក្នុងភោជនីយដ្ឋាន និងកន្លែងកម្សាន្តផ្សេងទៀតត្រូវបានអនុញ្ញាតឱ្យដំណើរការនៅថ្ងៃទី ១ ខែធ្នូ ទៅតាមអ្វីដែលរាជរដ្ឋាភិបាលថៃបានគ្រោងទុកមែននោះ។

ដោយឡែក ប្រតិបត្តិករទេសចរណ៍​ឯណោះវិញ បានខិតខំអំពាវនាវ​​លើគម្រោងការបើកដំណើរការឡើងវិញរបស់ប្រទេសថៃ ដោយជំរុញឱ្យរដ្ឋាភិបាល​ចាប់ផ្តើមធ្វើការជាមួយប្រទេសដទៃទៀត ដើម្បីដកចេញ​នូវការធ្វើចត្តាឡីស័ក​ចំពោះគ្នា​ទៅវិញទៅមកជាមួយប្រទេស​ផ្សេងទៀត។ ជាក់ស្ដែង នាយកប្រតិបត្តិការពាណិជ្ជកម្ម ក្រុមហ៊ុនអាកាសចរមួយកន្លែងបាននិយាយថា ការបើកដំណើរការទៅវិញទៅមក​រវាងប្រទេសនឹងប្រទេស​មានសារៈសំខាន់ណាស់​សម្រាប់​ការធ្វើដំណើរអន្តរជាតិ។ ប្រសិនបើគ្មានការព្រមព្រៀង​ទៅវិញទៅមកទេ វាអាចនឹងគ្មានតុល្យភាពអ្នកដំណើរនោះទេ៕

អត្ថបទ៖ ស៊ើង និមល់