ថៃអាចនឹងហាមឃាត់ការនាំចូលផ្លែពោតពីកម្ពុជា ឡាវ និងមីយ៉ាន់ម៉ា នៅឆ្នាំក្រោយ

លោក សេដ្ឋា ថាវីស៊ីន បានប្រាប់អ្នកសារព័ត៌មានថា ថៃបានពិភាក្សាពីបញ្ហាការបំពុលបរិយាកាសដែលបង្កឡើងការដុតព្រៃ ជាមួយនឹងក្រសួងនានារបស់កម្ពុជា និងឡាវ ក៏ដូចជាអគ្គមេបញ្ជាការកងទ័ពមីយ៉ាន់​ម៉ា ផងដែរ។ លោកបានបន្ថែមថា ថៃមិនអាចជ្រៀតជ្រែកដែនអធិបតេយ្យរបស់ប្រទេសដទៃបានទេ ប៉ុន្តែវាមានកង្វល់គួរឱ្យព្រួយបារម្ភមួយចំនួនថា តើថៃអាចធ្វើអ្វីបាន ដើម្បីបញ្ឈប់អ្នកជិតខាងរបស់ខ្លួនកុំឱ្យបន្តដុតព្រៃតទៅទៀត?

នាយករដ្ឋមន្ត្រីថៃ រូបនេះ ជឿជាក់ថា បញ្ហានេះនឹងមិនអាចដោះស្រាយបាននោះទេ ប្រសិនបើការនាំចូលពោតពីប្រទេសជិតខាងទាំងនេះមិនត្រូវបានហាមឃាត់នៅក្នុងរដូវកាលមានតម្រូវការកើនខ្ពស់នោះ។ ជាមួយគ្នានេះ ថៃ ក៏គ្រោងដំឡើងពន្ធលើការនាំចូលពោតពីប្រទេសជិតខាងរួមទាំងកម្ពុជាផងដែរ ហើយបើគ្មានការប្រែប្រួលទេ ថៃគ្រោងហាមឃាត់ការនាំចូលពោតពីកម្ពុជា ឡាវ និងមីយ៉ាន់ម៉ា នៅឆ្នាំក្រោយចន្លោះពីខែមករា ដល់ខែមេសា។

លោក សេដ្ឋា បានបន្ថែមថា វាមិនអាចប្រកែកបានឡើយ ដែលថាបញ្ហាផ្សែងធូលីនេះ គឺបណ្តាលមកពីបញ្ហាសេដ្ឋកិច្ច ព្រោះកសិករបានប្រើមធ្យោបាយដុតកាកសំណល់កសិកម្ម ដើម្បីយកដីសម្រាប់ដាំដុះឡើងវិញ ហើយអ្នកភូមិជនបទខ្លះទៀតបានដុតព្រៃ ដើម្បីស្វែងរកសត្វព្រៃ។ ដូច្នេះហើយ វាចាំបាច់ត្រូវស្វែងរកការច្នៃប្រឌិតថ្មី និងធ្វើការជាមួយនឹងយោធា ដើម្បីជួយដឹកយកកាកសំណល់កសិកម្មចេញពីចម្ការរបស់កសិករ បើមិនដូច្នេះទេ កសិករនឹងដុតវាចោលជាក់ជាមិនខាន។

បើយោងតាមទីភ្នាក់ងារវាយតម្លៃគុណភាពខ្យល់ IQ Air បានឱ្យដឹងថា ទីក្រុងឈៀងម៉ៃ បានជាប់ជាទីក្រុងកំពូលទាំង១០របស់ពិភពលោក ដែលមានកម្រិតបំពុលខ្យល់ខ្ពស់បំផុតបន្ទាប់មកគឺទីក្រុងឡាហ័រ (Lahore) នៅប្រទេសប៉ាគីស្ថាន ទីក្រុងប៉េកាំងរបស់ប្រទេសចិន ទីក្រុងញូដេលីរបស់ប្រទេសឥណ្ឌា និងទីក្រុងដាកា​ ប្រទេសបង់ក្លាដែស៕

អត្ថបទ៖ សុខ ជា