ថៃនឹងបង្ហាញអង្ករ ៣០ ប្រភេទ នៅឆ្នាំក្រោយ ដើម្បីលើកម្ពស់ភាពប្រកួតប្រជែងខាងនាំចេញអង្ករ

សារព័ត៌មានបាងកកប៉ុស្តិ៍បានរាយការណ៍ថា ប្រទេសថៃកំពុងធ្វើការដើម្បីបង្កើនភាពប្រកួតប្រជែងក្នុងការនាំចេញអង្កររបស់ខ្លួន ដោយពន្លឿនការអភិវឌ្ឍពូជស្រូវថ្មីដើម្បីបំពេញតម្រូវការទីផ្សារ និងប្តេជ្ញានាំមកនូវពូជស្រូវថ្មីចំនួន ៣០ ប្រភេទនៅឆ្នាំក្រោយ។

បន្ទាប់ពី"ពីធីប្រលងប្រណាំងពូជស្រូវថ្មីសម្រាប់ពាណិជ្ជកម្ម" រដ្ឋមន្ត្រីក្រសួងពាណិជ្ជកម្ម លោក ជូរីន ឡាក់សាណាវិសិទ្ធ (Jurin Laksanawisit) បាននិយាយថា ចំណុចខ្សោយរបស់ថៃមួយគឺកង្វះភាពចម្រុះនៃផលិតផលសម្រាប់ផ្តល់ឱ្យទីផ្សារអង្ករពិភពលោក។ លោកបានជំរុញឱ្យប្រទេសនេះពន្លឿនការអភិវឌ្ឍពូជស្រូវថ្មី ដើម្បីប្រកួតប្រជែងជាមួយប្រទេសផ្សេងៗទៀតដែលនាំចេញអង្ករដែរ។

ក្រសួងពាណិជ្ជកម្មថៃបានកំណត់គោលដៅមុននេះក្នុងការអភិវឌ្ឍយ៉ាងហោចណាស់ពូជស្រូវថ្មីសម្រាប់ពាណិជ្ជកម្មចំនួន ១២ ប្រភេទ នៅឆ្នាំ២០២៤ ក្រោមផែនការអភិវឌ្ឍន៍រយៈពេល៥ឆ្នាំ ចាប់ពីឆ្នាំ២០២០ ដល់ឆ្នាំ២០២៤ ដើម្បីលើកកម្ពស់ភាពប្រកួតប្រជែងការនាំចេញអង្ករ។

ក្នុងចំណោមពូជស្រូវថ្មីទាំង ១២ ប្រភេទនេះ មាន ៤ ប្រភេទ ជាផ្ដល់ជាអង្កររឹង, ៤ ប្រភេទ ជាអង្ករទន់, ២ ប្រភេទជាអង្ករក្រអូប និង ២ ប្រភេទជាអង្ករមានជីវជាតិខ្ពស់។ ពូជស្រូវទាំងនេះមានតម្រូវការច្រើនក្នុងចំណោមអ្នកបរិភោគនៅទូទាំងពិភពលោក។

លោក ជូរីន បាននិយាយថា កិច្ចសហការរវាងរដ្ឋាភិបាលនិងវិស័យឯកជន បាននាំឱ្យមានការអភិវឌ្ឍ និងការបញ្ជាក់អំពីពូជស្រូវថ្មីចំនួន ១២ ប្រភេទ នៅឆ្នាំ ២០២៣ ដោយជោគជ័យ។

យោងតាមលោក ជូរីន, ប្រទេសថៃបាននាំចេញអង្ករក្នុងបរិមាណជិត ៨ លានតោនកាលពីឆ្នាំមុន ហើយវាត្រូវបានគេជឿជាក់ថា ការនាំចេញនៅឆ្នាំនេះនឹងលើសពីចំនួន ៨ លានតោន ដោយសារតែការកើនឡើងនៃពូជស្រូវចម្រុះដែលនឹងរួមចំណែកដល់ការធ្វើឱ្យប្រសើរឡើងនៃការនាំចេញ។

ទន្ទឹមនឹងនេះដែរ លោក ឈូកគៀត ឱភាសវង្សី (Chookiat Ophaswongse) ប្រធានកិត្តិយសនៃសមាគមអ្នកនាំចេញអង្ករថៃ បាននិយាយថា ការនាំចេញអង្កររបស់ថៃនៅក្នុងឆមាសទី២នៃឆ្នាំនេះ ត្រូវបានគេរំពឹងថា នឹងកើនឡើងទាំងបរិមាណ និងតម្លៃ ដោយសារតែតម្រូវការទីផ្សារលើពិភពលោកកើនឡើង និងដោយសារភាពប្រកួតប្រជែងខ្ពស់របស់អង្ករថៃ បើធៀបនឹងប្រទេសវៀតណាម ព្រោះតម្លៃទាបជាង៕