ចិន រឹតបន្តឹងការនាំចេញទំនិញសំខាន់ៗទៅជប៉ុន ដើម្បីទប់ស្កាត់ការបង្កើនកម្លាំងយោធា
រដ្ឋាភិបាលចិន បានប្រកាសដាក់វិធានការគ្រប់គ្រងការនាំចេញភ្លាមៗទៅកាន់ក្រុមហ៊ុន និងស្ថាប័នជប៉ុន ចំនួន៤០ ចាប់ពីថ្ងៃអង្គារ ទី២៤ ខែកុម្ភៈ តទៅ។…
ការព្រមាននេះ ធ្វើឡើងក្រោយការវាយតម្លៃមួយរបស់សហភាពអឺរ៉ុបរកឃើញថា គោលនយោបាយពន្ធថ្មីរបស់លោក ត្រាំ នឹងដំឡើងពន្ធលើទំនិញនាំចេញមួយចំនួនរបស់សហភាពអឺរ៉ុប រួមទាំងឈីស និងផលិតផលកសិកម្មមួយចំនួនលើសពី១៥% ដែលបានកំណត់ក្នុងកិច្ចព្រមព្រៀងពាណិជ្ជកម្មរវាងសហភាពអឺរ៉ុប និងសហរដ្ឋអាម៉េរិក កាលពីឆ្នាំ២០២៥។ នេះបើយោងតាមការចុះផ្សាយរបស់សារព័ត៌មាន Bloomberg កាលពីថ្ងៃទី២៤ ខែកុម្ភៈ ឆ្នាំ២០២៦។
បន្ទាប់ពីតុលាការកំពូលអាម៉េរិក បានសម្រេចចេញសាលដីការលុបចោលពន្ធគយបដិការរបស់ខ្លួន ប្រធានាធិបតីអាម៉េរិក លោក ដូណាល់ ត្រាំ បានប្រកាសពន្ធសកលថ្មី១០% ហើយក្រោយមកបានគំរាមដំឡើងពន្ធថ្មីនេះដល់១៥%។ គណៈកម្មការអឺរ៉ុប បាននិយាយថា ពន្ធគយថ្មីនេះនឹងត្រូវបានបន្ថែមទៅលើពន្ធដែលមានស្រាប់ដែលជំរុញឱ្យពន្ធលើទំនិញនាំចេញមួយចំនួនរបស់សហភាពអឺរ៉ុប ដូចជា ឈីស បឺ ប្លាស្ទិក និងសារធាតុគីមីជាដើម លើសពីដែនកំណត់១៥% ដែលបានព្រមព្រៀងគ្នានៅក្នុងកិច្ចព្រមព្រៀងពាណិជ្ជកម្មរវាងសហភាពអឺរ៉ុប និងសហរដ្ឋអាម៉េរិក។ ពន្ធគយថ្មីដែលលោក ដូណាល់ ត្រាំ ទើបតែដាក់ចេញដើម្បីឆ្លើយតបទៅនឹងការសម្រេចរបស់តុលាការកំពូលអាម៉េរិក នេះអាចមានរយៈពេលរហូតដល់១៥០ថ្ងៃ។
ក្រោមកិច្ចព្រមព្រៀងពាណិជ្ជកម្ម ដែលសម្រេចបានកាលពីឆ្នាំមុនរវាងលោក ដូណាល់ ត្រាំ និងប្រធានគណៈកម្មការអឺរ៉ុប លោកស្រី អឺស៊ូឡា វ៉ុន ដឺ ឡេយ៉េន (Ur,sula von der Leyen) បានកំណត់ពន្ធ១៥% លើទំនិញភាគច្រើនរបស់សហភាពអឺរ៉ុប ដែលនាំចូលទៅកាន់សហរដ្ឋអាម៉េរិក ខណៈដែលលុបចោលពន្ធជាច្រើនលើទំនិញនាំចេញរបស់សហរដ្ឋអាម៉េរិក ទៅកាន់អឺរ៉ុប។ ទោះជាយ៉ាងណាសហរដ្ឋអាម៉េរិក នៅតែរក្សាពន្ធ៥០% លើដែកថែប និងអាលុយមីញ៉ូមរបស់អឺរ៉ុប។
ក្រុមសមាជិកសភានៃសហភាពអឺរ៉ុបបានផ្អាកការអនុម័តកិច្ចព្រមព្រៀងនេះ ហើយកំពុងរង់ចាំភាពច្បាស់លាស់លើគោលនយោបាយថ្មីរបស់លោក ដូណាល់ ត្រាំ។ ប្រធានពាណិជ្ជកម្មសហភាពអឺរ៉ុប លោក Maros Sefcovic បានជួបពិភាក្សាជាមួយក្រុមមន្ត្រីអាម៉េរិក ហើយភាគីទាំងពីរនិយាយថា ពួកគេចង់រក្សាកិច្ចព្រមព្រៀងនេះឱ្យនៅដដែល ទោះបីជាពេលនេះអ្វីៗស្ថិតក្នុងភាពមិនច្បាស់លាស់យ៉ាងណាក៏ដោយ៕
ដោយ: តែម សុខុម
