ក្រសួងពាណិជ្ជកម្មបន្ដពន្យារពេលការផាកពិន័យ ចំពោះការស្នើសុំអាជ្ញាបណ្ណសម្រាប់អាជីវកម្មតាមអនឡាញដល់ថ្ងៃទី ១ខែកក្កដា

នៅក្នុងលិខិតរបស់ក្រសួងពាណិជ្ជកម្មដែលបានចេញកាលពីថ្ងៃទី០២ ខែមីនានេះបានបញ្ជាក់ផងដែរថា  ក្រសួងនឹងបន្ដពន្យារពេលការផាកពិន័យចំពោះ អាជីវកម្មណាដែយឺតយ៉ាវដាក់ពាក្យស្នើសុំលិខិតអនុញ្ញា ត ឬអាជ្ញាបណ្ណពាណិជ្ជកម្មតាមប្រព័ន្ធអេឡិចត្រូនិករហូតដល់ថ្ងៃទី ០១ ខែកក្កដា ឆ្នាំ២០២២។ ការពន្យារពេលនេះ ដោយយោងតាមការសំណូមពររបស់អាជីវករ សហគ្រាសឯកបុគ្គល និងក្រុមហ៊ុនជាច្រើន និងរួមផ្សំជាមួយនឹងការផ្ទុះឡើងវិញនូវជំងឺកូវីដ១៩បំប្លែងថ្មី ប្រភេទអូមីក្រុង ដែលកំពុងរាលដាលខ្លាំងក្នុងសហគមន៍ផងដែរ។

នេះមិនមែនជាលើកទី១នោះទេ ដែលក្រសួងពាណិជ្ជកម្មបានពន្យារពេលផាកពិន័យនេះ ខណៈកន្លងមកក៏មានការពន្យារពេលនេះជាច្រើនលើករួចមកហើយដែរ។

ស្របពេលដែលការប្រកបអាជីវកម្មតាមប្រព័ន្ធអនឡាញនៅកម្ពុជាមានការរីកចម្រើនខ្លាំង ក្រសួងពាណិជ្ជកម្មបានក្រើនរម្លឹកដាស់តឿនជាថ្មីឲ្យក្រុមហ៊ុន សហគ្រាស និងអ្នកប្រកបអាជីវកម្មតាមប្រព័ន្ធអេឡិចត្រូនិកទាំងអស់ ឲ្យមកដាក់ពាក្យស្នើសុំលិខិតអនុញ្ញាត ឬ អាជ្ញាបណ្ណពាណិជ្ជកម្មឲ្យបានត្រឹមត្រូវ បើមិនចង់រងការការផ្អាក ឬបញ្ឈប់អាជីវកម្ម ឬរងពិន័យជាទឹកប្រាក់រហូតដល់ ១០លានរៀល ប្រសិនបើបន្តរកស៊ីដោយគ្មានលិខិតអនុញ្ញាត ឬអាជ្ញាបណ្ណត្រឹមត្រូវ។

ពាក់ព័ន្ធតម្លៃសេវានៃការស្នើសុំលិខិតអនុញ្ញាត ឬអាជ្ញាបណ្ណត្រូវបានឯកឧត្តម ប៉ែន សុវិជាតិ ធ្លាប់បានបញ្ជាក់ថា ការស្នើសុំលិខិតអនុញ្ញាតលក្ខណៈបុគ្គលមានតម្លៃ២០ម៉ឺនរៀល, លិខិតអនុញ្ញាតសម្រាប់សហគ្រាសឯកបុគ្គលមានតម្លៃ៤០ម៉ឺនរៀល និងអាជ្ញាបណ្ណសម្រាប់ក្រុមហ៊ុនតម្លៃ១លានរៀល។

សម្រាប់ការស្នើសុំលិខិតអនុញ្ញាត ឬអាជ្ញាបណ្ណពាណិជ្ជកម្មអេឡិចត្រូនិក ក្រុមហ៊ុន សហគ្រាស ឬបុគ្គលរកស៊ីតាមអនឡាញទាំងអស់ អាចដាក់ពាក្យស្នើសុំនៅនាយកដ្ឋានចុះបញ្ជីពាណិជ្ជកម្ម អគ្គនាយកដ្ឋានសេវាពាណិជ្ជកម្មនៃក្រសួងពាណិជ្ជកម្ម ឬអាចចូលទៅកាន់គេហទំព័ររបស់ក្រសួងពាណិជ្ជកម្មដើម្បីស្វែងរកការស្នើសុំតាមអនឡាញក៏បាន៕

អត្ថបទ សោម ស្រីពេជ្រ