របាយការណ៍ដដែលនេះ បានដឹងថាចំនួនទឹកប្រាក់នៃការនាំចេញរបស់កម្ពុជាទៅកាន់ប្រទេសថៃនៅក្នុងខែមិថុនាកន្លងទៅសម្រេចបានទំហំទឹកប្រាក់ ៥៦លានដុល្លា
អាមេរិក កើនឡើង៤២%ធៀបនឹងខែមិថុនា ឆ្នាំ២០២០ ដែលមានទឹកប្រាក់ជាង៣៩លានដុល្លារ។ ចំណែកឯ ការនាំចូលពីថៃក្នុងខែមិថុនានៃឆ្នាំ២០២១វិញមានតម្លៃ៥៦០លានដុល្លា កើនឡើង២៩% ធៀបរយៈពេលដូចគ្នាកាលពីឆ្នាំមុន។
សរុបទឹកប្រាក់នៃការការដោះដូរពាណិជ្ជកម្មទ្វេភាគីរវាងកម្ពុជា និងថៃ នៅរយៈពេល៦ខែ ដើមឆ្នាំនេះមានតម្លៃ ៣.៩៨២លានដុល្លារ ធ្លាក់ចុះ១% បើធៀបទៅរយៈពេលដូចគ្នានៃ២០២០ ដែលមានទឹកប្រាក់ ៤,០២៥លានដុល្លា។ ក្នុងនោះ ការនាំចេញសរុបរបស់កម្ពុជាទៅថៃ មានតម្លៃ ៥១២លានដុល្លា ធ្លាក់ចុះ៣៣% ធៀបនឹងរយៈពេលដូចគ្នាកាលពីឆ្នាំ២០២០ ដែលមានទឹកប្រាក់៧៦៥លានដុល្លារ។ រីឯ ការនាំចូលពីប្រទេសថៃមកវិញ មានតម្លៃ ៣.៤៦៦លានដុល្លា កើនឡើង ៣%។ ប្រការនេះ បង្កើតឲ្យមានឱនភាពជញ្ជីងពាណិជ្ជកម្មនៃប្រទេសទាំងពីរមានចំនួនជិត ៣ពាន់លានដុល្លារអាមេរិក។
សូមបញ្ជាក់ថា ប្រទេសថៃ និងកម្ពុជា កំពុងទទួលរងនូវរលកឆ្លងកូវីដ-១៩ កាន់តែខ្លាំងក្លា ដោយក្នុងនោះ ប្រទេសថៃ ហាក់កំពុងផុងខ្លួនកាន់តែជ្រៅជាងគេ បើធៀបនឹងប្រទេសផ្សេងៗទៀតក្នុងតំបន់។ ជាក់ស្ដែង នៅរយៈពេលចុងក្រោយនេះ ថៃមានរកឃើញអ្នកឆ្លងកូវីដ-១៩ករណីថ្មីជាង ១ម៉ឺនាក់នាក់ជារៀងរាល់ថ្ងៃ ខណៈដែលកម្ពុជារកឃើញក្នុងរង្វង់ជាង៧០០ ទៅជាង៩០០នាក់ក្នុងមួយថ្ងៃៗ។
អត្ថបទគួរអាន
នៅក្នុងខែ កក្កដា ឆ្នាំ២០២១ ស្ថានភាពសេដ្ឋកិច្ចរបស់ប្រទេសថៃ ត្រូវបានគេមើលឃើញថា កាន់តែមានការរង្គោះរង្គើខ្លាំងឡើង បើទោះបីជា រាជរដ្ឋាភិបាលថៃ ប្រឹងប្រែងដាក់ចេញយុទ្ធសាស្ត្រថ្មីៗដូចជា គម្រោងបើកកោះភូកេតទទួលភ្ញៀវទេសចរអន្តរជាតិបានចាក់វ៉ាក់សាំង និងយុទ្ធនាការចាក់វ៉ាក់សាំងបង្ការកូវីដ-១៩ ដល់ពលរដ្ឋរប់ខ្លួនយ៉ាងណាក្ដី។ បញ្ហាឆ្លងរាលដាលកូវីដ-១៩ និងការបន្ដបិទប្រទេស បានធ្វើឲ្យវិស័យស្នូលដែលជាប្រភពកំណើនរបស់ថៃ រួមមាន កម្មន្ដសាល សំណង់ និងឧស្សាហកម្មជាដើម ដោយវិស័យទាំងទាំងនេះ បានចូលរួមចំណែកប្រមាណ ៥៧% នៃផលិតផលក្នុងស្រុកសរុបរបស់ប្រទេសនេះ និងបង្កើតការងារប្រមាណ ៤៦% ដល់ប្រជាពលរដ្ឋទូទាំងប្រទេស។
ធនាគារកណ្ដាលថៃ បានព្យាករថា ការបន្ដការបិទខ្ទប់ប្រទេស ទប់ទល់នឹងរលកឆ្លងកូវីដ-១៩ នាពេលថ្មីៗនេះ នឹងធ្វើឲ្យសេដ្ឋកិច្ចថៃធ្លាក់ចុះ ០,៨% សម្រាប់សេណារីយ៉ូល្អបំផុត នៅពេលអត្រាឆ្លងថ្មីធ្លាក់ចុះក្រោម ៤០% ក្នុងខែសីហា។ ប៉ុន្ដែ សម្រាប់សេណារីយ៉ូអាក្រក់បំផុតវិញ សេដ្ឋកិច្ចថៃអាចនឹងត្រូវធ្លាក់ចុះប្រមាណ ២%ទៀត៕
អត្ថបទ៖ ហួន ស្រីនីត
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
