![ទង់ជាតិចិន និង ទង់ជាតិនៃតំបន់រដ្ឋបាលពិសេសក្រុងហុងកុង រូបភាព៖ Reuters](https://cdn.cambonomist.com/media/images/JHongkong_chia_us.2e16d0ba.fill-960x540.jpg)
អ្នកនាំពាក្យក្រសួងការបរទេសអាមេរិក អះអាងថា អាមេរិកសូមធ្វើការថ្កោលទោសចំៗ លើរដ្ឋាភិបាលក្រុងប៉េកាំង ដែលបានប្រើប្រាស់ច្បាប់បោះឆ្នោតថ្មីមួយ យកមករឹតត្បិតសិទ្ធិធ្វើនយោបាយ និងលទ្ធិប្រជាធិបតេយ្យនៅហុងកុង។ អ្នកនាំពាក្យក្រុងវ៉ាស៊ីនតោន ក៏បានសម្តែងក្តីព្រួយបារម្ភ ដែលចិនបានសម្រេចលើកពេលម្តងហើយម្តងទៀត ចំពោះការបោះឆ្នោតនៅហុងកុង ដែលជាមជ្ឈមណ្ឌលហិរញ្ញវត្ថុដ៏ធំមួយរបស់ពិភពលោក។ ប្រការនេះផងដែរ ត្រូវបានគេមើលឃើញថា ជាការរំលោភជាខ្លាំងដល់ស្វ័យភាពគ្រប់គ្រង របស់តំបន់រដ្ឋបាលស្វយ័តពិសេសហុងកុង។
គួររំឭកថា Reuters បានចុះផ្សាយកាលពីដើមខែមីនាថា ការបោះឆ្នោតសម្រាប់នីតិកាលថ្មីនៅហុងកុងទំនងជាត្រូវពន្យារពេលរហូតដល់ ខែកញ្ញា ឆ្នាំ២០២២ ឯណោះ ដោយសារតែក្រុងប៉េកាំងត្រូវការពេលសម្រាប់រៀបចំគណៈកម្មការរៀបចំការបោះឆ្នោតថ្មីមួយ ដែលមានប្រតិភូដល់ទៅ ១.៥០០នាក់មកពីគ្រប់វិស័យ។ មែនទែនទៅ ការបោះឆ្នោតនៅហុងកុងគួរត្រូវបានធ្វើឡើងតាំងពី ខែកញ្ញាឆ្នាំ២០២០ម្ល៉េះ ប៉ុន្តែដោយសារការរាតត្បាតនៃកូវីដ-១៩ ទើបត្រូវពន្យារពេលតាំងពីពេលនោះមក។
ថ្នាក់ដឹកនាំហុងកុង លោកស្រី Carrie Lam រំពឹងថា ហុងកុងនឹងអនុម័តទទួលយក ព្រមទាំងបញ្ចូលជាធរមាននូវច្បាប់បោះឆ្នោតថ្មីនេះ នៅត្រឹមពាក់កណ្តាលខែមេសា ឫឧសភាឆ្នាំ២០២១ខាងមុខ។
គួរបញ្ជាក់ថា ច្បាប់បោះឆ្នោតថ្មីរបស់ហុងកុង ដែលចិនបានកែប្រែនេះ នឹងអនុញ្ញាតឲ្យសភាហុងកុងមានអាសនៈដល់ទៅ ៩០អាសនៈបូករួមនឹងការបង្កើតគណៈកម្មការរៀបចំការបោះឆ្នោតថ្មីមួយផងដែរ។
គណៈកម្មាធិការថ្មីនេះ ក៏មានតួនាទីសម្រាប់ពិនិត្យលើលក្ខខណ្ឌ និងផ្តល់ការយល់ព្រមដល់សំណើសុំឈរឈ្មោះបេក្ខជនតំណាងរាស្ត្រនៅហុងកុងផងដែរ។ មានន័យថា អ្នកនយោបាយ ដែលមាននិន្នាការប្រឆាំង ទំនងជាមិនអាចឆ្លងផុតលក្ខខណ្ឌថ្មីឡើយ ព្រោះក្រៅពីអ្នកតំណាងរាស្ត្រដែលចាត់តាំងដោយក្រុងប៉េកាំង អ្នកនយោបាយដែលចង់ធ្វើនយោបាយនៅហុងកុងត្រូវដាក់សំណើសុំឈរឈ្មោះជាមុនសិន រួចត្រូវរង់ចាំការពិនិត្យ និងអនុញ្ញាតពីក្រុងប៉េកាំង ដែលបញ្ហានេះ បាននាំឲ្យថយចុះសំឡេងប្រឆាំងនៅហុងកុង៕