នេះជាលើកទីមួយហើយ ដែលកប៉ាល់ដឹកកុងតឺន័ររបស់វៀតណាម ធ្វើដំណើរឆ្លងកាត់ច្រកសមុទ្រម៉ាឡាកា ទៅកាន់មហាសមុទ្រឥណ្ឌា ដើម្បីដឹកជញ្ជូនទំនិញទៅកាន់ប្រទេសម៉ាឡេស៊ី និងឥណ្ឌា ដែលប្រទេសទាំងពីរនេះ គឺជាទីផ្សារនាំចូល និងនាំចេញដ៏ធំសម្រាប់ទំនិញ និងវត្ថុធាតុដើមក្នុងប្រទេសវៀតណាម។
លើសពីនេះទៅទៀត ក្រុមហ៊ុន សាជីវកម្មដែនសមុទ្រវៀតណាម បាននិយាយថា ខ្លួនមានគម្រោងពង្រីកកប៉ាល់ផ្ទុកកុងតឺន័រ និងប្រតិបត្តិការរបស់ខ្លួននៅក្នុងតំបន់ ក៏ដូចជាទូទាំងពិភពលោកបន្ថែមទៀតផងដែរ។
សូមរំឭកថា ចំពេលមានការផ្ទុះឡើងនៃជំងឺរាតត្បាតកូវីដ១៩ អ្នកនាំចូល និងនាំចេញរបស់វៀតណាមបានរងសម្ពាធយ៉ាងខ្លាំង ដោយតម្លៃដឹកទំនិញមានការកើនឡើងខ្ពស់ ពីអ្នកដឹកជញ្ជូនបរទេស ព្រមទាំងពិបាកក្នុងការកក់សេវាកម្មរបស់ពួកគេថែមទៀតផង។ ជាក់ស្ដែង តម្លៃដឹកជញ្ជូនទៅកាន់អឺរ៉ុប និងអាមេរិកខាងជើងបានកើនឡើងពី ៤ ទៅ ៨ ដង ដែលស្មើប្រហែលនឹង ២ម៉ឺនដុល្លារ សម្រាប់កុងតឺន័រទំហំ ៤០ ហ្វីត។
តែយ៉ាងណាមិញ ក្រោយស្ថានភាពកូវីដ១៩ នៅប្រទេសវៀតណាមមានភាពធូរស្បើយឡើងវិញ ក្រុមហ៊ុនដឹកជញ្ជូនវៀតណាមជាច្រើន ក៏បានសម្លឹងមើលឃើញប្រាក់ចំណេញដែលកើនឡើងនៅក្នុងត្រីមាសទី ៣ ឆ្នាំនេះ ដែលជាលទ្ធផលនៃការងើបឡើងវិញនៃចរន្តសេដ្ឋកិច្ច ជាពិសេសវិស័យដឹកជញ្ជូនទំនិញ។
អត្ថបទគួរអាន
នៅត្រីមាសទី៣ឆ្នាំនេះ សាជីវកម្មដែនសមុទ្រវៀតណាម បានរាយការណ៍ ពីប្រាក់ចំណូលចំនួន ១៨០ លានដុល្លារ កើនឡើង ៧១ ភាគរយ បើធៀបនឹងរយៈពេលដូចគ្នាកាលពីឆ្នាំមុន ខណៈប្រាក់ចំណេញវិញមាន ៣៣ លានដុល្លារ ធៀបនឹងការខាតបង់ជាង ១លាន ៣សែនដុល្លារ ក្នុងត្រីមាសទី ៣ កាលពីឆ្នាំមុន។
សូមជម្រាបថា យោងតាមរដ្ឋបាលដែនសមុទ្រវៀតណាម កំពង់ផែរបស់ប្រទេសនេះ មានចលនាទំនិញជាង ៥៣៥ លានតោនក្នុងរយៈពេល ៩ ខែដំបូងនៃឆ្នាំនេះដែលកើនឡើង ៣ ភាគរយ បើធៀបទៅនឹងឆ្នាំមុន៕
អត្ថបទ៖ ស៊ើង និមល់
