តម្លៃប្រេងឆៅនៅលើទីផ្សារ Brent របស់អង់គ្លេស បានកើនឡើង១% នៅក្នុងការជួញដូរនៅព្រឹកថ្ងៃចន្ទ សប្តាហ៍នេះ ដោយឈានដល់ជាង៦៥ដុល្លារក្នុងមួយធុងបារ៉ែល ខណៈសន្ទស្សន៍តម្លៃប្រេងឆៅនៅលើទីផ្សារ West Texas Intermediate របស់អាម៉េរិក ត្រូវបានជួញដូរក្នុងតម្លៃជាង៦១ដុល្លារក្នុងមួយធុងបារ៉ែល ដោយកើនឡើង៥៨សេន ឬ១%។
អ្នកវិភាគបានលើកឡើងថា ការកើនឡើងតម្លៃប្រេងនេះត្រូវបានជំរុញជាចម្បងដោយសារក្រុមប្រទេសផលិតប្រេងធំៗដែលជាសមាជិករបស់ OPEC+ គ្រោងផលិតប្រេងទាបជាងការរំពឹងទុកនៅខែក្រោយ ដើម្បីទប់ស្កាត់ការធ្លាក់ចុះតម្លៃប្រេង។ ប៉ុន្តែទោះជាយ៉ាងណាតម្លៃប្រេងឆៅទំនងជានៅតែធ្លាក់ចុះ ដោយសារភាពមិនច្បាស់លាស់នៃទស្សនវិស័យសេដ្ឋកិច្ចសកល។
ក្រុមអ្នកវិភាគនៅធនាគារ ANZ បាននិយាយក្នុងកំណត់ត្រាមួយថា ការសម្រេចចិត្តរបស់អង្គការ OPEC+ ក្នុងការបង្កើនផលិតកម្មប្រេងជិត១៤ម៉ឺនបារ៉ែលនៅក្នុងខែវិច្ឆិកានោះ អាចធ្វើទៅបានដោយសារតែការកើនឡើងនូវការផ្គត់ផ្គង់ក្រោមការរឹតបន្តឹងទណ្ឌកម្មពីសហរដ្ឋអាម៉េរិក និងអឺរ៉ុបប្រឆាំងនឹងប្រទេសរុស្ស៊ី និងអ៊ីរ៉ង់។ ទន្ទឹមនឹងនេះ ប្រទេសអ៊ុយក្រែន បានបន្តបង្កើនការវាយប្រហារលើរោងចក្រថាមពលរុស្ស៊ី ដោយផ្តោតលើរោងចក្រចម្រាញ់ប្រេងគិរីស៊ី (Kirishi) ដ៏ធំបំផុតមួយរបស់រុស្ស៊ី ដែលមានសមត្ថភាពចម្រាញ់ប្រេងប្រចាំឆ្នាំលើសពី២០លានតោន៕
ដោយ៖ សុខ មង្គល
