សារព័ត៌មាន វៀតណាម ញូស៍ បានរាយការណ៍ថា ដើម្បីប្រឈមមុខនឹងបញ្ហាលំបាកក្នុងវិស័យអចលនទ្រព្យ លោក ផាម មិញជិញ (Pham Minh Chính) នាយករដ្ឋមន្ត្រីវៀតណាម កាលពីថ្ងៃពុធ បានអនុម័តលើសេចក្តីសម្រេចដែលកាត់បន្ថយអត្រាការប្រាក់កម្ចីសម្រាប់អ្នកទិញលំនៅដ្ឋានបែបសង្គមកិច្ចពី ៥ % ឱ្យមកនៅត្រឹម ៤,៨ % វិញ។ ការសម្រេចចិត្តរបស់រដ្ឋាភិបាលវៀតណាមនេះមានគោលបំណងផ្តល់នូវជម្រើសលំនៅដ្ឋានដែលមានតម្លៃសមរម្យជាងមុនសម្រាប់គ្រួសារដែលមានចំណូលទាបនៅក្នុងប្រទេស។
យោងតាមការប្រកាស អត្រាការប្រាក់កម្ចីអនុគ្រោះនេះគឺត្រូវអនុវត្តចំពោះប្រាក់កម្ចីមិនទាន់សង ដើម្បីជួយពលរដ្ឋវៀតណាមឲ្យមានលទ្ធភាពទិញ ជួល សាងសង់ថ្មី ឬជួសជុលផ្ទះ។ ការសម្រេចចិត្តនេះបានចូលជាធរមានចាប់ពីថ្ងៃទី ១០ ខែឧសភា ឆ្នាំ ២០២៣ រហូតដល់ថ្ងៃទី ៣១ ខែធ្នូ ឆ្នាំ ២០២៤។ ប្រភពដដែលបានបន្តថា ធនាគារដែលគ្រប់គ្រងគោលនយោបាយសង្គមគឺជាស្ថាប័នទទួលខុសត្រូវក្នុងការត្រួតពិនិត្យការអនុវត្តសេចក្តីសម្រេចនេះ។
កាលពីខែមុន រដ្ឋាភិបាលវៀតណាមបានអនុម័តគម្រោងវិនិយោគលើការសាងសង់លំនៅដ្ឋានបែបសង្គមកិច្ចយ៉ាងហោចណាស់ ១ លានឯកតា សម្រាប់កម្មករដែលមានប្រាក់ចំណូលទាបនៅក្នុងសួនឧស្សាហកម្ម ចាប់ពីឆ្នាំ ២០២១ ដល់ ឆ្នាំ ២០៣០។ ក្នុងគម្រោងនេះ លំនៅដ្ឋានជាង ១ លាន ៦ ម៉ឺនឯកតា ត្រូវបានកំណត់សាងសង់ឲ្យបាននៅឆ្នាំ ២០៣០ ក្នុងចំណោមនោះ លំនៅដ្ឋានជាង ៤ សែនឯកតា ត្រូវសង់បញ្ចប់ចន្លោះឆ្នាំ ២០២១ និងឆ្នាំ ២០២៥ រីឯ ៦ សែនឯកតាទៀត នឹងសង់ហើយនៅចន្លោះឆ្នាំ ២០២៥ និងឆ្នាំ ២០៣០៕
