អង្គការសុខភាពពិភពលោក នៅថ្ងៃអង្គារទី០៣ មករា ២០២៣ បានអញ្ជើញអ្នកជំនាញចិនមកធ្វើបទបង្ហាញពីទិន្នន័យ និងស្ថានភាពឆ្លងក្នុងប្រទេសចិន ក្នុងកិច្ចប្រជុំប្រឹក្សាបច្ចេកទេសមួយ។ ទន្ទឹមនោះ WHO បានស្នើទៅរដ្ឋអំណាចប៉េកាំង ផ្តល់ឱ្យខ្លួននូវទិន្នន័យអ្នកឆ្លងកូវីដ១៩ ដែលត្រូវចូលសម្រាកមន្ទីរពេទ្យ ចំនួនអ្នកស្លាប់បច្ចុប្បន្ន និងអត្រានៃការចាក់វ៉ាក់សាំងផងដែរ។
មិនទាន់មានសេចក្តីរាយការណ៍ណាមួយពីសំណើរបស់ WHO ចំពោះប្រទេសចិនឡើយ ប៉ុន្តែអ្នកនាំពាក្យអង្គការសុខភាពពិភពលោក បាននិយាយនៅក្រោយកិច្ចប្រជុំថា ពួកគេនឹងបន្តទាក់ទងជាមួយចិនទៀតនៅពេលក្រោយ ហើយនឹងជម្រាបពីលទ្ធនៃកិច្ចប្រជុំ ក្នុងសន្និសិទសារព័ត៌មាន WHO នាសប្តាហ៍នេះ។ អ្នកនាំពាក្យដដែល រំពឹងថា គេអាចនឹងជជែកជាមួយប៉េកាំងឱ្យបានស៊ីជម្រៅ ពីលទ្ធភាពនៃមេរោគបំប្លែងខ្លួននៅប្រទេសចិន និងក្នុងពិភពលោក។
នេះមិនមែនជាលើកដំបូងឡើយចាប់តាំងពីករណីឆ្លងនៅចិន បានកក្រើកឡើងវិញខ្លាំងមក គឺ WHO ព្យាយាមសុំព័ត៌មានលំអិតពីរដ្ឋអំណាចប៉េកាំងជារឿយៗ អំពីស្ថានការណ៍ឆ្លងពិតប្រាកដ។ ផ្ទុយទៅវិញ ចិនថែមទាំងបានបិទ លែងបញ្ចេញទិន្នន័យឆ្លងប្រចាំថ្ងៃជាសាធារណៈនៅក្នុងស្រុករបស់ខ្លួនថែមទៀត ចាប់ពីពាក់កណ្តាលខែធ្នូមក។
អត្ថបទគួរអាន
ទោះយ៉ាងណា នៅថ្ងៃចន្ទសប្តាហ៍នេះប៉េកាំងបានប្រកាសពីករណីស្លាប់ដោយសារកូវីដ១៩ចំនួន ៣ករណីបន្ថែម ដែលធ្វើឱ្យករណីស្លាប់សរុបមានដល់ ៥២៥៣នាក់។ ប៉ុន្តែ តួលេខនេះ មិនត្រូវបានគេជឿថា ជាតួលេខពិតប្រាកដឡើយ ខណៈដែលស្ថាប័នជំនាញនានា បាន ព្យាករណ៍ពីចំនួនអ្នកឆ្លង និងអ្នកស្លាប់ថ្មីៗអាចមានដល់ខ្ទង់លាននាក់។
ដោយឡែកកាលពីថ្ងៃអង្គារ កាសែតចិន People Daily បានចុះផ្សាយថាអ្នកឆ្លងថ្មីក្នុងប្រទេសចិន គឺសុទ្ធសឹងមានអាការៈស្រាលប៉ុណ្ណោះ ក្រៅពីនោះមានតែ៣% ទៅ៤% ទេដែលមានអាការៈធ្ងន់ធ្ងរ។
សូមជម្រាបថា ទោះបីជាមិនមានទិន្នន័យច្បាស់លាស់ ហើយស្ថានការឆ្លងជាក់ស្តែង អាចខុសពីការអះអាងរបស់ប្រព័ន្ធផ្សព្វផ្សាយចិនក៏ដោយ ប៉ុន្តែ ប្រទេសកាន់តែច្រើនហើយ បានផ្តើមដាក់បម្រាម និងលើកវិធានការតឹងរ៉ឹងជាងមុនចំពោះអ្នកដំណើរមកពីប្រទេសចិន ក្នុងនោះមានប្រទេសធំនៅអឺរ៉ុប នៅអាស៊ី និងមួយចំនួនក្នុងតំបន់អាស៊ានផងដែរ៕
