បុគ្គលិកនៅកំពង់ Felixstowe នៅឆ្នេរសមុទ្រភាគខាងកើតប្រទេសអង់គ្លេសកំពុងធ្វើសកម្មភាពតវ៉ាទៅកាន់ថៃកែកំពង់ផែ ដើម្បីទាមទារការដំឡើងប្រាក់ឈ្នួល ហើយនេះ គឺជាការផ្ទុះការធ្វើកូដកម្មថ្មីចុងក្រោយបំផុតមួយ ដែលបានធ្វើឡើងនៅប្រទេសអង់គ្លេស ខណៈដែលក្រុមសហជីពទាមទារ សុំដំឡើងប្រាក់ខែសម្រាប់ក្រុមកម្មករ ដែលពួកគេទាំងនោះកំពុងប្រឈមនឹងវិបត្តិនៃការចំណាយទ្រទ្រង់ជីវិត។
លោក Bobby Morton មន្ត្រីថ្នាក់ជាតិទទួលបន្ទុកសហជីពបង្រួបបង្រួម (Unite) សម្រាប់កំពង់ផែបាននិយាយថា សកម្មភាពកូដកម្មនេះនឹងបង្កឱ្យមានការរំខានយ៉ាងខ្លាំង និងបង្កើតការភ្ញាក់ផ្អើលយ៉ាងខ្លាំងនៅទូទាំងខ្សែចង្វាក់ផ្គត់ផ្គង់របស់ចក្រភពអង់គ្លេសផងដែរ ប៉ុន្តែជម្លោះនេះគឺបណ្ដាលមកពីក្រុមហ៊ុនផ្ទាល់ទាំងស្រុងតែម្ដង។
លោក Morton បានបន្ថែមទៀតថា ក្រុមហ៊ុននេះមានគ្រប់ឱកាសទាំងអស់ ដើម្បីធ្វើឱ្យសមាជិករបស់ពួកគេទទួលបានភាពយុត្តិធម៌ ប៉ុន្តែពួកគេមិនព្រមធ្វើបែបនោះទាល់តែសោះ។
កាលពីសប្ដាហ៍មុន ក្រុមហ៊ុនប្រតិបត្តិករ Hutchison Ports នៅកំពង់ផែ Felixstowe បាននិយាយថា កំពង់ផែនេះជឿថា ការដំឡើងប្រាក់ឈ្នួល ៧% គួបផ្សំប្រាក់លើកទឹកចិត្តចំនួនប្រហែលជាង ៦០០ដុល្លារទៀត ដល់កម្មករនោះ គឺសមរម្យ។ ខាងក្រុមហ៊ុនកំពង់ផែនេះបានបញ្ជាក់ថា សហជីពកម្មករនៅកំពង់ផែនេះ ដែលតំណាងឱ្យបុគ្គលិកប្រហែល ៥០០ នាក់កាន់តួនាទីជាអ្នកត្រួតពិនិត្យ វិស្វកម្ម និងលេខានោះ បានយល់ព្រមទទួលយកការផ្ដល់ឱ្យរបស់កំពង់ផែនេះរួចហើយដែរ។
អត្ថបទគួរអាន
ទោះយ៉ាងណា សហជីពបង្រួបបង្រួម (Unite) ដែលតំណាងឱ្យកម្មករកំពង់ផែជាច្រើននោះ បាននិយាយថា ការផ្ដល់ឱ្យរបស់កំពង់ផែនេះ គឺនៅទាបជាងអត្រាអតិផរណាបច្ចុប្បន្នទៅទៀត ហើយវាក៏មានកម្រិតទាបជាងកំណើនអតិផរណាកាលពីឆ្នាំមុនផងដែរ។
អ្នកនាំពាក្យក្រុមហ៊ុន Hutchison Ports បាននិយាយថា កំពង់ផែនេះសម្ដែងការសោកស្ដាយថា សកម្មភាពកូដកម្មនេះ នឹងមានផលប៉ះពាល់ទៅលើខ្សែចង្វាក់ផ្គត់ផ្គង់របស់ចក្រភពអង់គ្លេស។
កំពង់ផែននេះបាននិយាយថា ពួកគេនឹងរៀបចំផែនការដែលស្រាប់នេះឡើងវិញ និងកំពុងធ្វើការកាត់បន្ថយការរំខានពីការធ្វើកូដកម្ម ដែលនឹងមានរយៈពេល៨ថ្ងៃ ពោលគឺរហូតដល់ថ្ងៃទី២៩ ខែសីហា។
ក្រុមដឹកជញ្ជូន Maersk ដែលជាក្រុមហ៊ុនដឹកជញ្ជូនកុងតឺន័រដ៏ធំបំផុតមួយនៅក្នុងពិភពលោក បានព្រមានថា សកម្មភាពនេះនឹងមានផលប៉ះពាល់យ៉ាងខ្លាំងដែលបណ្តាលឱ្យមានការពន្យារពេលប្រតិបត្តិការ និងបង្ខំឱ្យផ្លាស់ប្តូរការចូលចតរបស់នាវានៅកំពង់ផែនេះផងដែរ។
តួលេខចេញផ្សាយកាលពីថ្ងៃទី១៧ ខែសីហាបានបង្ហាញថា អតិផរណាតម្លៃទំនិញប្រើប្រាស់នៅចក្រភពអង់គ្លេសបានឡើងដល់ជាង ១០% នៅក្នុងខែកក្កដា ដែលជាកម្រិតខ្ពស់បំផុតចាប់តាំងពី ១៩៨២មក ហើយអ្នកសេដ្ឋកិច្ចមួយចំនួនបានព្យាករណ៍ថា វានឹងឡើងដល់ ២៥% ក្នុង រយៈពេលបីខែដំបូងនៃឆ្នាំក្រោយនៅចំពេលមានការកើនឡើងថ្លៃថាមពល និងស្បៀងអាហារ។
សូមរំលឹកថា កន្លងមក នៅអង់គ្លេសក៏មានការធ្វើកូដកម្មពីសំណាក់កម្មករផ្លូវដែក និងរថយន្តក្រុង ដែលបានទាមទារការដំឡើងប្រាក់ខែផងដែរ៕
អត្ថបទ៖ សុខ ជា
