តើលោកអ្នកធ្លាប់បានភ្លក្សសម្ល"ប្រូង"របស់ជនជាតិដើមភាគតិចទេ?

សម្ល«ប្រូង» គឺជាឈ្មោះដើមរបស់ម្ហូបមួយប្រភេទនៃជនជាតិដើមភាគតិចទំពួន ដែលគេស្លនៅក្នុងបំពង់ឫស្សី ជំនួសការប្រើប្រាស់ឆ្នាំង។

កញ្ញា ម៉ែ ស្រីពិ ជាចុងភៅជនជាតិដើមភាគតិចទំពួនអស់រយៈពេល៥ឆ្នាំមកហើយ និងកំពុងបម្រើការងារនៅផ្ទះបាយជនជាតិដើមភាគតិច ក្នុងរាជធានីភ្នំពេញ បានឲ្យដឹងថា សម្លនេះត្រូវបានពលរដ្ឋជនជាតិទំពួនពេញនិយមខ្លាំង ពីព្រោះ ពួកគេមិនចាំបាច់ស្ពាយឆ្នាំងសម្លចូលព្រៃនោះទេ គឺមានតែបំពង់ឫស្សីមួយថ្នាំង ពួកគេអាចចម្អិនអាហារដ៏មានរសជាតិឈ្ងុយឆ្ងាញ់បានយ៉ាងងាយស្រួល។

កញ្ញា ម៉ែ ស្រពិ បញ្ជាក់យ៉ាងដូច្នេះថា៖ «ពីបុរាណមក ជនជាតិភាគតិចច្រើនរស់នៅក្នុងព្រៃ ដែលមិនសូវមានឆ្នាំងដូចឥឡូវនោះទេ ដូច្នេះ ទើបពួកគាត់យកបំពង់ឫស្សីមកដុតចម្អិន។ ម្យ៉ាង បំពង់ឫស្សី វាមានក្លិនឈ្ងុយផង»។