ឧកញ៉ា សៀ ឫទ្ធី៖ វិស័យ៣ ដែលធ្វើឲ្យខេត្តព្រះសីហនុមានសក្ដានុពលខ្លាំងបំផុតនៅអនាគត

ខេត្តព្រះសីហនុ ធ្លាប់តែជាខេត្តទិសដៅទេសចរណ៍និងមានការប្រែប្រួលកំណើនទេសចរទៅតាមរដូវកាល ប៉ុន្ដែ បច្ចុប្បន្ននេះ ខេត្តជាប់ដែនសមុទ្រមួយនេះ ក៏ជាក្លាយជាចំណុចប៉ូលសេដ្ឋកិច្ចដ៏សំខាន់សម្រាប់ប្រទេសកម្ពុជាផងដែរ។

លោកឧកញ៉ា សៀ ឫទ្ធី ប្រធានក្រុមប្រឹក្សាភិបាលក្រុមហ៊ុន WorldBridge Group។ រូបថត៖ ហេង ភារម្យ

ជាក់ស្ដែង គិតត្រឹមប៉ុន្មានឆ្នាំចុងក្រោយនេះ កំណើនវិនិយោគិនបរទេសមកបណ្ដាក់ទុនរកស៊ីនៅក្នុងខេត្តមួយនេះ បាននិងកំពុងមានការកើនឡើងជាលំដាប់ ខណៈដែលមធ្យោបាយដឹកជញ្ជូនទំនិញ និងទេសចរណ៍ ក៏មានភាពល្អប្រសើរគួរឲ្យកត់សម្គាល់។

វិនិយោគិនដែលកំពុងមានឈ្មោះបោះសំឡេងខ្លាំងក្នុងវិស័យជំនួញ លោកឧកញ៉ា សៀ ឫទ្ធី ប្រធានក្រុមប្រឹក្សាភិបាល និងជាអគ្គនាយកក្រុមហ៊ុន WorldBridge Group បានលើកឡើងថា នៅអនាគត ប្រមាណជា ១០ឆ្នាំទៀត ខេត្តព្រះសីហនុ នឹងក្លាយជាតំបន់ប៉ូលសេដ្ឋកិច្ចដ៏សំខាន់បំផុតរបស់កម្ពុជា និងអាចមានការរីកលូតលាស់ខ្លាំងជាងខេត្តទេសចរណ៍ប្រវត្តិសាស្ត្រ សៀមរាបទៀតផង។

លោកឧកញ៉ា សៀ ឫទ្ធី ថ្លែងថា មានវិស័យសំខាន់បំផុត ៣ ដែលនឹងធ្វើឲ្យខេត្តព្រះសីហនុមានសក្ដានុពលខ្លាំងបំផុត នៅពេលអនាគត៖

១, វិស័យទេសចរណ៍៖

ក្នុងមួយឆ្នាំៗ កម្ពុជាទទួលបានភ្ញៀវទេសចរណ៍រាប់លាននាក់ ហើយក្នុងនោះ ខេត្តព្រះសីហនុ គឺជាទិសដៅទេសចណ៍ដ៏សំខាន់មួយស្ថិតក្នុងក្រសែភ្នែករបស់ទេសចរជាតិ និងអន្តរជាតិ ជាមួយនឹងឆ្នេរខ្សាច់សស្អាតប្រវែង ១៧៥គីឡូម៉ែត្រ ជាប់លំដាប់ពិភពលោក និងមានកោះដ៏ស្រស់ស្អាតចំនួន ៣២កោះ។

ឆ្នេរខ្សាច់ដ៏ស្អាតនៅលើកោះរ៉ុង ខេត្តព្រះសីហនុ។ រូបថតពី ហ្វេសប៊ុក

ស្របតាមគោលនយោបាយអភិវឌ្ឍន៍ខេត្តព្រះសីហនុ ឲ្យដូចជាទីក្រុងស៊ិនជិន ប្រទេសចិន ឬទីក្រុងម៉ាកាវទី២ ក៏បានធ្វើឲ្យខេត្តមួយនេះ បានក្លាយជាមុខព្រួញដ៏សំខាន់ពីសំណាក់វិនិយោគិន និងភ្ញៀវទេសចរចិន ខណៈដែលរាជរដ្ឋាភិបាលកម្ពុជាបានដាក់គោលដៅស្រូបយកទេសចរចិនឲ្យបាន២លាននាក់នៅត្រឹមឆ្នាំ២០២០។

ជាក់ស្តែង ត្រឹមរយៈពេល៩ខែ ឆ្នាំ២០១៧នេះ កម្ពុជាទទួលបានទេសចរអន្តរជាតិ ៣,៥២២,៣៨៣នាក់ កើនឡើង ១២% ក្នុងនោះ តំបន់ឆ្នេរទទួលបាន ៥៥៤,៦១៣នាក់ កើនឡើង ១៥.៧%។ ជាចក្ខុវិស័យឆ្នាំ២០២០ កម្ពុជារំពឹងទទួលបានទេសចរអន្តរជាតិប្រមាណ ៧លាននាក់ នាំចំណូលចូលជាតិប្រមាណ ៥ពាន់លានដុល្លារ និងបង្កើតការងារផ្ទាល់ជិត ១លាននាក់។

២, វិស័យឧស្សាហកម្ម៖

កំណើនរោងចក្រសហគ្រាស សណ្ឋាគារ ភោជនីយដ្ឋាន មជ្ឈមណ្ឌលកម្សាន្ដ កាស៊ីណូ បាននិងកំពុងមានសន្ទុះកើនឡើងពីមួយឆ្នាំទៅមួយឆ្នាំ។ ប្រមុខរាជរដ្ឋាភិបាលកម្ពុជា ក៏ធ្លាប់បានលើកឡើងដែរថា ខេត្តព្រះសីហនុ មិនត្រឹមតែជាទិសដៅទេសចរណ៍ប៉ុណ្ណោះទេ តែវាជាក្បាលនាគសេដ្ឋកិច្ចដ៏សំខាន់របស់កម្ពុជានាអនាគត។

រូបតំណាង៖ កំពង់ផែស្វយ័តក្រុងព្រះសីហនុ។ រូបភាព៖ ហ្វេសប៊ុកកំពង់ផែ

តួយ៉ាង តំបន់សេដ្ឋកិច្ចពិសេស៣កន្លែង កំពុងមានភាពមមាញឹកខ្លាំង ក្នុងការជំរុញដល់កំណើនសេដ្ឋកិច្ចក្នុងតំបន់ ក្នុងនោះរួមមាន តំបន់សេដ្ឋកិច្ចពិសេសខេត្តព្រះសីហនុ ឬតំបន់សេដ្ឋកិច្ចពិសេសបិតត្រាំង ជាបណ្ដុំឧស្សាហកម្មមួយរីកចម្រើនខ្លាំងជាងគេ ខណៈមានរោងចក្ររាប់រយរោងចក្របាននិងកំពុងដំណើរការនៅទីនោះ ជាមួយនឹងការផ្ដល់ការងារជូនប្រជាពលរដ្ឋរាប់ម៉ឺននាក់ផងដែរ។

ដោយឡែក ការកើនឡើងនៃវិស័យសណ្ឋាគារវិញ ក៏កំពុងមានច្រើនផងដែរ តែបើតាមការអះអាងពីលោកឧកញ៉ា សៀ ឫទ្ធី ចំនួនសណ្ឋាគារនៅមិនទាន់ឆ្លើយតបគ្រប់គ្រាន់នឹងតម្រូវការទេសចរនាពេលអនាគតនៅឡើយទេ។

៣, វិស័យដឹកជញ្ជូន៖

ខេត្តព្រះសីហនុ ត្រូវបានស្គាល់ច្បាស់ថា ជាច្រកចេញចូលដោះដូរទំនិញដ៏សំខាន់តាមផ្លូវសមុទ្រ ខណៈដែលកំពង់ផែថ្មីទឹកជ្រៅ បាននិងកំពុងធ្វើការសាងសង់។ បន្ទាប់ពីគម្រោងកំពង់ផែថ្មី ដែលមាន ប្រវែង ៣៥០ម៉ែត្រ និងជម្រៅទឹក ១៤.៥ម៉ែត្រ បញ្ចប់ការសាងសង់រួចរាល់នៅ ៣ ឬ ៤ឆ្នាំ ខាងមុខទៀត នោះកប៉ាល់ដឹកទំនិញធុនធ្ងន់ និងកប៉ាល់ទេសចរខ្នាតយក្សៗនឹងអាចចូលចតបានងាយស្រួល ខណៈដែលការដឹកទំនិញចេញចូលកម្ពុជាមានប្រមាណ ៧០% ទៅ ៨០% ដឹកជញ្ជូនតាមផ្លូវសមុទ្រ។

រថភ្លើងរបស់ក្រុមហ៊ុន Royal Railway ដែលជាបុត្រសម្ព័ន្ធក្រុមហ៊ុន Royal Group។ រូបភាព៖ គេហទំព័រ Royal Railway

ជាមួយគ្នានេះ ជើងហោះហើរត្រង់ពីបរទេសចូលមកព្រលានយន្ដហោះខេត្តព្រះសីហនុ បាននិងកំពុងមានការកើនឡើងច្រើនគួរឲ្យកត់សម្គាល់ ដែលវាបានបង្ហាញឲ្យឃើញពីសញ្ញាកាន់តែប្រសើរក្នុងវិស័យដឹកជញ្ជូន។

ជាមួយគ្នានេះ ស្របតាមគោលនយោបាយអភិវឌ្ឍរបស់រាជរដ្ឋាភិបាល ព្រលានយន្ដហោះខេត្តព្រះសីហនុនេះ ក៏នឹងក្លាយជាព្រលានយន្ដហោះដ៏ធំជាងគេបំផុតនៅកម្ពុជាផងដែរ។ លើសពីនេះទៀត ការតភ្ជាប់ផ្លូវរថភ្លើងពីភ្នំពេញទៅកាន់ខេត្តព្រះសីហនុ ដែលមានប្រវែង ២៦៦គីឡូម៉ែត្រ ត្រូវបានចាប់ដំណើរការឡើងវិញ ដែលបានជំរុញឲ្យការធ្វើដំណើរ និងការដឹកជញ្ជូនរវាងខេត្តព្រះសីហនុ មកកាន់រាជធានីភ្នំពេញកាន់តែមានភាពប្រសើរឡើង ខណៈដែលគម្រោងផ្លូវល្បឿនលឿន (Express Way) ផ្លូវជាតិលេខ៤ ដែលមានប្រវែងប្រមាណ ២២៦គីឡូម៉ែត្រ ពីភ្នំពេញ ទៅខេត្តព្រះសីហនុ កាត់តាមខេត្តកំពង់ស្ពឺ ក៏កំពុងត្រូវបានសិក្សានិងត្រៀមចាប់ផ្ដើមសាងសង់នៅឆ្នាំ២០២០ខាងមុខ។

ប៉ូលសេដ្ឋកិច្ចទាំង៣នេះ ត្រូវបានលោកឧកញ៉ា សៀ ឫទ្ធី អះអាងថា នឹងធ្វើឲ្យខេត្តព្រះសីហនុនឹងក្លាយជាទីក្រុងថ្មីពោរពេញទៅដោយការអភិវឌ្ឍលើពហុវិស័យនាពេលអនាគត ពោលគឺអាចនឹងមានការរីកលូតលាស់ខ្លាំងជាងខេត្តទេសចរណ៍សំខាន់ៗជាច្រើនផ្សេងទៀត ដូចជា ខេត្តសៀមរាប ជាដើម។

គួរជម្រាបថា សន្ទុះនៃការអភិវឌ្ឍនៅក្នុងខេត្តព្រះសីហនុនេះ ក៏បានធ្វើឲ្យតម្លៃដីធ្លីក្នុងខេត្តនេះមានការកើនឡើងខ្ពស់គួរឲ្យកត់សម្គាល់ ពិសេស គឺតាមរយៈក្នុងការហូរចូលយ៉ាងគំហុកនៃវិនិយោគិនចិន។

ទោះយ៉ាងណា ក៏មានមតិមួយចំនួនលើកឡើងដែរថា កំណើននៃវិនិយោគិននៅខេត្តព្រះសីហនុ ក៏បានធ្វើឲ្យប៉ះពាល់ដល់ការប្រកបអាជីវកម្មរបស់ពាណិជ្ជករ ក៏ដូចជាសហគ្រិនក្នុងស្រុកនៅខេត្តនេះផងដែរ។ ចង់ដឹងថា តើកំណើននៃវិនិយោគិនចិននៅខេត្តព្រះសីហនុ នឹងប៉ះពាល់ដល់របរសហគ្រិនក្នុងស្រុក ឬយ៉ាងណានោះ សូមរង់ចាំតាមដានជាមួយ ខេមបូណូមីស នៅអត្ថបទក្រោយបន្តទៀត!!!