គម្រោងសាងសង់ទីក្រុងដ៏ធំមួយតម្លៃជិត១៣ពាន់លានដុល្លារនៅហុងកុង ត្រូវបានជាប់គាំងក្រោយក្រុមហ៊ុនអភិវឌ្ឍន៍ជួបវិបត្តិហិរញ្ញវត្ថុធ្ងន់ធ្ងរ

គម្រោងសាងសង់ទីក្រុងអាកាសយានដ្ឋានតម្លៃជិត១៣ពាន់លានដុល្លារនៅហុងកុង បានជាប់គាំងដោយសារក្រុមហ៊ុនអភិវឌ្ឍន៍ជួបវិបត្តិហិរញ្ញវត្ថុធ្ងន់ធ្ងរ ហើយផ្សារទំនើប 11 Skies ដែលស្ថិតនៅក្នុងគម្រោងខ្នាតយក្សខាងលើនេះ រកអ្នកជួលបានតិចតួច។ ផ្សារទំនើប 11 Skies ដែលមានទីតាំងនៅជាប់នឹងអាកាសយានដ្ឋានអន្តរជាតិ ហុងកុង ត្រូវបានរចនាឡើងជាផ្សារទំនើបដ៏ធំបំផុតមួយនៅហុងកុង ដែលមានហាងរហូតដល់ទៅ៨០០ហាងអមជាមួយការិយាល័យ និងកន្លែងទាក់ទាញជាច្រើនដូចជាកន្លែងកម្សាន្តសម្រាប់កុមារជាដើម។

យោងតាមផែនការ ផ្សារទំនើប 11 Skies គ្រោងបើកដំណើរការជាដំណាក់កាលៗគិតចាប់ពីឆ្នាំ២០២៦ តទៅ ប៉ុន្តែបច្ចុប្បន្នផ្សារទំនើបនេះអាចរក្សាអ្នកជួលបានត្រឹមតែប្រមាណ៤០% ប៉ុណ្ណោះនៃកន្លែងលក់រាយក្នុងផ្សារនេះទាំងមូល។

សូមបញ្ជាក់ថា ក្រុមហ៊ុនអភិវឌ្ឍន៍ New World Development កំពុងជាប់បំណុល២១០លានដុល្លារ ហើយបានពន្យារពេលការទូទាត់បំណុលរួចមកហើយ។ ក្រុមហ៊ុននេះប្រកាសថា ខ្លួនបានខាតបង់ជាង១៦ពាន់លានដុល្លារនៅក្នុងឆ្នាំសារពើពន្ធ២០២៤ ដែលបានបិទបញ្ចប់នៅខែមិថុនា ឆ្នាំ២០២៥។

ហើយទោះបីជាធនាគារនានា បានជួយអន្តរាគមន៍តាមរយៈការរៀបចំឥណទានឡើងវិញ និងផ្តល់ប្រាក់កម្ចីថ្មីៗដល់ក្រុមហ៊ុនអភិវឌ្ឍន៍ New World Development យ៉ាងណាក៏ដោយ មន្ទិលនៅតែមានចំពោះអនាគតរបស់ក្រុមហ៊ុននេះ។ អ្នកជំនាញបានលើកឡើងថា ដោយសារតែគម្រោងទីក្រុងអាកាសយានដ្ឋាននេះពឹងផ្អែកខ្លាំងលើការវិនិយោគឯកជន ភាពជោគជ័យរបស់គម្រោងខ្នាតយក្សនេះត្រូវពឹងអាស្រ័យលើការងើបឡើងវិញរបស់ក្រុមហ៊ុនអភិវឌ្ឍន៍ New World Development៕

ដោយ: តែម សុខុម