លោកស្រី ខ្លូអេ ឡាប៉េរ នាយិកាគ្រប់គ្រងទូទៅអាកាសយានដ្ឋានអន្តរជាតិភ្នំពេញ បានឲ្យដឹងថា គិតចាប់ពីខែ មករា ដល់ខែមិថុនា ឆ្នាំនេះ អាកាសយានដ្ឋានអន្តរជាតិទាំងបី របស់កម្ពុជា ទទួលបានភ្ញៀវធ្វើដំណើរប្រមាណ ៥,២ លាននាក់។ ក្នុងនោះ អាកាសយានដ្ឋានអន្តរជាតិភ្នំពេញ មានចរាចរណ៍មមាញឹកជាងគេ ខណៈដែលជើងហោះហើរ ក្នុងអាកាសយានដ្ឋានមួយនេះ មានរហូតដល់៧០ ទៅ៩០ ជើងក្នុងមួយថ្ងៃ ក្នុងចំណោមជើងហោះហើរសរុប ជាង ១០០ជើង នៃអាកាសយានដ្ឋានទាំងបីកន្លែង។ រីឯ ក្រុមហ៊ុនអាកាសចរណ៍ ដែលកំពុងប្រតិបត្តិការផ្ដល់សេវាហោះហើរវិញ មានរហូតដល់ជាង ៤០ក្រុមហ៊ុន។
អត្ថបទទាក់ទង!
លោកស្រី ឡាប៉េរ បានបញ្ជាក់ទៀតថា បច្ចុប្បន្ន សមត្ថភាពអាកាសយានដ្ឋានរបស់កម្ពុជាពិសេស អាកាសយានដ្ឋានអន្តរជាតិភ្នំពេញ អាចទទួលជើងហោះហើរបានច្រើនជាងចំនួនដែលមាននាពេលបច្ចុប្បន្ននេះ ខណៈដែលកន្លងមកអាកាសយានដ្ឋានអន្តរជាតិភ្នំពេញបានពង្រីកហេដ្ឋារចនាសម្ព័ន្ធរបស់ខ្លួនកាន់តែប្រសើរ ដើម្បីបំពេញតម្រូវការកំណើននៃវិស័យអាកាសចរណ៍កម្ពុជា។
ជាមួយគ្នានេះ ចំនួនអ្នកធ្វើដំណើរក្នុងស្រុកតាមអាកាសយានដ្ឋានទាំងបីទីតាំង ក្នុងរយៈពេល ៦ខែនេះ ដែរ ឃើញថា មានប្រមាណ ៥២ម៉ឺននាក់ កើនឡើង ២៣ ភាគរយ ធៀបនឹងគ្រាដូចគ្នាកាលពីឆ្នាំ ២០១៧ ខណៈដែលក្រុមហ៊ុនអាកាសចរណ៍ ដែលបានផ្ដល់ជើងហោះហើរក្នុងស្រុក នាពេលបច្ចុប្បន្ន មានចំនួន ៦ក្រុមហ៊ុនហើយ និងមានជើងហោះហើរ មានចន្លោះពី ៧ ទៅ១០ ជើង ក្នុងមួយថ្ងៃ ឬស្មើនឹងប្រមាណ តិចជាង ១០% នៃជើងហោះហើរសរុប។
លោកស្រី ខ្លូអេ ឡាប៉េរ បានគូសបញ្ជាក់ដែរថា កម្ពុជា នៅមានសក្ដានុពលផ្នែកទេសចរណ៍ធំធេងណាស់ ដែលជាផ្នែកមួយ ផ្ដល់ឲ្យគ្នាទៅវិញទៅមក ជាមួយនឹងវិស័យអាកាសចរណ៍ ហើយខាងអាកាសយានដ្ឋានកម្ពុជា នឹងធ្វើការងារ បន្ថែមទៀត ជាមួយរាជរដ្ឋាភិបាលកម្ពុជាក្នុងការជំរុញកំណើននៃវិស័យទេសចរណ៍ឲ្យមានសន្ទុះកាន់តែខ្លាំងក្លាឡើង។
លោកស្រី ខ្លូអេ ឡាប៉េរ មានប្រសាសន៍យ៉ាងដូច្នេះថា «កម្ពុជានៅមិនទាន់បញ្ចប់សក្ដានុពលផ្នែកទេសចរណ៍របស់ខ្លួននៅឡើយទេ។ ដូចជាយើងដឹងស្រាប់ហើយ បច្ចុប្បន្ន មានគម្រោងអភិវឌ្ឍន៍ធំៗជាច្រើនបាននិងកំពុងបន្តនៅកម្ពុជា ហើយយើងនឹងធ្វើការងារឲ្យកាន់តែជិតស្និទ្ធថែមទៀត ជាមួយនឹងក្រសួងទេសចរណ៍កម្ពុជា ដើម្បី គាំទ្រ និងអភិវឌ្ឍន៍ សក្ដានុពលទេសចរណ៍នេះ ទៅតាមអ្វីដែលយើងអាចធ្វើទៅបាន ហើយទីផ្សារច្បាស់ណាស់ គឺនឹងមានការកើនឡើង»។
តើអ្នកបានអានអត្ថបទនេះហើយឬនៅ?
សូមជម្រាបថា គិតរយៈពេលពេញមួយឆ្នាំ ២០១៧ កន្លងទៅនេះ
កំណើនភ្ញៀវធ្វើដំណើរតាមផ្លូវអាកាស ដែលបានឆ្លងកាត់អាកាសដ្ឋានទាំងបី
របស់កម្ពុជា មានរហូតដល់ជាង ៨លាននាក់ ពោលគឺមានការកើនឡើង២៥%
ធៀបនឹងឆ្នាំ២០១៦។
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
