សញ្ញាអវិជ្ជមាននេះ ក៏បានបង្ហាញថា ក្រុមហ៊ុនបច្ចេកវិទ្យាបន្ទះឈីបរបស់ចិន បាននិងកំពុងចាប់ផ្តើមជួបវិបត្តិជាបណ្តើរៗហើយ ដោយសារតែសង្គ្រាមពាណិជ្ជកម្ម ក៏ដូចជាសង្គ្រាមបច្ចេកវិទ្យារវាងប្រទេសមហាអំណាចធំបំផុតក្នុងពិភពលោកទាំងពីរនេះ។ នេះបើតាមការចុះផ្សាយរបស់ Nikkei Asia។
ក្រុមហ៊ុន Apple ដែលគ្រោងប្រើបន្ទះឈីបរបស់ក្រុមហ៊ុនយក្សចិន Yangtze Memory Technologiesនោះ ត្រូវបានប្រភពជាច្រើនអះអាងថា Apple បានសម្រេចផ្អាកគម្រោងនេះវិញហើយ បន្ទាប់ពីរដ្ឋបាលលោក ចូ បៃឌិន បានដាក់វិធានការរឹតត្បិតការនាំចេញបច្ចេកវិទ្យាផលិតឈីបទៅកាន់ប្រទេសចិន កាលពីពេលថ្មីៗនេះ។ ការដាក់កំហិតរបស់អាមេរិកនេះ បានប៉ះពាល់យ៉ាងខ្លាំងដល់ឧស្សាហកម្មរបស់ចិន។ ទោះជាយ៉ាងណាក៏ ជុំវិញដំណឹងដ៏ស្រួចស្រាល់នេះ មិនទាន់ត្រូវបានបញ្ជាក់ពីក្រុមហ៊ុនទាំងពីរនៅឡើយទេ។
មែនទែនទៅ Apple បានបញ្ចប់ដំណើរការមួយក្នុងការសម្រេចប្រើប្រាស់ឈីបអង្គចងចាំប្រភេទ 128-layer 3D NAND សម្រាប់បំពាក់នៅក្នុងទូរសព្ទ iPhone រួចមកហើយ តាំងតែពីក្រុងវ៉ាស៊ីងតោនបានបញ្ចេញផែនការរឹតត្បិតនេះមកម្ល៉េះ។
អត្ថបទគួរអាន
សូមជម្រាបថា ឈីបអង្គចងចាំ NAND គឺជាសមាសភាគដ៏សំខាន់បំផុតមួយសម្រាប់បំពាក់លើរាល់ឧបករណ៍អេឡិចត្រូនិច រួមមានដូចជា ស្មាតហ្វូន និងកុំព្យូទ័រជាដើម។ ចំណែកឈីបដែល Apple គ្រោងនឹងប្រើខាងលើនេះ គឺជាបច្ចេកវិទ្យាចុងក្រោយរបស់ក្រុមហ៊ុន Yangtze Memory Technologies ដែលជាក្រុមហ៊ុនផលិតបន្ទះឈីបកំពូលមួយ តាមពីក្រោយក្រុមហ៊ុនកូរ៉េ Samsung និង Micron របស់អាមេរិក។ យ៉ាងណាមិញ Apple ដែលចង់ប្រើឈីបចិននេះ ក៏ដោយសារវាមានតម្លៃធូរថ្លៃប្រមាណ ២០% ធៀបនឹងឈីបរបស់ Samsung ។
យោងតាមប្រភពដែលបានប្រាប់ Nikkei Asia បានឱ្យដឹងថា ដំបូងឡើយ Apple គ្រោងនឹងប្រើប្រាស់ឈីបរបស់ក្រុមហ៊ុនចិនមួយនេះ សម្រាប់តែ iPhone ដែលលក់នៅទីផ្សារចិនប៉ុណ្ណោះ។ ហើយមុននឹងផ្អាកផែនការប្រើប្រាស់បន្ទះឈីបរបស់ក្រុមហ៊ុនចិននេះ ក្រុមហ៊ុនអាមេរិក Apple ក៏បានពិចារណាបង្កើនការប្រើប្រាស់ឈីបនេះដល់ ៤០% សម្រាប់ iPhone របស់ខ្លួនទាំងអស់ផងដែរ។
សូមរំលឹកថា Apple បានចាប់ផ្តើមផ្សារភ្ជាប់ទំនាក់ទំនងជាមួយក្រុមហ៊ុនចិន Yangtze Memory Technologies តាំងពីដើមឆ្នាំ២០១៨ ខណៈដែលក្រុមហ៊ុនបច្ចេកយក្សអាមេរិកនេះ កំពុងស្វែងរកប្រភពផ្គត់ផ្គង់ ដែលមានតម្លៃធូរថ្លៃ។
គួរដឹងដែរថា ក្រុមហ៊ុន Yangtze Memory Technologies ក៏បានចាប់ផ្តើមងាកចេញបន្តិចម្តងៗពីការពឹងផ្អែកលើដង្ហើមរបស់ក្រុមហ៊ុនអាមេរិកផងដែរ បន្ទាប់ពីបានឃើញមេរៀនជាក់ស្តែងរបស់ក្រុមហ៊ុន Huawei ដែលត្រូវបានរដ្ឋាភិបាលអាមេរិក ដាក់ទណ្ឌកម្មកាលពីឆ្នាំ២០២០៕
អត្ថបទ៖ នៅ សំភី
