ចិន ទទួលបានចំណូលជាង៦ពាន់លានដុល្លារ ពីទេសចរណ៍ក្នុងស្រុករបស់ខ្លួន

បញ្ហាជំងឺកូវីដ១៩ បានធូរស្បើយឡើងវិញពលរដ្ឋចិន ត្រូវបានអនុញ្ញាតឲ្យធ្វើដំណើរកម្សាន្តក្នុងស្រុក ដោយក្នុងនោះ ទិសដៅទេសចរណ៍សំខាន់ៗ គឺស្ថិតក្រោមវិធានការទប់ស្កាត់ច្បាស់លាស់ ដើម្បីធានាឲ្យបាននូវ សុវត្ថិភាពសុខភាពរបស់ភ្ញៀវ ជាចម្បង។

ក្រុមហ៊ុនទេសចរណ៍ជាច្រើន នៅខេត្តហៃណាន ភាគខាងត្បូងនៃប្រទេសចិន បានផ្តល់ជា កញ្ចប់ដំណើរកម្សាន្តបែបគ្រួសារ នឹងផលិតផលទេសចរណ៍ជាច្រើនមុខទៀត ដើម្បីបំពេញតម្រូវការរបស់ ភ្ញៀវទេសចរណ៍ ដែលកំពុងមានសន្ទុះកើនឡើង នាពេលនេះ។

ជាងនេះទៅទៀត ដើម្បីស្រោចស្រង់ដល់ ជីវភាពរបស់ប្រជាពលរដ្ឋ​ចិន និងការអភិវឌ្ឍន៍សេដ្ឋកិច្ចឡើងវិញ រដ្ឋាភិបាលចិន បានបង្កើតវិធីសាស្រ្តជាច្រើន ដោយក្នុងនោះ មានទាំង ការបង្កើត គូប៉ុងបញ្ចុះតម្លៃពិសេស សម្រាប់ទិញទំនិញ ចែកជូនដល់ ប្រជាពលរដ្ឋចិនថែមទៀតផង។

គិតមកដល់ថ្ងៃទី ៥ ខែ ឧសភា ឆ្នាំ២០២០ ករណីជំងឺ កូវីដ១៩ នៅក្នុងប្រទេសចិន មានជាង ៨ម៉ឺនករណី ដោយក្នុងនោះ ៧ម៉ឺន ៧ពាន់នាក់ បានជាសះស្បើយហើយ ខណៈមានមនុស្សស្លាប់ជាង ៤ពាន់ករណី៕