ថ្លែងនៅក្នុងពិធីបើកកិច្ចប្រជុំប្រចាំឆ្នាំរបស់សភាប្រជាជនចិន លោកលី ឃឺឈាំង នាយករដ្ឋមន្ត្រីបាននិយាយថា ទីក្រុងប៉េកាំងឈរលើគោលការណ៍ "ចិនតែមួយ" ជានិច្ចដែលវាបញ្ជាក់ថា តៃវ៉ាន់ជាផ្នែកនៃប្រទេសចិន។ លោកឲ្យដឹងទៀតថា រដ្ឋាភិបាលចិនប្រឆាំងយ៉ាងដាច់ខាត ចំពោះសកម្មភាពផ្តាច់ខ្លួនរបស់តៃវ៉ាន់ ឬការជ្រៀតជ្រែកពីប្រទេសណាមួយ ហើយទីក្រុងប៉េកាំង នៅតែប្រកាន់ខ្ជាប់ជំហរររក្សាទំនាក់ទំនងល្អជាមួយតៃវ៉ាន់ដែលជាទឹកដីមិនអាចកាត់ផ្ដាច់បាន ពីចិនដៃគោក។
ក្រុមប្រឹក្សាកិច្ចការផ្ទៃក្នុងកោះតៃវ៉ាន់ បានឆ្លើយតបទៅនឹងការលើកឡើងរបស់នាយករដ្ឋមន្ត្រីចិនខាងលើ ដោយនិយាយថា ប្រទេសចិនគួរតែផ្តោតការយកចិត្តទុកដាក់បន្ថែមទៀតលើការដោះស្រាយបញ្ហាពិតប្រាកដរបស់ប្រជាជនខ្លួន និងការលើកកម្ពស់លទ្ធិប្រជាធិបតេយ្យ ជាជាង ធ្វើឱ្យខូចដល់ច្បាប់ និងសណ្តាប់ធ្នាប់អន្តរជាតិ។ ប្រជាជនតៃវ៉ាន់ភាគច្រើនមិនបានបង្ហាញការចាប់អារម្មណ៍ចំពោះការចង់រួបរួមជាមួយប្រទេសចិន ដែលពួកគេហៅថាជាការកាន់អំណាចផ្តាច់ការឡើយ ពួកគេចង់រស់នៅដោយមានសេរីភាព និងប្រជាធិបតេយ្យ។ នេះបើតាមបញ្ជាក់ពីមន្ត្រីជាន់ខ្ពស់កោះតៃវ៉ាន់។
អត្ថបទគួរអាន
គួរជម្រាបថា ការបង្រួបបង្រួមទឹកដីដោយសន្តិវិធី ជាជំហរតាំងពីដើមមកហើយរបស់ប៉េកាំង ប៉ុន្តែចិនមិនសប្បាយចិត្តនឹងមេដឹកនាំតៃវ៉ាន់បច្ចុប្បន្នប៉ុន្មានទេ ដោយសារក្រុងតៃប៉ិមាននិន្នាការទៅរកការផ្ដាច់ខ្លួនចេញពីចិនកាន់តែខ្លាំងឡើងៗ។ ប្រមុខដឹកនាំកំពូលកោះតៃវ៉ាន់លោកស្រី សៃ អ៊ីងវិន តែងចេញមុខជំទាស់ការរួបរួមកោះតៃវ៉ាន់ និងប្រទេសចិន ហើយបានពង្រឹងសមត្ថភាពយោធាជាប់ជានិច្ច ពិសេសជាមួយនឹងការផ្គត់ផ្គង់អាវុធ ដ៏សំខាន់ពីអាមេរិក។
សូមរំឭកថា លោកស្រី សៃ អ៊ីងវិន ជាស្ត្រីខ្លាំងរបស់តៃវ៉ាន់មួយរូប ត្រូវបានជាប់ឆ្នោតជាលើកទី២ យ៉ាងភ្លូកទឹកភ្លូកដីកាលពីឆ្នាំ២០២០ ដោយលោកស្រីបានសន្យា និងប្តេជ្ញាការពារលទ្ធិប្រជាធិបតេយ្យរបស់កោះមួយនេះ ព្រមទាំងក្រោកឈរឡើងប្រឆាំងនឹងរដ្ឋអំណាចចិនទៀតផង៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
