ក្តីសង្ឃឹមដែលថា មហាអំណាចសេដ្ឋកិច្ចទាំងពីរ អាចឈានដល់កិច្ចព្រមព្រៀងដំណាក់កាលដំបូង ដើម្បីបន្ធូរបន្ថយកម្តៅសង្គ្រាមពាណិជ្ជកម្មនោះ នៅពេលនេះ ត្រូវរលាយបាត់ម្តងទៀតហើយ ក្រោយការប្រកាសរបស់ លោក ដូណាល់ ត្រាំ ថា វាគ្មានកាលបរិច្ឆេទសម្រាប់លោកនោះទេ ក្នុងការសម្រេចកិច្ចព្រមព្រៀងនេះ ហើយអាមេរិក និងពិចារណា បើសិនជា ប្រទេសចិន ចង់បាននៅពេលនេះ។
អ្នកជំនាញ និងសេដ្ឋកិច្ចវិទូ នៅតែសន្និដ្ឋានដដែលថា បញ្ហាលំបាកគឺនៅត្រង់ថា អាមេរិក សម្រេចដកពន្ធលើទំនិញនាំចូលពីចិន ប៉ុន្មានភាគរយ ហើយចិន យល់ព្រមទិញផលិតផលកសិកម្មអាមេរិក ដល់កម្រិតប៉ុណ្ណា ដែលអាចឈានដល់កិច្ចព្រមព្រៀងដំណាក់កាលទី ១បាន។
អត្ថបទទាក់ទង!
យ៉ាងណាមិញ សកម្មភាពពាណិជ្ជកម្មថ្មីៗ របស់ លោក ដូណាល់ ត្រាំ ផ្ទាល់តែម្តង បានធ្វើឲ្យ រដ្ឋាភិបាលចិន ព្រួយបារម្ភដែរថា លោក ដូណាល់ ត្រាំ អាចនឹងសម្រេចកិច្ចព្រមព្រៀងដំណាក់កាលដំបូងនេះដែរឬទេ។
លោក វីលបួ រ៉ូស លេខាធិការពាណិជ្ជកម្មសហរដ្ឋអាមេរិក បានគូសបញ្ជាក់ថា ការជជែកពិភាក្សាថ្នាក់មន្រ្តីរវាងចិន និងអាមេរិក កំពុងបន្ត ប៉ុន្តែគ្មានការគ្រោងទុក សម្រាប់កិច្ចប្រជុំជាន់ខ្ពស់ណាមួយនោះឡើយ។
លោកបន្តថា បើសិនជា គ្មានកិច្ចព្រមព្រៀង ឬការចរចា មុនថ្ងៃទី១៥ ខែធ្នូនេះទេ ការគំរាមដំឡើងពន្ធលើ ទំនិញនាំចូលពីប្រទេសចិន នឹងកើតឡើង ហើយប៉ះពាល់ដល់ ផលិតផលជាច្រើនមុខ ដូចជា ទូរស័ព្ទដៃ កុំព្យូទ័រ និងតុក្កតាក្មេងលេងជាដើម។
គួររម្លឹកថា ការគំរាមដំឡើងពន្ធចុងក្រោយនេះគឺចិន បានបង្ហាញពីគម្រោងដំឡើងពន្ធលើ ទំនិញអាមេរិក នៅពាក់កណ្តាលខែធ្នូ ដូចគ្នាទៅនឹងការកំណត់របស់អាមេរិកដែរ ដោយចិន នឹងដំឡើងពន្ធ ៥% លើទៅលើប្រេងឆៅ និងគ្រឿងបង្គុំរថយន្តរបស់អាមេរិក ហើយដាក់ពន្ធ ២៥% លើរថយន្តផលិតដោយអាមេរិក ជាថ្មីម្តងទៀត។
រីឯ រដ្ឋាភិបាលលោកដូណាល់ ត្រាំ ក៏គ្រោងដំឡើងពន្ធបន្ថែម ៥%ទៀត ដោយដូរពី ១០% ទៅ ១៥% វិញ ទៅលើទំនិញចិន ដែលមានតម្លៃ ៣០០ពាន់លានដុល្លារអាមេរិក ដោយក្នុងនោះ ទំនិញជាងពាក់កណ្តាល ត្រូវចាប់ផ្តើមដំឡើងពន្ធពីថ្ងៃទី ១៥ ខែធ្នូខាងមុខ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
