នៅថ្ងៃចន្ទ ដើមសប្តាហ៍នេះ តម្លៃប្រេងឆៅនៅលើទីផ្សារអន្តរជាតិបានកើនឡើងភ្លាមៗ បន្ទាប់ពីកងទ័ពអាកាសរបស់អ៊ីស្រាអែលបើកការវាយប្រហារលើគោលដៅនានាក្នុងប្រទេសលីបង់ដោយប្រើយន្តហោះចម្បាំងជាង១00គ្រឿង និងក្រុមហេសបូឡា ដែលគាំទ្រដោយអ៊ីរ៉ង់ បានបាញ់រ៉ុក្កែតជាង៣២០គ្រាប់ចូលទៅក្នុងទឹកដីអ៊ីស្រាអែលជាការឆ្លើយតប។
លោក វីវិក ដា (Vivek Dhar) អ្នកជំនាញផ្នែកធនធានរ៉ែ និងថាមពលនៅធនាគារ Commonwealth Bank របស់អូស្រ្តាលី បាននិយាយថា ភាពតានតឹងនៅតំបន់មជ្ឈិមបូព៌ា និងហានិភ័យនៃជម្លោះកាន់តែទូលំទូលាយនៅតំបន់នោះនឹងធ្វើឱ្យតម្លៃប្រេងកើនឡើងបន្ថែមទៀត។ ភ្លាមៗបន្ទាប់ពីមានការបាញ់ប្រហារដាក់គ្នាទៅវិញទៅមកនៅមជ្ឈឹមបូព៌ា តម្លៃប្រេងឆៅនៅទីផ្សារអន្តរជាតិ West Texas Intermediate បានកើនឡើងដល់០,៧៥%ដល់៧៥,៣៩ដុល្លារក្នុងមួយបារ៉ែល ខណៈដែលតម្លៃនៅទីផ្សារ Brent បានកើនឡើង ០,៦៧% ដល់៧៩,៥៥ដុល្លារក្នុងមួយបារ៉ែល។
លោកបានបន្តថា នៅក្នុងករណីដែលជម្លោះនេះបន្តរីករាលដាលហើយឈានដល់ការលូកដៃដោយផ្ទាល់ របស់កងកម្លាំងអ៊ីរ៉ង់ នោះតម្លៃប្រេងឆៅនៅលើទីផ្សារអន្តរជាតិអាចនឹងឡើងពី៧៥ដុល្លារនៅក្នុងមួយបារ៉ែលរហូតដល់ទៅ៨៥ដុល្លារក្នុងមួយបារ៉ែលនៅក្នុងអំឡុងខែកញ្ញា ខាងមុខនេះ។
ក្រុមហេសបូឡា ដែលគាំទ្រដោយអ៊ីរ៉ង់បាននិយាយថា ការវាយប្រហារកាលពីថ្ងៃអាទិត្យ គឺជាការសងសឹកចំពោះការសម្លាប់របស់អ៊ីស្រាអែល ទៅលើមេបញ្ជាការជាន់ខ្ពស់របស់ខ្លួន គឺលោក ហ្វាត សើក ( Fuad Shukr) នៅក្នុងទីក្រុង បៃរូត កាលពីខែមុន ហើយអ៊ីស្រាអ៊ែលវិញ បាននិយាយថា ការវាយប្រហារជាមុនរបស់ខ្លួន គឺសំដៅរារាំងការវាយប្រហារធំជាងនេះ ដោយក្រុមហេសបូឡា។
ដោយឡែកលោក សេឌ្រិច ចេហាប (Cedric Chehab) នាយកគ្រប់គ្រង និងជាប្រធានផ្នែកហានិភ័យសកលនៅក្រុមហ៊ុនស្រាវជ្រាវ BMI បាននិយាយថា ការវាយប្រហារកាលពីថ្ងៃអាទិត្យ ចុងសប្តាហ៍មុន មិនមានន័យថា សង្រ្គាមនៅមជ្ឈឹមបូព៌ាជិតផ្ទុះនោះទេ។ លោកបានសង្កត់ធ្ងន់ថា អ្វីដែល ហេសបូឡា ចង់ធ្វើ និងអ្វីដែលអ៊ីរ៉ង់ចង់បង្ក គឺត្រូវបានទប់ស្កាត់ ហើយនៅពេលនេះទាំងមេដឹកនាំ អ៊ីស្រាអ៊ែល និងអ៊ីរ៉ង់ គឺពិតជាមិនចង់ឲ្យមានសង្រ្គាមដោយផ្ទាល់ជាមួយនឹងគ្នានោះឡើយ៕
ដោយៈ សរ សុជាតិ
