តាមរយៈរបាយការណ៍បច្ចុប្បន្នភាពសេដ្ឋកិច្ចអាស៊ីបូព៌ា និងប៉ាស៊ីហ្វិក ធនាគារពិភពលោកបានព្យាករថា តំបន់អាស៊ីបូព៌ា និងប៉ាស៊ីហ្វិកនឹងសម្រេចបានកំណើនសេដ្ឋកិច្ចប្រមាណ៤,៨% មានការធ្លាក់ចុះបន្តិចបើធៀបនឹងឆ្នាំ២០២៤ ដែលសម្រេចបានប្រមាណ៥% ក្នុងនោះវៀតណាមនាំមុខគេដោយមានកំណើន៦,៦% បន្ទាប់មកប្រទេសម៉ុងហ្គោលី៥,៩% និងហ្វីលីពីន៥,៣%។ ដោយឡែក ចិន កម្ពុជា និងឥណ្ឌូនេស៊ីត្រូវបានព្យាករថា នឹងមានកំណើន៤,៨% ខណៈដែលបណ្តាប្រទេស និង កោះប៉ាស៊ីហ្វិកត្រូវបានព្យាករថា នឹងមានកំណើន២,៧% និង ថៃ២%។
លោក កាឡូស ហ្វីលីព ចារាមីលឡូ (Carlos Felipe Jaramillo) អនុប្រធានធនាគារពិភពលោកប្រចាំតំបន់អាស៊ីបូព៌ា និងប៉ាស៊ីហ្វិក មានគូសបញ្ជាក់ថា តំបន់នេះកំពុងមានស្ថានភាពបញ្រ្ចាសគ្នាមួយពាក់ព័ន្ធនឹងការងារ សេដ្ឋកិច្ចមានកំណើនរឹងមាំគួរសម ប៉ុន្តែបែរជាបង្កើតការងារដែលមានគុណភាពមិនបានគ្រប់គ្រាន់ទៅវិញ។ សម្រាប់លោក កំណែទម្រង់មោះមុតជាងមុន ដើម្បីលុបបំបាត់ឧបសគ្គដល់ការចូលរួម និងការប្រកួតប្រជែងរបស់ក្រុមហ៊ុន នឹងជំរុញឱ្យមានរំហូរដើមទុនឯកជនកាន់តែច្រើន បង្កភាពអំណោយផលដល់ក្រុមហ៊ុនដែលមានសក្តានុពលបង្កើនផលិតភាពឱ្យកាន់តែមានភាពរីកចម្រើន និងបង្កើតឱកាសការងារថ្មីៗ ថែមទៀត។
លោក អាត់ឌីតត្យា ម៉ាត់ធូ (Aaditya Mattoo) ប្រធានសេដ្ឋវិទូប្រចាំតំបន់អាស៊ីបូព៌ា និងប៉ាស៊ីហ្វិករបស់ធនាគារពិភពលោក បានគូសបញ្ជាក់ថា កំណើនដែលផ្តោតលើការនាំចេញ និង ពឹងផ្អែកលើអតិពលកម្មនៅអាស៊ីបូព៌ា បានជួយមនុស្សមួយពាន់លាននាក់ឱ្យរួចផុតពីភាពក្រីក្រក្នុងរយៈពេល ៣ទសវត្សរ៍កន្លងមកនេះ ប៉ុន្តែតំបន់នេះកំពុងប្រឈមមុខនឹងបញ្ហាពីរក្នុងពេលតែមួយ គឺការការពារពាណិជ្ជកម្ម និងស្វ័យប្រវត្តិកម្មការងារ។ លោកបានបន្ថែមថា កំណែទម្រង់បរិយាកាសធុរកិច្ច និងការកែលម្អការអប់រំអាចធ្វើឱ្យកាន់តែប្រសើរឡើងនូវឱកាស និងសមត្ថភាពនាំទៅរកកំណើនកាន់តែខ្ពស់ និងការងារកាន់តែប្រសើរជាងមុន។
អត្ថបទគួរអាន
ធនាគារពិភពលោកបានគូសបញ្ជាក់ថា សកម្មភាពសេដ្ឋកិច្ចបង្ហាញឱ្យឃើញថា កំណើនសេដ្ឋកិច្ចកំពុងមានសន្ទុះធ្លាក់ចុះល្បឿន ការលក់រាយកំពុងកើនឡើង ខណៈដែលទំនុកចិត្តអ្នកប្រើប្រាស់មិនបានងើបឡើងវិញដល់កម្រិតមុនជំងឺកូវីដ-១៩ នៅឡើយទេ។ ទន្ទឹមនេះ ផលិតកម្មឧស្សាហកម្មមានភាពរឹងមាំ ប៉ុន្តែទំនុកចិត្តអាជីវកម្មនៅតែមានកម្រិតទាប ហើយការនាំចេញបានកើនឡើងមុនការដំឡើងពន្ធរបស់អាម៉េរិកនាពេលថ្មីៗនេះ ប៉ុន្តែការបញ្ជាទិញសម្រាប់នាំចេញថ្មីៗមានកម្រិតទាប។
ធនាគារពិភពលោកបានព្យាករថា កំណើនសេដ្ឋកិច្ចនៅក្នុងតំបន់នេះនៅឆ្នាំ២០២៦ នឹងថយចុះមកនៅត្រឹម៤,៣% ហើយលទ្ធផលកំណើននឹងរងឥទ្ធិពលពីការរឹតបន្តឹងពាណិជ្ជកម្មកាន់តែខ្ពស់ និងភាពមិនប្រាកដប្រជាសកល។
ធនាគារពិភពលោក បានជំរុញឱ្យធ្វើកំណែទម្រង់ និងការវិនិយោគលើមូលធនមនុស្ស និងហេដ្ឋារចនាសម្ព័ន្ធឌីជីថល, ការប្រកួតប្រជែងកាន់តែខ្លាំងនៅក្នុងសេវាកម្ម និងគោលនយោបាយដើម្បីធានាឱ្យមានឱកាសការងារត្រូវតាមជំនាញរបស់ប្រជាជន។ វឌ្ឍនភាពលឿននៅក្នុងបច្ចេកវិទ្យាបញ្ញាសិប្បនិម្មិត, រ៉ូបូត និងវេទិកាឌីជីថល ទាមទារឱ្យក្រុមហ៊ុន កម្មករ និងអ្នកបង្កើតគោលនយោបាយ គិតគូរអំពីជំនាញថ្មីៗ និងភាពរហ័សរហួន និងការសម្របខ្លួនកាន់តែខ្លាំងជាងមុនទៅតាមសភាពការបច្ចុប្បន្ន៕
