ដំណើរទស្សនកិច្ចមេដឹកនាំប្រទេសអឺរ៉ុបនៅទីក្រុងកៀវ បង្កើនក្ដីសង្ឃឹមខ្ពស់សម្រាប់អ៊ុយក្រែនក្នុងការក្លាយជាសមាជិកEU

សំឡេងស៊ីរ៉ែនពីលើអាកាសបានបន្លឺសម្លេងលាន់រំពង​នៅក្នុងទីក្រុង Kyiv ខណៈដែលដំណើរទស្សនកិច្ច​របស់ប្រធានាធិបតីបារាំង លោក ម៉ាក្រុន (Emmanuel Macron), អធិការបតីអាល្លឺម៉ង់ លោក អូឡាហ្វ ឈូល និងនាយករដ្ឋមន្រ្តីអ៊ីតាលី លោក ម៉ារីអូ ដ្រេហ្គី (Mario Draghi) បានឈានជើងចូលក្នុងទីក្រុង Kyiv ដោយមេដឹកនាំទាំងបីនេះ បានធ្វើដំណើរទៅកាន់ទីប្រជុំជន​ក្បែរនោះ ដែលត្រូវបានបំផ្លាញស្ទើរក្លាយជាផេះផង់ទៅហើយ ដោយសារតែ​ការប្រយុទ្ធគ្នា​ដ៏ខ្លាំងក្លា​រវាង​កងទ័ពអ៊ុយក្រែន និងកងទ័ពរុស្ស៊ី។

បន្ទាប់ពីបានជួបពិភាក្សាជាមួយប្រធានាធិបតីអ៊ុយក្រែនលោក ហ្សេលេនស្គី (Volodymyr Zelenskiy) មេដឹកនាំទាំងបី បានផ្តល់សញ្ញាថា អ៊ុយក្រែនគួរតែត្រូវបានផ្តល់​ភ្លើងខៀវ​ក្នុងការចូលជាសមាជិកនៃសហភាពអឺរ៉ុប ដែលនេះ​ជានិមិត្តរូប​មួយក្នុ​ងការទាញទីក្រុង Kyiv ឱ្យចូលទៅក្នុងប្លុកសេដ្ឋកិច្ចអឺរ៉ុប។

លោក អូឡាហ្វ ឈូលអធិការបតីអាល្លឺម៉ង់ បាននិយាយថា អាឡឺម៉ង់បានទទួលយកជនភៀសខ្លួនអ៊ុយក្រែន ៨ សែននាក់រួចមកហើយ ដែលបានភៀសខ្លួនចេញពីសង្រ្គាម ហើយលោកនឹងនៅបន្តគាំទ្រជនភៀសខ្លួនអ៊ុយក្រែន​បន្ថែមទៀត ដរាបណាមានការស្នើឲ្យជួយ ដោយលោកបានបញ្ជាក់ទៀតថា "អ៊ុយក្រែនជាគ្រួសាររបស់អឺរ៉ុប" ។

យ៉ាងណាមិញ​ នៅលើសមរភូមិ មន្ត្រីអ៊ុយក្រែន​បានពិពណ៌នាថា កងទ័ពរបស់ពួកគេ​នៅតែទប់ទល់​នឹងការទម្លាក់គ្រាប់បែក​ឥតត្រាប្រណីពីរុស្ស៊ី​នៅក្នុងទីក្រុងសៀវរីរ៉ូដូណេ(Sievierodonetsk) ភាគខាងកើត ហើយថា រុស្សីបានវាយសម្រុកជាថ្មីនៅ​ភាគខាងត្បូងប្រទេស។

ប៉ុន្តែពួកគេបាននិយាយថា ការប្រយុទ្ធទប់ទល់​នឹងរុស្សី គឺត្រូវការចាំបាច់ខ្លាំង​ណាស់​នូវជំនួយ​សព្វាវុធពីលោកខាងលិច ជាពិសេសកាំភ្លើងធំ ដែលមានសមត្ថភាព​ក្នុងការ​រាំងខ្ទប់កងទ័ពរុស្ស៊ីយ៉ាងមានប្រសិទ្ធភាព។

ទន្ទឹមនឹងនេះដែរ លោក Macron ប្រធានាធិបតីបារាំង បាននិយាយថា ប្រទេសបារាំងនឹងបង្កើនការផ្តល់អាវុធ​ដល់ទីក្រុង Kyiv ខណៈដែលនៅក្នុងកិច្ចប្រជុំនៅទីក្រុងប្រ៊ុចសែល ថ្នាក់រដ្ឋមន្ត្រីការពារជាតិណាតូ បានសន្យានឹងផ្តល់អាវុធបន្ថែមទៀតសម្រាប់អ៊ុយក្រែន ស្របពេលដែលអង្គការណាតូត្រៀមរៀបចំ​ផែនការដើម្បីពង្រឹង​សម្ព័ន្ធមិត្តយោធា​ដែលដឹកនាំ​ដោយសហរដ្ឋអាមេរិកផងដែរ។

មែនទែនទៅ ដំណើរទស្សនកិច្ចទៅកាន់ទីក្រុងកៀវ​របស់មេដឹកនាំសហភាពអឺរ៉ុប​ដ៏មានឥទ្ធិពលបំផុតទាំងបីរួមមាន​មេដឹកនាំបារាំង អាល្លឺម៉ង់ និងអ៊ីតាលីនេះ ត្រូវបានគេមើលឃើញថាបានប្រើពេលជាច្រើនសប្តាយ៍ក្នុងការរៀបចំ ហើយវាជាសក្ខីភាពមួយ​បញ្ជាក់យ៉ាងច្បាស់ថា​ អឺរ៉ុបនឹង​នៅតែឈរជាមួយ​ប្រជាជនអ៊ុយក្រែន ដែលស្រលាញ់សេរីភាព និងសន្តិភាព។ ត្បិតតែមានមតិរិះគន់ថា វាហាក់បីដូចជាចង់ហួសពេលទៅហើយដែលមេដឹកនាំប្រទេសទាំងបីនេះ បានធ្វើដំណើរទៅប្រទេសអ៊ុយក្រែន ព្រោះសង្រ្គាមបានចាប់ផ្តើមជាងបីខែមកហើយនោះ។

ទោះបីជាយ៉ាងណាក៏ដោយ លោក Macron បានសង្កត់ធ្ងន់ថា “ការធ្វើដំណើរ​របស់លោក​មកកាន់ទីក្រុងកៀវនេះ គឺដើម្បីសន្តិភាពរបស់អឺរ៉ុប មិនមែនសង្គ្រាមទេ” ។​ ហើយលោកមេដឹកនាំទាំងបីសុទ្ធតែនិយាយដូចគ្នាថា ពួកគេគឺនៅតែគាំទ្រអ៊ុយក្រែនយ៉ាងពេញទំហឹង ដោយបានចាត់វិធានការជាក់ស្តែង ដូចជាការកាត់បន្ថយការពឹងផ្អែកខ្លាំង​របស់អឺរ៉ុប​លើថាមពលរុស្ស៊ី ថែមទាំងស្វះស្វែងផ្តល់​អាវុធនិង​ជំនួយផ្សេងៗទៀតដល់ទីក្រុង Kyiv​ ផងដែរ។

បើក្រឡេកទៅមើលសមរភូមិប្រយុទ្ធដ៏ក្តៅគគុកក្នុងប៉ុន្មានសប្តាហ៍ថ្មីៗនេះ កងទ័ពអ៊ុយក្រែន និងរុស្ស៊ី បាននឹងកំពុងប្រយុទ្ធគ្នា​យ៉ាងខ្លាំងនៅក្នុងទីក្រុងសៀវរីរ៉ូដូណេ​ (Sievierodonetsk) ភាគខាងកើត ដែលមានជនស៊ីវិលរាប់រយនាក់ត្រូវបានប្រមូលផ្តុំនៅក្នុងរោងចក្រគីមី។ ខណៈពេលដែល នៅភាគខាងត្បូងប្រទេសអ៊ុយក្រែនវិញ កងកម្លាំងរបស់ខ្លួន​បាននិយាយថា ខ្លួនកំពុងដណ្តើមផ្លូវចូល​ទៅក្នុង​ខេត្ត ឃើសុន (Kherson) ដែលរុស្ស៊ីបានកាន់កាប់នៅដើមដំបូងនៃការឈ្លានពានរបស់ខ្លួនវិញហើយ៕