អំឡុងសន្ទរកថាបើកកម្មវិធីសមាជបក្សកុម្មុយនីស្តចិនលើកទី២០ ដែលធ្វើឡើងរាល់៥ឆ្នាំម្តង បុរសខ្លាំងរដ្ឋចិន លោក ស៊ី ជីនពីង និយាយថាប្រទេសចិននឹងពន្លឿនការកសាងសមត្ថភាពយោធាបន្ថែមទៀត ពោលគឺឱ្យដល់លំដាប់ពិភពលោកតែម្តង។ បន្ថែមពីលើសមត្ថភាពយោធាជារួម មេដឹកនាំចិនរូបនេះ បានសន្យាពង្រឹងសមត្ថភាពទប់ស្កាត់ការវាយប្រហារជាយុទ្ធសាស្ត្រផងដែរ។
«យើងនឹងអភិវឌ្ឍ ធ្វើទំនើបកម្មយោធា ទាំងទ្រឹស្តីនិងការអនុវត្ត ទាំងកងទ័ព និងទាំងអាវុធយុទ្ធភណ្ឌនានា» នេះជាសម្តីផ្ទាល់ចេញពីមាត់លោកស៊ី ជីនពីង នៅចំពោះមុខសមាជិកបក្សកុម្មុយនីស្តចិន ទាំងជាង ២៣០០នាក់ ដែលបានចូលរួមពិធីបើកសមាជបក្សកុម្មុយនិស្ដចិនលើកទី២០។
លោកសាស្ត្រាចារ្យ ឡេន ហ្ក័រ មកពីវិទ្យាស្ថានអាស៊ីបូព៌ារបស់សិង្ហបុរីប្រាប់ Channel News Asia ថា៖ ដូចបានដឹងហើយថា ក្នុងពេល១០ឆ្នាំចុងក្រោយ ក្រោមការដឹកនាំរបស់លោក ស៊ី យោធាចិន រះត្រដែតឡើងជាលំដាប់ ធ្វើឱ្យគេព្រួយបារម្ភ។ ប៉ុន្តែ ការប្រកាសបង្កើនសមត្ថភាពយោធា បន្ថែមទៀតនៅពេលនេះ គឺទំនងជាលោកស៊ី ជីនពីងចង់បង្ហាញប្រតិកម្មចំពោះផ្ទៃក្នុងរបស់លោក។ អាចមានផ្លូវពីរនៅក្នុងមូលហេតុនេះ ដោយទីមួយលោកចង់បំផុសទឹកចិត្ត មនោសញ្ចេតនាជាតិនិយម ជាជាងការបង្ហាញពីមហិច្ឆតារបស់លោក។ ប៉ុន្តែវាក៏អាចផងដែរ ថាលោកចង់ពង្រឹងឥទ្ធិពលអំណាច សម្រាប់អាណត្តិទី៣របស់លោក។
អ្នកជំនាញរូបនេះជឿជាក់ថា ការនិយាយបែបនេះគឺចង់សំដៅបង្កើនការការពារខ្លួនច្រើនជាង មហិច្ឆតានៃការត្រួតត្រាពិភពលោក។
អត្ថបទគួរអាន
ដោយឡែក អ្នកឯកទេសគោលនយោបាយចិនមួយរូបទៀត មកពីសកលវិទ្យាល័យមួយនៅសហរដ្ឋអាមេរិក លោកសាស្ត្រាចារ្យ ភីតធឺ លី និយាយថា យុទ្ធសាស្ត្រគោលនយោបាយការបរទេសរបស់ចិនក្នុងទសវត្សរ៍ចុងក្រោយនេះ គឺអំពីការពង្រឹងការកាន់កាប់ និងវត្តមានរបស់ខ្លួននៅលើសមុទ្រចិនខាងត្បូង ដែលប្រទេសនេះតែងចាត់ទុកភាគច្រើន គឺជាដែនទឹករបស់ខ្លួន។
ម្យ៉ាងទៀត ចិនចង់ពង្រឹងយុទ្ធសាស្ត្រយោធារបស់ខ្លួន ក្នុងករណីមហាអំណាចបរទេសនឹងលូកដៃចូលកិច្ចការផ្ទៃក្នុងរបស់ចិនដូចជានៅក្រុងហុងកុង និងកោះតៃវ៉ាន់ជាដើម។ ដូច្នេះ ការធ្វើទំនើបកម្មយោធា គឺជាមូលដ្ឋានសម្រាប់ការពារនូវអ្វីដែលទីក្រុងប៉េកាំងហៅថា ផលប្រយោជន៍ជាតិជាស្នូល នោះគឺផលប្រយោជន៍ទឹកដីនេះឯង។
សូមជម្រាបថា ក្រៅតែពីការធ្វើទំនើបកម្មយោធាបន្ថែមទៀត ដើម្បីពង្រឹងទាំងផ្ទៃក្នុងនឹងក្តោបក្តាប់ទឹកដីរបស់ខ្លួន ការបង្រួបបង្រួមឱ្យកោះតៃវ៉ាន់ក្លាយជាចិនតែមួយ គឺជារឿងចាំបាច់ណាស់ សម្រាប់ផ្ទៃក្នុងរបស់ចិន។ ទីក្រុងប៉េកាំងបានផ្តល់ជម្រើសដល់កោះតៃវ៉ាន់ក្នុងគំរូដឹកនាំរដ្ឋ បែបប្រទេសមួយប្រព័ន្ធពីរ ដែលជារូបមន្តដូចគ្នាទាំងស្រុងនឹងក្រុងហុងកុង ដែលចិនកំពុងអនុវត្តសព្វថ្ងៃ។ ប៉ុន្តែគណបក្សនយោបាយធំៗរបស់តៃវ៉ាន់ទាំងអស់បានច្រានចោលសំណើនេះ ហើយវាស្ទើរតែគ្មានការគាំទ្រពីសាធារណជនឡើយ។ ទោះយ៉ាងណា លោកស៊ី ជីនពីង បាននិយាយកាលពីថ្ងៃអាទិត្យទី១៦តុលាថា ចិន មិនបោះបង់ជម្រើសនៃការប្រើប្រាស់កម្លាំងទៅលើតៃវ៉ាន់នោះឡើយ។
ភាគីកោះតៃវ៉ាន់ក៏បានចេញមុខមកឆ្លើយតបភ្លាមៗរួចហើយដែរថា នឹងមិនចុះញ៉មជាមួយនឹងប៉េកាំងនោះទេ ហើយតៃវ៉ាន់នៅតែអះអាងថា នឹងការពារអធិបតេយ្យភាព សេរីភាព និងប្រជាធិបតេយ្យរបស់ខ្លួនឲ្យខាងតែបាន៕
