ក្រុមហ៊ុនចិន ចំនួន៥ ត្រៀមបោះទុនជាង៣០០លានដុល្លារ បង្កើតរោងចក្រផលិតគ្រឿងបន្លាស់មនុស្សយន្តនៅថៃ

លោក ណារីត ធើតធីរ៉ាក់ស៊ុកឌី (Narit Therdsteerasukdi) អគ្គលេខាធិការនៃក្រុមប្រឹក្សាវិនិយោគថៃ បានបញ្ជាក់ថា គម្រោងវិនិយោគលើការផលិតគ្រឿងបន្លាស់មនុស្សយន្តរបស់ក្រុមហ៊ុនចិន ទាំង៥នេះ មានគោលដៅយុទ្ធសាស្ត្រក្នុងការប្រែក្លាយប្រទេសថៃ ឱ្យទៅជាខ្សែច្រវាក់ផ្គត់ផ្គង់បច្ចេកវិទ្យាកម្រិតខ្ពស់ ជាពិសេសក្នុងវិស័យមនុស្សយន្ត និងប្រព័ន្ធស្វ័យប្រវត្តិកម្ម។ លោករំពឹងថា តាមរយៈក្រុមហ៊ុនទាំងនេះវានឹងជួយបង្កើតការងារជំនាញខ្ពស់ច្រើនជាង១,០០០កន្លែង និងប្រភពគ្រឿងបន្លាស់ក្នុងស្រុកដែលមានតម្លៃជាង១,៤ពាន់លានដុល្លារ ស្របតាមគោលនយោបាយរបស់ក្រុមប្រឹក្សាវិនិយោគរបស់ថៃ។

ក្រុមហ៊ុនទាំងនេះ នឹងផ្តោតលើការផលិតគ្រឿងបន្លាស់ និងគ្រឿងបង្គុំសំខាន់ៗសម្រាប់មនុស្សយន្តដូចជា វីសបាល់, ឧបករណ៍បញ្ជាចលនារ៉ូបូត រួមទាំងគ្រឿងបន្លាស់រថយន្តបច្ចេកវិទ្យាខ្ពស់សម្រាប់ផ្គត់ផ្គង់ដល់ម៉ាកល្បីៗដូចជា BYD, Volvo និង Tesla ជាដើម។

តាមរយៈការបោះទុនដ៏ធំនេះ ប្រទេសថៃ មានមហិច្ឆតាក្លាយជាមជ្ឈមណ្ឌលនៃទីផ្សារមនុស្សយន្ត ដែលមានរូបរាងដូចមនុស្ស​កម្រិតពិភពលោក។ វិស័យនេះ ត្រូវបានគេព្យាករថា នឹងមានកំណើនកើនឡើងជាង១៣០% ជារៀងរាល់ឆ្នាំ ហើយនឹងឈានទៅរកការផលិតក្នុងទម្រង់ពាណិជ្ជកម្មពេញលេញនៅត្រឹមឆ្នាំ២០២៧ ខាងមុខនេះ៕

អត្ថបទៈ សួន ឡង់ទី​