ប្រធានាធិបតីអ៊ុយក្រែន លោក Volodymyr Zelenskyy បានចូលរួមកិច្ចប្រជុំកំពូលនេះផងដែរ ដើម្បីពង្រឹងកិច្ចសហប្រតិបត្តិការជាមួយប្រទេសសមាជិក G7 ចំពេលមានការព្រួយបារម្ភកាន់តែខ្លាំងឡើងថា រុស្ស៊ីអាចនឹងប្រើប្រាស់អាវុធនុយក្លេអ៊ែរយុទ្ធសាស្ត្រកម្រិតតូចក្នុងសង្គ្រាមប្រឆាំងអ៊ុយក្រែនផងនោះ។
គួរជម្រាបដែរថា កិច្ចប្រជុំបន្ទាន់ G7 នេះត្រូវបានរៀបចំឡើង ក្រោយពីទីក្រុងមូស្គូបានសងសឹកចំពោះការវាយប្រហារកាលពីចុងសប្តាហ៍មុនលើស្ពាន Kerch ដែលតភ្ជាប់ប្រទេសរុស្សីទៅកាន់ដែនដីគ្រីមៀ ដែលរដ្ឋអំណាចទីក្រុងម៉ូស្គូបានចោទថា ជាស្នាដៃរបស់អ៊ុយក្រែនតែម្តង។
ប្រទេសរុស្ស៊ីបាននិយាយថា គោលបំណងនៃការវាយប្រហារដោយមីស៊ីលរបស់ខ្លួនកាលពីថ្ងៃចន្ទទី១០តុលាទៅលើរដ្ឋធានី Kyiv និងទីក្រុងផ្សេងទៀតរបស់អ៊ុយក្រែនគឺ ដើម្បីកម្ទេចមូលដ្ឋានយោធា និងថាមពលតែប៉ុណ្ណោះ ខណៈអ៊ុយក្រែនបានរាយការណ៍ថា មនុស្សយ៉ាងហោចណាស់ ១៤ នាក់ត្រូវបានសម្លាប់ដោយការបាញ់ស្រោចដ៏សាហាវនេះ។
អត្ថបទគួរអាន
គួររំលឹកថា កាលពីខែកញ្ញា លោកពូទីនបានប្រកាសដាក់បញ្ចូលតំបន់ចំនួនបួន ដែលខ្លួនដណ្តើមបានពីអ៊ុយក្រែនចូលជាដែនដីរុស្ស៊ី ដែលមានទំហំប្រហែល១៥%នៃទឹកដីអ៊ុយក្រែនទាំងមូល ដោយសម្អាងថា ប្រជាជននៅតំបន់ទាំងនោះបានបោះឆ្នោតប្រជាមតិគាំទ្រ ដោយឡែកទីក្រុងកៀវ និងប្រទេសលោកខាងលិច ក៏ដូចជាសហគមន៍អន្តរជាតិចោទថា ខុសច្បាប់អន្តរជាតិ និងគ្មានភាពអៀនខ្មាស។
យ៉ាងណាក៏ដោយ ប្រទេសអាល្លឺម៉ង់ដែលបច្ចុប្បន្នជាប្រធាន G7 បាននិយាយថា លោក Zelenskyy ត្រូវបានគេរំពឹងថា នឹងចូលរួមក្នុងកិច្ចប្រជុំកំពូលនៅថ្ងៃអង្គារនេះ ហើយលោកទំនងជានឹងបង្ហាញខ្លួននៅដើមដំបូងនៃសន្និសីទវីដេអូតាមប្រព័ន្ធអ៊ីនធឺណិតនេះតែម្តង។
ប្រទេសជប៉ុនឯណេះវិញ នាយករដ្ឋមន្រ្តី លោក Fumio Kishida ក៏គ្រោងនឹងចូលរួមក្នុងកិច្ចប្រជុំនេះដូចគ្នា ពោលគឺប៉ុន្មានថ្ងៃបន្ទាប់ពីប្រទេសជប៉ុនបានបើកស្ថានទូតរបស់ខ្លួនឡើងវិញនៅទីក្រុងគៀវកាលពីថ្ងៃពុធសប្តាហ៍មុនបន្ទាប់ពីការបិទអស់រយៈពេលប្រាំពីរខែ ដោយសារតែការឈ្លានពានរបស់រុស្ស៊ី។
គូររំលឹកបន្តិចថា ប្រទេសឧស្សាហកម្មជឿនលឿនទាំង៧ (G7) ដែលមានប្រទេសចំនួនប្រាំមួយផ្សេងទៀតគឺ អង់គ្លេស កាណាដា បារាំង អាល្លឺម៉ង់ អ៊ីតាលី និងសហរដ្ឋអាមេរិក ក៏បានបើកប្រតិបត្តិការការស្ថានទូតឡើងវិញនៅអ៊ុយក្រែនកាលពីដើមឆ្នាំនេះផងដែរ៕
