ការដាក់ចេញនូវវិធានការនេះ ធ្វើឡើង ក្រោយពីមើលឃើញនូវការរីកចម្រើនយ៉ាងលឿនរបស់បច្ចេកវិទ្យាបញ្ញាសិប្បនិមិត្ត Chatbot ដែលគេស្គាល់ថា ChatGPT ដែលមានសមត្ថិភាពឆ្លើយ និងដោះស្រាយរាល់សំណួរ និងបញ្ហារបស់អ្នកប្រើប្រាស់។
រដ្ឋមន្ត្រីផ្នែកឌីជីថល និងបច្ចេកវិទ្យារបស់ក្រុមប្រទេសឧស្សាហកម្មទាំង៧នេះ បានចាប់ផ្ដើមកិច្ចប្រជុំរយៈពេល២ថ្ងៃកាលពីថ្ងៃទី២៩-៣០ ខែមេសា នៅទីក្រុងតាកាសាគី (Takasaki) នៅខេត្តហ្កាន់ម៉ា (Gunma) នៅប្រទេសជប៉ុន ហើយចុងបញ្ចប់នៃកិច្ចប្រជុំនេះគេរំពឹងថា ប្លុកប្រទេសទាំងនេះ នឹងចេញសេចក្ដីថ្លែងការណ៍រួមមួយស្ដីពីគោលការណ៍ ៥ ចំណុច គឺ ទាក់ទងនឹងនីតិរដ្ឋ ការអនុវត្តដោះស្រាយបញ្ហាអនុលោមតាមផ្លូវច្បាប់ លទ្ធិប្រជាធិបតេយ្យ ការគោរពសិទ្ធិមនុស្ស និងការចាប់យកឱកាសសម្រាប់ការបង្កើតថ្មី ដើម្បីគ្រប់គ្រងបច្ចវិទ្យា AI ដែលជាបច្ចេកវិទ្យាកំពុងរីកចម្រើនខ្លាំងនៅពេលបច្ចុប្បន្ន។
រដ្ឋមន្ត្រីឌីជីថលជប៉ុនលោក តារ៉ូ កូណូ (Taro Kono) បាននិយាយនៅក្នុងពិធីបើកកិច្ចប្រជុំនេះថា ខណៈដែលការរីកចម្រើនបច្ចេកវិទ្យា AI អាចធ្វើឱ្យអាជីវកម្មរបស់រដ្ឋាភិបាល និងវិស័យឯកជនកាន់តែមានប្រសិទ្ធភាព និងផលិតភាពកាន់តែច្រើនឡើងនោះ វាក៏អាចបង្កើតបញ្ហាប្រឈមមិននឹកស្មានដល់ចំពោះប្រជាធិបតេយ្យផងដែរ។
ការអភិវឌ្ឍបញ្ញា AI ក្នុងល្បឿនដ៏លឿនបំផុតនេះបានបង្ហាញពីតម្រូវការសម្រាប់ស្តង់ដារអន្តរជាតិ ដើម្បីគ្រប់គ្រងបច្ចេកវិទ្យាមួយនេះ ដោយប្រទេសជាច្រើនបានបង្កើនបទប្បញ្ញត្តិស្ដីពីការប្រើប្រាស់កម្មវិធី ChatGPT របស់ក្រុមហ៊ុនបញ្ញាសិប្បនិមិត្តរបស់អាមេរិក OpenAI ពាក់ព័ន្ធនឹងក្ដីបារម្ភអីំពីឯកជនភាព។
អត្ថបទគួរអាន
ប៉ុន្តែការផ្ដោតសំខាន់របស់ប្រទេសជប៉ុនទៅលើឧបករណ៍ប្រើប្រាស់ដ៏មានសក្តានុពលរបស់បញ្ញា AI នេះបង្ហាញឲ្យឃើញថា មកដល់ពេលនេះ រដ្ឋាភិបាលជប៉ុនបានប្រកាន់ជំហរប្រុងប្រយ័ត្នចំពោះការដាក់ចេញនូវបទប្បញ្ញត្តិ ជាងអឺរ៉ុប និងសហរដ្ឋអាមេរិក។
កាលពីខែមុនប្រទេសអ៊ីតាលីបានដាក់បម្រាមបណ្តោះអាសន្នលើការប្រើកម្មវិធី ChatGPT ដោយលើកឡើងពីការព្រួយបារម្ភចំពោះការប្រមូលទិន្នន័យបុគ្គល ដោយគ្មានការអនុញ្ញាត ប៉ុន្តែ ក្រោយមក អាជ្ញាធរបានលុបចោលការហាមឃាត់នេះវិញ។
បន្ថែមពីលើការជំទាស់នឹងការប្រើប្រាស់ដែលនឹងធ្វើឱ្យខូចតម្លៃប្រជាធិបតេយ្យនោះដែរ គណៈរដ្ឋមន្ត្រីក្រុមជី៧មានគោលបំណងអនុម័តផែនការសកម្មភាពមួយ ដើម្បីលើកកម្ពស់ការប្រើប្រាស់ប្រកបដោយទំនួលខុសត្រូវរបស់ AI ដោយអំពាវនាវឱ្យមានការចូលរួមពីភាគីពាក់ព័ន្ធដ៏ទូលំទូលាយក្នុងការអភិវឌ្ឍស្តង់ដារអន្តរជាតិ៕
