ពិព័រណ៍ចិន-អាស៊ាន គឺជាវេទិកាដ៏ធំមួយដែលថ្នាក់ដឹកនាំកំពូលចិន-អាស៊ាន យកចិត្តទុកដាក់ខ្ពស់ និងបានមកជួបជុំគ្នាផ្លាស់ប្តូរបទពិសោធ ពង្រឹងនិងពង្រីកកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម វិនិយោគ ទេសចរណ៍ វប្បធម៌ នយោបាយ ការទូត ទំនាក់ទំនងប្រជាជននិងប្រជាជន និង
វិស័យឯកជន។ ព្រឹត្តិការណ៍ពាណិជ្ជកម្មនេះ បានផ្តល់ឱកាសដល់វិនិយោគិន ធុរជន ពាណិជ្ជករ និងអាជីវករ ជួបប្រាស្រ័យទាក់ទងគ្នា ស្វែងរកដៃគូសហការនិងសហប្រតិបត្តិការ ជាពិសេសសំដៅពង្រឹងភាពជាម្ចាស់នៃវិស័យឯកជន។
ពិព័រណ៍ចិន-អាស៊ាន លើកទី២២នេះ គឺជាឱកាសដែលកម្ពុជាអាចផ្សព្វផ្សាយផលិតផលសក្តានុពលរបស់ខ្លួននៅលើទីផ្សារអន្តរជាតិ ជាពិសេសទីផ្សារចិន, ពង្រីកទីផ្សារនាំចេញទំនិញពីកម្ពុជា និងទាក់ទាញវិនិយោគិនបរទេស។ ជាក់ស្តែង ក្នុងឆ្នាំ២០២៥នេះ កម្ពុជាទទួលបាននូវទីតាំងទំហំ២០០០ម៉ែត្រក្រឡា សម្រាប់រៀបចំស្តង់ពាណិជ្ជកម្មដាក់តាំងបង្ហាញផលិតផល និងសេវាកម្ម របស់ក្រុមហ៊ុន/សហគ្រាស សរុបចំនួន៥៦ ស្មើនឹង៩៣ស្តង់ ដែលក្នុងនោះ មានផលិតផលកសិកម្មចំនួន២២ស្តង់, សេវាកម្មនិងគម្រោង
វិនិយោគចំនួន២០ស្តង់, អាហារនិងភេសជ្ជៈចំនួន៩ស្តង់, សិប្បកម្ម វត្ថុអនុស្សាវរីយ៍ ត្បូង និងគ្រឿងអលង្ការចំនួន២២ស្តង់ និងប្រភេទចម្រុះផ្សេងៗចំនួន២០ស្តង់ ដោយមានការចូលរួមជាច្រើនពីវិស័យឯកជន ដែលបានធ្វើឱ្យចំនួនស្ដង់ពិព័រណ៍ពាណិជ្ជកម្មកម្ពុជានៅក្នុងឆ្នាំ២០២៥ មានការកើនឡើងគួរឱ្យកត់សម្គាល់បើធៀបនឹងឆ្នាំមុនៗ។
ឯកឧត្តមឧបនាយករដ្ឋមន្ត្រីប្រចាំការ បានសម្តែងនូវក្តីសោមនស្សរីករាយ និងកោតសរសើរចំពោះក្រុមការងារក្រសួង ស្ថាប័ន និងភាគីពាក់ព័ន្ធទាំងអស់ ដែលបានចូលរួម និងខិតខំប្រឹងប្រែងរៀបចំតាំងបង្ហាញផលិតផលរបស់ខ្មែរនាពេលនេះដោយជោគជ័យ។ ទន្ទឹមនេះ ឯកឧត្តមឧបនាយករដ្ឋមន្ត្រីប្រចាំការ ក៏បានលើកទឹកចិត្តដល់ក្រសួងស្ថាប័ន វិនិយោគិន ធុរជន សមាគម ក្រុមហ៊ុន និងសហគ្រាសនានា ពិសេសសហគ្រាសធុនតូច និងមធ្យម សូមបន្តជំរុញការនាំចេញផលិតផលកសិកម្ម ឧស្សាហកម្ម
កសិ-ឧស្សាហកម្ម និងកសិ-ពាណិជ្ជកម្មឱ្យបានកាន់តែច្រើន ដើម្បីម្ខាងជួយដល់បងប្អូនប្រជាពលរដ្ឋដោយផ្ទាល់ និងម្ខាងទៀត រួមចំណែកគាំទ្រដល់គោលនយោបាយរបស់រាជរដ្ឋាភិបាលកម្ពុជា។
