ប្រធានាធិបតីអាមេរិក បានចាត់ទុកថា ទង្វើរបស់ក្រុមហ៊ុនហ្វេសប៊ុក គឺកំពុងសម្លាប់អាយុជីវិតរបស់ប្រជាជន ព្រោះករណីឆ្លងរីករាលដាលនាពេលនេះ គឺស្ទើរតែទាំងអស់ទៅហើយ ជាអ្នកដែលមិនបានចាក់វ៉ាក់សាំងប្រឆាំងមេរោគកូវីដ-១៩។ ទោះជាបែបនេះក្ដី ក្រុមហ៊ុនហ្វេសប៊ុក នៅថ្ងៃសៅរ៍សប្ដាហ៍មុននេះ បានចេញមុខអះអាងការពារខ្លួនឯង ពីការចោទប្រកាន់របស់លោកចូ បៃឌិន ដោយបានលើកឡើងថា ការបរាជ័យលើផែនការចាក់វ៉ាក់សាំងរបស់រដ្ឋាភិបាលអាមេរិក គឺមិនពាក់ព័ន្ធនឹងក្រុមហ៊ុនហ្វេសប៊ុកនោះឡើយ ហើយរដ្ឋាភិបាលក៏មិនគួរមកស្ដីបន្ទោសមកលើក្រុមហ៊ុនហ្វេសប៊ុកនោះដែរ។
ក្រុមហ៊ុន Facebook បានបញ្ជាក់ថា ទិន្នន័យបានបញ្ជាក់ថា មាន៨៥% នៃអ្នកប្រើប្រាស់ហ្វេសប៊ុកនៅអាមេរិក គឺបានចាក់វ៉ាក់សាំង ឬចង់ចាក់វ៉ាក់សាំងកូវីដ-១៩។ ក្រុមហ៊ុនបណ្ដាញសង្គមយក្សរបស់អាមេរិកមួយនេះ បន្ថែមទៀតថា ចំពោះផែនការចាក់វ៉ាក់សាំងរបស់លោកប្រធានាធិបតី ចូ បៃឌិន ឲ្យបានដល់៧០% សម្រាប់ពលរដ្ឋអាមេរិកសរុប នៅត្រឹមថ្ងៃទី ៤ខែកក្កដា ត្រូវបានបរជ័យនោះ គឺមិនជាប់ពាក់ព័ន្ធអ្វីនឹងក្រុមហ៊ុនហ្វេសប៊ុកនោះឡើយ។ នេះបើតាមការរាយការណ៍ដោយភ្នាក់ងារព័ត៌មានរ៉យទ័រ។
អត្ថបទទាក់ទង!
យ៉ាងណាក៏ដោយចុះ ការផ្សព្វផ្សាយព័ត៌មានអំពីកូវីដ-១៩មិនត្រឹមត្រូវនៅលើបណ្ដាញសង្គម គឺត្រូវបានគេមើលឃើញថា បានរីកសាយខ្លាំងនៅអំឡុងពេលមេរោគរាតត្បាត រួមទាំងនៅលើបណ្ដាញសង្គមហ្វេសប៊ុក Twitter និងយូធូបជាដើម។ អ្នកស្រាវជ្រាវ និងសមាជិកសភាអាមេរិក បានចោទប្រកាន់ចំពោះភាពបរាជ័យរបស់ហ្វេសប៊ុក ដោយសារតែក្រុមហ៊ុននេះ មិនអាចគ្រប់គ្រងមាតិកាទាំងឡាយណារ ដែលបង្កផលគ្រោះថ្នាក់តាមរយៈបណ្ដាញវេទិការបស់ខ្លួនបាន។
យ៉ាងណាក៏ដោយចុះ ក្រុមហ៊ុនហ្វេសប៊ុកនៅតែអះអាងថា ខ្លួនបានផ្ដល់ជូននូវព័ត៌មានពិតអាចទុកចិត្តបានសម្រាប់ប្រជាជន ចំពោះប្រធានបទទាក់ទងនឹងកូវីដ-១៩ ក៏ដូចជារឿងវ៉ាក់សាំងនេះ។
សូមបញ្ជាក់ថា បច្ចុប្បន្នមេរោគបំប្លែងថ្មី ឌែលតា កំពុងបន្ដវាយប្រហារកាន់តែខ្លាំងនៅទូទាំងពិភពលោក ដោយបានធ្វើឲ្យមានការករណីស្លាប់បាត់បង់ជីវិតកើនឡើងកាន់តែច្រើនដែរ នៅតែក្នុងសហរដ្ឋអាមេរិក ហើយក្នុងនោះ គឺមានស្ទើរតែទាំងអស់ជាអ្នកដែលមិនបានចាក់វ៉ាក់សាំង។ នេះបើតាមការអះអាងរបស់មន្ត្រីសហរដ្ឋអាមេរិក។
កាលពីសប្ដាហ៍មុននេះ ករណីឆ្លងកូវីដ-១០៩នៅអាមេរិក បានហក់ឡើងដល់ទៅ ៧០% ធៀបនឹងសប្ដាហ៍កន្លងទៅ ហើយករណីស្លាប់វិញបានកើនឡើង ២៦% ហើយមេរោគនេះ កំពុងឆ្លងរីករាលដាលខ្លាំងនៅក្នុងតំបន់ ដែលមានអត្រាចាក់វ៉ាក់សាំងទាបនៅក្នុងសហរដ្ឋអាមេរិក៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
