លោក ឆាយ សុផល ចាយលុយជាង១ម៉ឺនដុល្លារទិញសៀវភៅសម្រាប់អតិថិជន Book Cafe

ខុសពីហាងកាហ្វេដទៃ លោយ ឆាយ សុផល ដែលជាសាស្រ្តាចារ្យសារព័ត៌មាន និងជាអ្នកនិពន្ធដ៏ល្បីល្បាញម្នាក់ បានបើកហាងកាហ្វេឈ្មោះថា «Book Café» និងបានចំណាយលុយផ្ទាល់ខ្លួនជាង ១ម៉ឺនដុល្លារទិញសៀវភៅរាប់ម៉ឺនក្បាល បង្កើតជាបណ្ណាល័យក្នុងហាងកាហ្វេតែម្តង។

លោក ឆាយ សុផល សាស្ត្រាចារ្យសារព័ត៌មាន និងជាអ្នកនិពន្ធសៀវភៅ។

លោកបានផ្តល់បទសម្ភាសន៍ដល់សារព័ត៌មាន ខេមបូណូមីស ថា ក្រៅពីផ្តល់នូវអំណាន ប៊ុក កាហ្វេ នឹងផ្តល់នូវបន្ទប់ប្រជុំមួយ ដែលអាចអង្គុយបានគ្នាប្រមាណ២០នាក់ដោយមិនគិតថ្លៃ។ បើតាមសាស្រ្តាចារ្យរូបនេះ ប៊ុក កាហ្វេ មានគម្រោងបើកវគ្គបណ្តុះបណ្តាល ដោយអញ្ជើញវាគ្មិនដែលមានជំនាញសេដ្ឋកិច្ច នយោបាយ និងកសិកម្ម ជាដើម ដើម្បីធ្វើបទបង្ហាញសម្រាប់ជាគន្លឹះជំនួយដល់និស្សិតដែលចង់ធ្វើសារណាទៀតផង។

មិនត្រឹមតែមានសៀវភៅរាប់ពាន់ប្រភេទនោះទេ ហាងកាហ្វេ «Book Café» ថែមទាំងមានតាំងនូវឧបករណ៍បុរាណ និងកាសែតចាស់ៗជាច្រើនទៀតផង។ បើតាមលោក ឆាយ សុផល ចំណូលពីហាងកាហ្វេ មួយចំណែក នឹងយកទៅទិញសៀវភៅនិងកង់សម្រាប់កុមារក្រីក្រនៅជនបទដាច់ស្រយាល។ សូមបញ្ជាក់ថា ប៊ុក កាហ្វេ មានទីតាំងស្ថិតនៅបុរីមហាសែនសុខ ស្ថិតនៅខាងជើងព្រលានយន្តហោះអន្តរជាតិភ្នំពេញប្រហែល ២ពាន់ម៉ែត្រ។